Runakuna llutankunata yarpar impüru rikakuyanqan
15
Tsaypitanami fariseukuna y ley yachatsikuqkuna Jerusalénpita chaykur Jesústa tapur niyarqan: 2 “¿Imanirtä discïpuluykikuna unay castantsikkunapa costumbrinkunata mana cäsur mikuyänanpä makinkunata awikuyantsu?”3 Jesúsnami nirqan: “Qamkunapis ¿imanirtä Tayta Diospa mandamientunta cumpliyänaykipa trokin costumbrikikunata mas cumpliykäyanki? 4 Tayta Diospa mandamientunmi nin: ‘Mamaykita y taytaykita alli rikanki’.† Tsaynöpis kaynömi nin: ‘Pipis mamanta o taytanta mana respitaq kaqqa wanutsishqa katsun’.†
5 “Tsaynö nikaptinmi qamkunaqa yachatsir nikäyanki: ‘Imaykikunapis Tayta Diosllapä kanqanta nikarqa mamaykita ni taytaykita yanapayänaykipä manami yatayankimannatsu’. 6 Mamanta y taytanta manana yanapayänanpä yachatsirqa Tayta Diospa palabranta manakaqmanmi churaykäyanki. 7 ¡Allish tukuq runakuna! Rasun kaqtami Isaías qamkunapä qellqarqan. Tsay qellqanqanchömi nin:
8 “ ‘Kay runakunaqa shimillanmi cäsukayämänanpä niyäman.
Shonqunkunachöqa juktami yarpaykäyan.
9 Ninqäta yachatsiyänanpa trokinqa runakuna niyanqallantami yachatsiyan.
Tsaymi adorayämanqanpis manakaqllapä kaykan’ ”.†
10 Tsaypitanami runakunata qayaskir Jesús nirqan: “Kay ninqäkunata shumaq tantiyakuyay. 11 Manami imatapis mikunqanpitatsu pipis impüru rikakun, tsaypa trokinqa llutankunata parlanqanpitami”.
12 Tsaymi discïpulunkuna Jesústa niyarqan: “¿Tantiyankiku tsaynö niptiki fariseukuna ajanäyanqanta?”
13 Jesúsnami nirqan: “Ciëlucho kaykaq Taytä mana plantanqan jacha karmi paykunaqa chakrapita llukirishqa kayanqa. 14 Paykunata ama cäsupäyaytsu. Paykunaqa qaprapura pushanakuqnömi kaykäyan. Qaprapura pushanakurqa ishkanmi pözuman jeqarpuyanqa”.†
15 Tsaynö niptinmi Pedro nirqan: “Taytay, mikuyman tinkutsiypa yachatsinqaykita tantiyaykatsiyällämay”.†
16 Tsaymi Jesús nirqan: “¿Qamkunapis manaku tantiyayanki? 17 Runaqa manami mikuyta mikunqanpitatsu impüru rikakun. Mikunqanqa pachanpita yarqurmi ushakäkun. 18 Shonquncho mana allita yarpanqanta parlarmi itsanqa impüru rikakun.† 19 Runakunaqa shonquncho mana allikunata yarparmi runa mayinta wanutsiyan, majanta qanratäyan y fornicación jutsata rurayan. Tsaynöpis suwakuyan, llullakuyan y runa mayinta ashlliyan. 20 Tsaykunata rurarmi runaqa impüru rikakun. Manami makinta mana awikullar mikunqanpitatsu impüru rikakun, sinöqa shonquncho mana allikunata yarpanqanpitami”.
Mana Israel warmi Jesúsman yärakunqan
21 Tsaypitanami Jesús aywarqan Tiro y Sidón markakunaläpa. 22 Tsay markakunachömi cananeo niyanqan mana Israel runakuna täyan. Tsaymi juk cananea warmi Jesús kaqman aywar pasaypa rugakur nirqan: “¡Davidpa Tsurin Jesús, kuyapaykallämay! Warmi wawätami supay löcayätsir pasaypa ñakaykätsin”.
23 Tsaynö niptin Jesús manami imatapis parlakurqantsu. Tsaymi discïpulunkuna Jesústa niyarqan: “Pasaypa qayaykacharmi taqay warmi qatiraykämantsik. Taytay, aywakunanpä niykuy”.
24 Tsaymi tsay warmita Jesús nirqan: “Oqrakashqa üshanö kaykaq Israel runakunallamanmi Tayta Dios kachamashqa”.
25 Tsaynö niptinmi Jesúspa ñöpanman qonqurikuykur tsay warmi nirqan: “¡Taytay, yanapaykallämay!”
26 Tsaynö rugakuptinmi Jesús nirqan: “Qamta yanaparqa wamrakunapa tantanta qechuskir allqukunata qaraqnöchi rikaküman”.
27 Warminami nirqan: “Awmi, taytay. Tsaynö kaptinpis mësapita shushupakuyanqantaqa allqukunapis mikuyanmi”.
28 Tsaymi Jesús nirqan: “Rasunpaypami yärakamanki. Rugakamanqaykinömi kanqa”.
Tsay hörami tsay warmipa wawan alliyaskirqan.
Qeshyaykaqkunata Jesús alliyätsinqan
29 Tsaypita aywakurnami Galilea qocha kuchunpa Jesús päsarqan. Nirkurnami juk jirkanninman witsarkur tsaycho jamakurqan. 30 Tsaymanmi atskaq runakuna chätsiyarqan weqrukunata, qaprakunata, makllukunata, mana parlaqkunata y wakin qeshyawan qeshyaqkunatapis. Tsaychömi llapan qeshyaqkunata Jesús alliyätsirqan. 31 Tsaymi runakuna pasaypa kushikuyarqan upakuna parlaqta wiyar, makllukuna alliyashqa kaykaqta rikar, weqrukuna puriqta rikar y qaprakuna rikaqta rikar. Tsaynö kushikurmi Tayta Diosta alabayarqan.
Chusku waranqa runakuna mikuyänanpä milagruta Jesús ruranqan
32 Tsaypitanami discïpulunkunata qayaykur Jesús nirqan: “Kay runakunatami pasaypa kuyapä. Kimsa junaqnami mikuytapis mana yawaypa noqantsikwan kaykäyan. Mallaqllata ‘aywakuyay’ niptïqa wayinkunamanpis manarä chäyaptinchi shonqunkunapis aywapakäyanqa”.
33 Discïpulunkunanami niyarqan: “Kay jäkuqchöqa ¿maychörä mikuyta tariykushun atskaq runakunapä?”
34 Jesúsnami tapurqan: “¿Aykatä tantaykikuna kaykan?”
Niptinnami niyarqan: “Taytay, qanchis tantawan juk ishkay pescädullami kaykan”.
35 Tsaynö niyaptinmi runakuna jamakuyänanpä Jesús nirqan. 36 Jamaskiyaptinnami pescäduta y qanchis tantata aptarkur Tayta Diosta mañakur agradëcikurqan. Nirkurnami tantata pakiskir discïpulunkunata makyarqan aypukuyänanpä. 37 Tsaymi pacha junta llapanpis mikuyarqan. Sobraq kaqkunatanami qanchis canasta juntata discïpulunkuna qoriyarqan. 38 Tsaycho mikuqkunaqa chusku waranqanömi (4,000) kayarqan. Warmikunata y wamrakunataqa manami yupayarqantsu.
39 Runakunata aywakuyänanpä niskirnami büquiman yarkurkur discïpulunkunawan Magdala partiman Jesús aywakurqan.