Jesús chipipiykaq rikakunqan
17
Tsaypita soqta junaqtanami Pedruta, Santiaguta y Santiagupa wawqin Juanta pushakurkur juk jirkaman Jesús witsarqan. 2 Tsaychömi rikaraykäyaptin Jesús juk niraqman tikrarqan. Tsaymi qaqllanpis rupaynörä chipipirqan y latsapanpis pasaypa yuraqman tikrar empañakuyparä atsikyarqan. 3 Tsaychömi rikayarqan Moiséswan Elías yuripaykur Jesúswan parlaykäyaqta.4 Pedrunami Jesústa nirqan: “Taytay, allipämi kaycho kaykäyä. Munaptikiqa kimsa tsukllata rurayämushä: jukta qampä, jukta Moiséspä y jukta Elíaspä”.
5 Pedro tsaynö ninqan hörami chipipiykaq pukutay paykunata tsapaskirqan. Pukutaypitanami Tayta Dios nimurqan: “Paymi kuyay Tsurï. Paypitami kushishqa kaykä.† Pay niyäshunqaykita cäsukuyay”.†
6 Tsaynö nimuqta wiyaykurmi discïpulunkuna pasaypa mantsakar patsaman lätakaykuyarqan. 7 Tsaynö lätaraykäyaptinmi paykunata yataykur Jesús nirqan: “Ama mantsakäyaytsu. Shäriyay”.
8 Tsaynö niptin ñukirkuyänanpäqa Jesúsllatana rikaskiyarqan.
9 Jirkapita uraykäyämuptinmi Jesús nirqan: “Jirkacho rikayanqaykita pitapis ama willayankirätsu. Runapa Tsurin wanunqanpita kawarimuptinrä willakuyanki”.
10 Discïpulunkunanami Jesústa tapuyarqan: “Runapa Tsurin wanunanpä kaykaptinqa ¿imanirtä ley yachatsikuqkuna niyan puntata Elíasrä shamunanpä kanqanta?”†
11 Jesúsnami nirqan: “Elías rasunpaypami puntata shamunqa llapanta kamarinanpä. 12 Tsaynö kaptinpis Elíasqa maynami shamushqa.† Paytaqa pï kanqantapis mana reqirmi wanutsiyarqan. Tsaynöllami Runapa Tsurintapis wanutsiyanqa”.
13 Jesús tsaynö niptinmi discïpulunkuna tantiyayarqan Elíaspä parlar Bautizaq Juanpä parlaykanqanta.
Juk chöluta Jesús alliyätsinqan
14 Runakuna qoriraykäyanqanman Jesús chaykuptinmi ñöpanman qonqurikuykur juk runa rugakur nirqan: 15 “Taytay, tsurïta kuyapaykullay. Wanuy qeshya tsariptinmi pasaypa ñakan. Atska kutimi ninamanpis yakumanpis jeqashqa. 16 Discïpuluykikunaman apamuptïpis manami alliyätsiyta kamäpakuyashqatsu”.
17 Jesúsnami nirqan: “¡Yärakuyniynaq jutsasapa runakuna! ¡Imayyaqrä qamkunawan kaykäshä! ¡Imayyaqrä qamkunata awantayäshayki! Mä tsay chöluta apayämuy”.
18 Ñöpanman chaykatsiyaptinnami chöluta ñakaykätsiq supayta Jesús ollqutuparqan. Tsaymi supayqa jinan höra chölupita yarquskir aywakurqan. Tsay hörapitaqa tsay chölu alliyaskirqannami.
19 Tsaypita kikillankuna kaykarnami discïpulunkuna Jesústa tapuyarqan: “Noqakunaqa ¿imanirtä tsay supayta qarquyta kamäpakuyashqätsu?”
20 Tsaymi Jesús nirqan: “Shumaq mana yärakurmi qarquyta kamäpakuyashqaykitsu. Rasunpaypami nï: Ñäbuspa murunnö ichikllapis yärakuynikikuna kaptinqa taqay jirkata witikunanpä niyaptikipis witikunmanmi.† Manami imapis alläpa ajatsu qamkunapä kanman. 21 [Tsaynö kaptinpis kaynö supaykunataqa qarquyanki ayunar Tayta Diosta mañakurrämi]”.
Wanunanpä kanqanta Jesús yapay willakunqan
Marcos 9.30-32; Lucas 9.43b-45
22 Galileacho puriykarmi discïpulunkunata Jesús nirqan: “Runapa Tsurintami chikiqninkunapa makinman entreganqa. 23 Wanutsiyaptinpis kimsa junaqtami kawarimunqa”.
Tsaynö niptinmi discïpulunkuna pasaypa llakikuyarqan.
Templupä impuestuta Pedro päganqan
24 Tsaypitanami Capernaúmman discïpulunkunawan Jesús chäyarqan. Tsaychömi templupä impuestu cobraqkuna† Pedruta tapuyarqan: “Maestruykiqa ¿manaku templupä impuestuta pägan?”
25 Pedrunami nirqan: “Awmi, päganmi”.
Tsaypita wayiman Pedro yaykuskir imatapis manarä niptinmi Jesús nirqan: “Simón, ¿ima ninkitä? Reykuna ¿pitatä impuestuta cobrayan? ¿Marka mayinkunataku o jäpa runakunataku?”
26 Tsaynö tapuptinmi Pedro nirqan: “Taytay, jäpa runakunatami”.