2 Jamay junaq kaptinmi sinagögacho yachatsikuptin runakuna mantsakashqa niyarqan: “Tsaynö yachatsinanpä ¿maychörä yachakamushqa? Tsaynöpis ¿imanöparä milagrukunata ruran? 3 ¿Manaku payqa carpintëru? Mamanpis ¿manaku María? Wawqinkunapis ¿manaku Santiago, José, Judas y Simón? Paninkunapis ¿manaku kay markacho täyan?”

Tsaynö nirmi Jesús yachatsinqankunata criyiyarqantsu.

4 Jesúsnami nirqan: “Wakin markakunacho profëtata chaskiyaptinpis castankuna y marka mayinkunaqa manami chaskiyantsu”.^†

5 Tsaynö mana chaskiyaptinmi ima milagrutapis tsay markacho rurarqantsu. Tsaypa trokinqa juk ishkay qeshyaykaqkunallatami yataykur alliyätsirqan. 6 Marka mayinkuna payman mana yärakuyaptinmi Jesús pasaypa llakikurqan.

Tsaypitanami markakunapapis jallqakunapapis runakunata yachatsiraykar Jesús purirqan. 7 Tsaynö purirmi chunka ishkay discïpulunkunata qayaykur munayninta qorqan runakunapita supaykunata qarquyänanpä. Nirkurmi alli willakuyninta willakuyänanpä ishkaq ishkaqta kacharqan. 8 Tsaymi nirqan: “Tukrullata apayanki. Qepita, mirkapata ni qellaytapis ama apayankitsu.^† 9 Jatiräyanqayki llanqillawan aywayanki. Trukakuyänaykipä latsapatapis ama apayankitsu.

10 “Pipa wayinman patsakurpis juk markaman päsayanqaykiyaq tsayllacho patsaräkuyanki. 11 Willakuyanqaykita mana chaskiyäshuptikiqa chakikikunacho kaykaq polvuta tapsikuskir aywakuyanki. Tsaynö rurayanki Tayta Dios paykunata castigananpä kaqta musyayänanpä.^† [Rasunpaypami nï: Juiciu final junaqchöqa Sodomacho y Gomorracho taq runakunata castiganqanpitapis mas peormi tsay runakunata Tayta Dios castiganqa]”.

12 Tsaynö niptinmi discïpulunkuna aywar willakuyarqan jutsankunata kacharir Tayta Dios munanqannö kawayänanpä. 13 Tsaynöllami supaykunatapis runakunapita qarquyarqan. Qeshyaykaqkunatapis aceitita wiñaparmi^† atskaqta alliyätsiyarqan.

14 Jesús ruranqankunata maytsaychöpis parlayaptinmi rey Herodespis musyarqan. Wakin runakunami Jesúspä niyarqan: “Tsay runaqa Bautizaq Juanmi kawarimushqa kanqa. Tsaymi milagrukunata rurananpä munayyuq kaykan”.

15 Wakinmi profëta Elías kanqanta niyarqan. Wakinnami niyarqan unay profëtakunanö profëta kanqanta.^† 16 Tsaynö parlayanqanta wiyarmi rey Herodes nirqan: “Umanta roqutsinqä Juanmi kawarimushqa kanqa”.

17 Ñöpatami Juanta Herodes prësu tsariskatsir cadënawan watarkur carcelman wichqatsishqa karqan. Tsaynö rurarqan Herodías jutiyuq warmi mañakuptinmi. Herodíasqa Herodespa wawqin Felipipa warminmi karqan. Herodes warmintanö Herodíasta katsiptinmi 18 Juan nirqan: “Wawqikipa warminwan kakur jutsatami ruraykanki”.^†

19 Tsaynö ninqanpitami Herodías chikir Juanta wanutsiyta munarqan. Wanutsiyta munarpis Juanta Herodes respitaptinmi kamäpakurqantsu. 20 Juanta tsaynö respitarqan Dios munanqannö kawar santu runa kanqanta musyarmi. Diospa willakuyninta Juan willakuptinmi kushishqa wiyarpis ima ruraytapis kamäpakurqantsu.

