2 Jesúsnami nirqan: “Rupay jeqanqan höra ciëlucho antëllu puka kaptinmi niyanki: ‘Waray usyanqami’. 3 Tsaynöllami pukutaraykar warämuptin niyanki: ‘Kanan junaqqa tamyanqami’. [¡Allish tukuq runakuna!] Tsaykunata tantiyaykarqa ¿imanirtä ruranqäkunata rikaykar Tayta Dios kachamanqanta tantiyayankitsu? 4 ¡Mana cäsukuq jutsasapa runakuna! Milagruta ruranäta munayaptikipis^† manami ima milagrutapis rurashätsu. Tsaypa trokinqa profëta Jonásta salvar milagruta ruranqannömi Tayta Dios juk milagruta ruranqa”.

Tsaynö niskirmi Jesús aywakurqan.

5 Lamarta tsimpaskirmi Jesúspa discïpulunkuna tantata qonqäyanqanta yarpaskiyarqan. 6 Tsaymi Jesús nirqan: “Paqtä fariseukunapa y saduceukunapa levadüranta chaskiyankiman”.^†

7 Tsaynö niptinmi discïpulunkuna kikinkunapura niyarqan: “Tantata mana apamunqantsikpitami tsaynö nikämantsik”.

8 Tsaynö parlaykäyanqanta tantiyaskirmi Jesús nirqan: “¡Yärakuyniynaq janan shonqu runakuna! ¿Imanirtä parlaykäyanki tantata mana apayämunqaykita? 9 ¿Imanirtä tantiyayankitsu imapä parlanqäta? ¿Manaku yarpäyanki pitsqa tantallapita pitsqa waranqa (5,000) runakuna mikuyänanpä milagru ruranqäta? ¿Manaku yarpäyanki sobraq tantata ayka canastata qoriyanqaykita?^† 10 Tsaynöpis ¿manaku yarpäyanki qanchis tantallapita chusku waranqa (4,000) runakuna mikuyänanpä milagru ruranqäta y sobraq tantata ayka canastata qoriyanqaykita?^† 11 ¿Imanirtä tantiyayankitsu tantapä mana parlanqäta? Tantapä parlanäpa trokinqa fariseukunapa y saduceukunapa levadüranta mana chaskiyänaykipämi nikä”.

12 Tsaynö niptinmi tantiyayarqan levadürapä mana parlaykanqanta, tsaypa trokinqa tantiyayarqan fariseukunapa y saduceukunapa yachatsikuyninta mana chaskipäyänanpä ninqantami.

13 Cesarea de Filipos distrïtuman chaykurmi discïpulunkunata Jesús tapurqan: “Runapa Tsurin ¿pï kanqantatä runakuna niyan?”

14 Discïpulunkunanami niyarqan: “Wakinmi niyan Bautizaq Juan kanqaykita. Wakinnami niyan profëta Elías kanqaykita. Wakinnami niyan profëta Jeremías o mayqan profëtapis kanqaykita”.^†

15 Jesúsnami tapurqan: “Qamkunaqa ¿pï kanqätatä yarpäyanki?”

16 Tsaymi Simón Pedro nirqan: “Qamqa imayyaqpis kawaq Tayta Diospa Tsurinmi kaykanki. Pay kachamunqan Cristumi kaykanki”.^†

17 Jesúsnami nirqan: “Jonáspa tsurin Simón, allitami nishqayki. Tsaynö ninaykipä manami runatsu tantiyatsishushqayki, sinöqa ciëlucho kaykaq Taytämi. 18 Qamtami nï Pedro^a kanqaykita. Kay rumi jananchömi iglesiäta shäritsishä. Tsay iglesiataqa Satanáspis manami vincinqatsu. 19 Qamtami entregashayki Tayta Diospa mandakuyninman yaykuna llävikunata. Tsaymi kay patsacho watanqaykiqa ciëluchöpis watashqa kanqa. Kay patsacho paskanqaykiqa ciëluchöpis paskashqami kanqa”.^{b †}

20 Tsaynö niskirmi discïpulunkunata nirqan: “Tayta Dios kachamunqan Cristo kanqäta pitapis ama willayankitsu”.^c

21 Tsaypitanami discïpulunkunata Jesús willar nirqan: “Jerusalénmanmi aywanä kaykan. Tsaychömi Israel mayor runakuna, mandaq sacerdötikuna y ley yachatsikuqkuna pasaypa ñakatsimar wanutsiyämanqa. Kimsa junaqtaqa kawarimushämi”.

22 Tsaynö niptinmi jukläman qayaskir Pedro ollqutupar nirqan: “Taytay, tsaytaqa Tayta Dios ama munaykullätsuntsu. ¡Tsaynöqa ama kaykullätsuntsu!”

23 Tsaynö niptinnami Pedruman tikraykur Jesús nirqan: “¡Ñöpäpita witikuy, Satanás! ¡Ama tsapata churapämaytsu! Qam manami munankitsu Tayta Dios munanqanta ruranäta, tsaypa trokinqa runa munanqanta ruranätami munanki”.

24 Tsaypitanami discïpulunkunata Jesús nirqan: “Pipis discïpulü kayta munarqa kikin munanqannö ama kawatsuntsu, tsaypa trokinqa cruzninta apaqnö noqata qatirämätsun.^{d †} 25 Kawayninta salvayta munaqkunaqa kawayninta oqrayanqami. Kawayninta noqa raykuq oqraqkunami itsanqa kawayninta salvayanqa.^{e †} 26 Infiernuman qaykushqa kananpä kaptinqa ¿imapätä välin llapan mundupa duëñun kanqanpis? Mayläya imaykayuq karpis manami imaykayuq kanqanwanqa salvacionta rantinqatsu.

27 “Runapa Tsurin angelninkunawan y Taytanpa munayninwan shamurmi^† imanöpis kawayanqanman tupu pitapis juzganqa.^† 28 Rasunpaypami nï: Manarä wanurmi wakinniki rikayanki Runapa Tsurin llapantapis mandananpä shamuykaqta”.