2 Tsaychömi rikayarqan Jesúspa discïpulunkuna makinkunata mana awikur mikuykäyaqta. 3 Fariseukuna y Israel mayinkunaqa unay castankunapa costumbrinkunata cumplirmi mikuyänanpä makinkunatarä imaypis awikuyan. Mana awikurqa manami mikuyantsu.^a 4 Tsay costumbrikunata cumplirmi täzakunatapis, wichikunatapis, mankakunatapis [y catrikunatapis] mayllayan. Tsaynömi rantipakuyanqanpita kutirpis mikuyänanpä bäñakuyan. Tsaynöllami mas wakin costumbrinkunatapis cumpliyan. 5 Tsaymi fariseukuna y ley yachatsiq runakuna Jesústa tapuyarqan: “¿Imanirtä discïpuluykikuna unay castantsikkunapa costumbrinkunata mana cäsur impüru makinkunawan mikuyan?”

6 Jesúsnami nirqan: “¡Allish tukuq runakuna! Rasun kaqtami Isaías qamkunapä qellqarqan. Tsay qellqanqanchömi nin:

8 “Isaías ninqannöllami qamkunapis Tayta Diospa mandamientunkunata cäsukuyänaykipa trokin kikikikunapa costumbrikikunallata cumpliykäyanki. [Tsaymi wichikunatapis täzakunatapis püru kayänanpä mayllayankirä. Tsaynöllami wakin costumbrikunatapis ruraykäyanki]”.

9 Mastami Jesús nirqan: “¡Costumbrikikunata cumplir Tayta Diospa mandamientunkunatachi cumpliykäyanki! 10 Moisésmi nirqan: ‘Mamaykita y taytaykita alli rikanki’.^† Tsaynöpis nirqan: ‘Pipis mamanta o taytanta mana respitaq kaqqa wanutsishqa katsun’.^†

11 “Tsaynö nikaptinmi qamkunaqa yachatsir nikäyanki: ‘Mamaykita y taytaykita yanapayta mana munarqa kaynö ninki: “Qamkunata yanapanäpä kaqkunata Tayta Diosta qoykunäpämi awnishqä” ’. 12 Tsaynö nirmi runakunata yachaykätsiyanki mamanta y taytanta mana yanapayänanpä. 13 Costumbrikikunata tsaynö yachatsikurqa Tayta Diospa palabranta manakaqmanmi churaykäyanki. Tsaynöllami wakin costumbrikikunatapis yachaykätsiyanki”.

14 Tsaypitanami runakunata qayaskir Jesús nirqan: “Kay ninqäkunata llapayki shumaq tantiyakuyay. 15 Manami imatapis mikunqanpitatsu pipis impüru rikakun, tsaypa trokinqa shonquncho mana allita yarpanqanpitami. 16 [Rinriyuq kaqkunaqa ninqäkunata wiyakuyätsun]”.

17 Tsaypitanami runakunata jaqiskir juk wayiman Jesús yaykurqan. Tsaychönami yachatsinqankunata tantiyatsinanpä discïpulunkuna rugakuyarqan. 18 Jesúsnami nirqan: “¿Qamkunapis manaku tantiyayanki runa imata mikurpis impüru mana kanqanta? 19 Mikunqantsikkunaqa manami shonquntsikmantsu yaykun, sinöqa pachantsikmanmi. Nirkurnami päsakun”.

Tsaynö nirmi Jesús tantiyatsirqan llapan mikuykunapis mikunantsikpä alli kanqanta.

20 Mastami nirqan: “Shonquncho mana alli yarpanqankunami runata impüruyätsin. 21 Runakunaqa shonquncho mana allikunata yarparmi fornicación jutsata rurayan, suwakuyan, wanutsinakuyan, 22 majanta qanratäyan, ayrajashqa kayan, llullakuyan, achachäpakushqa kar penqakuypä jutsata rurayan, envidiakuyan, jukpa wasanta rimayan, yachaq tukuyan y llutankunata rurayan. 23 Tsay llapan mana allikuna shonqunkunapita yarqamurmi runakunata impüruyätsin”.

24 Tsaypitanami Jesús aywarqan Tiro [y Sidón] markakunaläpa. Tsayman chanqanta runakuna musyayänanta mana munarmi pakayllapa juk wayiman patsakurqan. Tsaynö pakakuptinpis runakuna musyayarqanmi tsaycho kaykanqanta.

25 Tsay markachömi juk warmipa warmi wawanta supay pasaypa ñakatsirqan. Jesús tsayman chanqanta musyaykurmi tsay warmi ñöpanman qonqurikuykur 26 wawanpita supayta qarqunanpä rugakurqan. Tsay warmi manami Israel warmitsu karqan, sinöqa patsan Sirofeniciapitami karqan. 27 Tsaynö rugakuptinmi Jesús nirqan: “Puntataqa Israel mayïkunatarämi yanapashä. Qamta yanaparqa wamrakunapa tantanta qechuskir allqukunata qaraqnöchi rikaküman”.

28 Warminami nirqan: “Awmi, taytay. Tsaynö kaptinpis wamrakuna shushupakuyanqantaqa allqukunapis mikuyanmi”.

29 Jesúsnami nirqan: “Allitami nishqayki. Wawaykita ñakatsiq supay yarqushqanami. Kananqa wayikiman kutikuy”.

30 Wayinman kutirnami wawanta tarirqan alliyashqana cämancho kaykaqta. Tsaynö alliyarqan supay yarqukushqana kaptinmi.

31 Tiro markapita Jesús aywakurnami Sidón marka kaqläpa tumamur Decápolis provinciaman charqan. Tsaypitanami Galilea qocha kuchunman charqan. 32 Tsaycho kaykaptinmi upa runata payman pushayarqan. Chaykatsirmi Jesústa rugayarqan yataykur alliyätsinanpä. 33 Tsaymi kikillanta jukläman pushaykur upapa rinrinman dëdunta Jesús jatirqan. Toqayninwan dëdunta ushmarkatsirmi upapa qalluntapis yatarqan. 34 Tsaynö ruraskirmi jamayninta kachaskir ciëluman ñukirkur: “¡Efata!” nirqan. (Efata ninanqa kichakay ninanmi.) 35 Tsaynö niptinmi jinan höra rinrin wiyarqan y parlar qallaykurqan.

36 Tsaynö alliyaskatsirmi tsaycho kaykaq runakunata Jesús nirqan alliyätsinqanta pitapis mana willakuyänanpä. Kutin kutin tsaynö nikaptinpis pïmaytami willayarqan. 37 Alliyätsinqanta rikarmi runakuna pasaypa kushikur niyarqan: “¡Llapantapis allitami ruran! ¡Alliyätsiptinmi upakunapis wiyayan y mana parlaqkunapis parlayan!”