Wamranö kanantsikpä Jesús tantiyatsinqan
18
Juk kutinami discïpulunkuna Jesústa tapuyarqan: “Tayta Diospa mandakuynincho ¿pitä mas respitashqa kanqa?”†2 Tsaymi juk wamrata ñöpanman Jesús qayaskir 3 nirqan: “Rasunpaypami nï: Wamranö mana karqa manami imaypis Tayta Diospa mandakuyninman yaykuyankitsu.† 4 Pipis kay wamranö qollmi shonqu kaqmi Tayta Diospa mandakuynincho mas respitashqa kanqa. 5 Tsaynöpis kay wamranö kaqkunata jutïcho pipis chaskirqa noqatapis chaskimanmi.
Jutsaman mana ishkitsinantsikpä Jesús tantiyatsinqan
6 “Pipis noqaman yärakamuqta juk wamrallatapis jutsata ruratsiptinqa mas allimi kanman mulinu rumita kunkanman watarkur lamarman jitarpuyaptin. 7 ¡Allaw, imanörä kayanqa pitapis jutsa ruratsiqkuna! Tsaynö runakunaqa kay patsacho imaypis kayanqami. Tsaynö kaptinpis paykunaqa castigashqami kayanqa.
8 “Tsaynö kaptinpis makiki o chakiki jutsata ruratsiyäshuptikiqa roquskir jitariyay. Imaypis mana upiq ninaman ishkay chakiyuq o ishkay makiyuq qaykushqa kayänaykipa trokinqa mas allimi kanman juk chakiyuqllapis o juk makiyuqllapis Tayta Diospa ñöpanman chäyaptiki.† 9 Ñawiki jutsata ruratsiyäshuptikiqa jipiskir jitariyay. Infiernuman ishkay ñawiyuq qaykushqa kayänaykipa trokinqa mas allimi kanman juk ñawiyuqllapis Tayta Diospa ñöpanman chäyaptiki.†
10 “Noqami nï: Kay wamrakunapa angelninkunami ciëlucho Taytäpa ñöpancho imaypis kaykäyan. Tsaynö kaykaptinqa kay wamrakunata manakaqman ama churayaytsu. 11 [Runapa Tsurinqa shamushqa oqrakashqakunata salvananpämi.]†
Oqrakashqa üshaman tinkutsiypa Jesús yachatsinqan
12 “Pipis juk pachak (100) üshankunapita jukta oqraykurqa ¿manaku wakin kaqta jaqiykur juklla ashiq aywan? 13 Tariykurqa isqun chunka isqun (99) üshankunapä kushikunqanpitapis masmi kushikun. 14 Tsaynöllami ciëlucho Taytäpis munantsu juk wamrallapis oqrakänanta.
Yärakuq mayintsikta corriginantsikpä Jesús tantiyatsinqan
15 “Yärakuq mayiki ajanätsishuptikiqa tantiyatsinaykipä kikillanwan parlanki. Cäsushuptikiqa perdonanki.† 16 Mana cäsushuptikiqa yapay tantiyatsinaykipä juk ishkay yärakuq mayikita pushanki. Tsaynöpami imata ninqaykitapis mana ñëgananpä ishkay o kimsa testïgu kayanqa.† 17 Paykuna tantiyatsiyaptinpis mana cäsuptinqa yärakuq mayikikuna qorikäyanqancho tantiyatsiyänanpä willayanki. Paykuna niyanqantapis mana cäsuptinqa tsay ajanätsishuqnikiwan amana qorikäyankinatsu. Tsaypa trokinqa mana Israel runatanö y impuestu cobraq runatanö rikayanki.
18 “Rasunpaypami nï: Kay patsacho watayanqaykiqa ciëluchöpis watashqami kanqa. Kay patsacho paskayanqaykiqa ciëluchöpis paskashqami kanqa.a † 19 Yapaymi qamkunata nï: Ishkayllapis tsay yarpaylla mañakuyaptikiqa ciëlucho Taytämi yanapayäshunki. 20 Juk ishkayllapis jutïcho qorikäyaptikiqa qamkunawanmi kaykäshä”.
Perdonanakur kawanantsikpä Jesús ninqan
21 Tsaynö yachatsiptinmi Jesúsman witiykur Pedro tapurqan: “Taytay, yärakuq mayï llutanta rurar ajanätsimaptin ¿ayka kutitä perdonäman? ¿Qanchis kutitsurä?”
22 Jesúsnami nirqan: “Manami qanchis kutillatsu perdonankiman, tsaypa trokinqa qanchis chunka (70) kuti qanchispis perdonanki”.†
23 Tsaypitanami Jesús nirqan: “Tayta Diospa mandakuynin imanö kanqantapis willashayki. Juk reyshi wätayninkunata ninä jaqan kayanqanpita pägakuyänanpä. 24 Jaqanta pägayänanpäshi juk wätayninta reyman pushayänä. Tsay wätayqa chunka waranqa (10,000) talentushib jaqan kanä. 25 Jaqanta pägayta mana kamäpakuptinshi yanapaqninkunata tsay rey ninä: ‘Jaqä kanqanta pägamänanpä kay runata, warminta, tsurinkunata y imaykankunatapis rantikuyay’.
26 “Tsaynö niptinshi wätayninqa ñöpanman qonqurikuykur rugakunä: ‘Taytay, shuyaykallämay. Jaqaykitaqa llapantami pägalläshayki’.
27 “Tsaynö rugakuptinshi tsay rey kuyaparnin llapan jaqanta perdonar rantikunänatsu.
28 “Perdonaskiptin aywaykanqanchöshi paypa jaqan kaq wätay mayinwan tinkuskinä. Tsay wätay mayinqa pachak (100) denariullashic jaqan kanä. Tsaynashi kunkapita tsariskir ninä: ‘¡Jaqäta pägamay!’
29 “Tsaynö ruraptinshi qonqurikuykur rugakunä: ‘Taytay, shuyaykallämay. Jaqaykitaqa llapantami pägalläshayki’. 30 Tsaynö rugakuptinpis manashi perdonayta munanätsu. Tsaypa trokinqa jaqanta päganqanyaqshi carcelcho qaykurätsinä.
31 “Tsaynö ruranqanta rikaykurshi wakin kaq wätaykuna carcelman wichqatsinqan runata kuyaparnin reyman aywaykur ima päsanqantapis willayänä. 32 Tsaynashi tsay runata qayaykatsir rey ninä: ‘¡Mana kuyapäkuq runa! Pasaypa jaqä kaykaptikipis rugakamaptikimi llapanta perdonashqä. 33 ¿Imanirtä qamta kuyapanqänö wätay mayikita kuyapashqaykitsu?’ 34 Tsaynö nirshi pasaypa ajanar kikintapis carcelman wichqatsinä. Tsaychöshi wardiakuna castigayänä reypa llapan jaqanta päganqanyaq”.
35 Tsaynö willaskirnami Jesús nirqan: “Yärakuq mayikikunata llapan shonquykiwan mana perdonayaptikiqa tsaynöllami qamkunatapis ciëlucho kaykaq Taytä rurayäshunki”.