21 Tsaypita Herodespa santuncho fiestata rurarmi inkitarqan autoridäkunata, soldädukunapa mas mandaqninkunata y Galileacho taq imaykayuq runakunatapis. 22 Tsaycho kaykäyaptinmi Herodíaspa jipash wawan yaykuskir tushurqan. Tsayta rikarmi Herodes y inkitanqan runakunapis pasaypa kushikuyarqan. Tsaymi jipashta rey Herodes nirqan: “Imata munanqaykitapis mañakamay. Nimanqaykitami qarashayki”.

23 Tsaypitanami jurar nirqan: “ ‘Mandanqayki nacionta pullanta rakipamay’ nimaptikipis rakipäshaykimi”.

24 Tsaymi maman kaqman tsay jipash aywaykur tapurqan: “Mamay, ¿imatatä mañaküman?”

Mamannami nirqan: “Bautizaq Juanpa umanta qarashunaykipä niy”.

25 Maman tsaynö yätsiptinmi rey kaqman kutiykur nirqan: “Noqa munä kanan höra Bautizaq Juanpa umanta plätucho qaramänaykitami”.

26 Tsayta mañaptinmi rey Herodes pasaypa llakikurqan. Tsaynö kaptinpis inkitanqankunapa ñöpancho jurashqa karmi ñëgayta kamäpakurqantsu. 27 Tsaymi jinan höra wardiata kacharqan Juanpa umanta apamunanpä. Ninqannöllami carcelman aywar Juanpa umanta roquskir 28 jipashta plätuwan entregarqan. Chaskiskirnami jipashqa mamanta entregarqan. 29 Tsaynö rurayanqanta musyaskirnami Juanpa discïpulunkuna ayanta qoriskir pampayarqan.

30 Willakuyanqanpita apostolkuna kutiykurmi llapan rurayanqanta y yachatsiyanqanta Jesústa willayarqan.

31 Tsaycho atskaq runakuna kayaptinmi mikuyänanpäpis tiempun karqantsu. Tsaymi apostolninkunata Jesús nirqan: “Jamapänantsikpä tsunyaqman aku aywashun”.

32 Tsaynö nirmi büquiman yarkurkur apostolninkunawan tsunyaqman aywayarqan. 33 Maypa aywayanqantapis runakuna rikarmi markakunapita juklla aywar Jesúspita mas puntata chäyarqan. 34 Büquipita yarpuskirnami atskaq runakuna shuyaykäyaqta Jesús tarirqan. Mitsiqniynaq üshakunanö kaykaqta rikarmi kuyaparnin imaykata yachatsirqan.^†

35 Tardiyaptinnami discïpulunkuna Jesúsman witiykur niyarqan: “Tsunyaqchömi kaykantsik. Patsapis tardiyaykannami. 36 Runakunata niy markakunapa aywar mikuyninkuna rantiyänanpä. [Kaychöqa manami mikuyänanpä imapis kantsu]”.

37 Jesúsnami nirqan: “Qamkuna mikuyninkuna qarayay”.

Tsaynö niptinmi niyarqan: “¿Noqakuna tanta rantiq aywayänätaku munanki? Kaytsikaqpäqa ishkay pachak (200) jornalpa chaninrächi aypanman”.

38 Jesúsnami nirqan: “¿Ayka tantatä kapuyäshunki? Mä rikayämuy”.

Rikaykamurmi niyarqan: “Pitsqa tantawan ishkay pescädullami kaykan”.

39 Nirkurmi discïpulunkunata Jesús nirqan runakunata grüpu grüpu pampaman jamatsiyänanpä. 40 Tsaynö niptinmi juk pachakpa (100) pitsqa chunkapa (50) jamatsiyarqan. 41 Tsaypitanami pitsqa tantatawan ishkay pescäduta aptarkur ciëluman ñukirkur Tayta Diosta Jesús agradëcikurqan. Tantata pakirirnami discïpulunkunata makyarqan runakunata qarayänanpä. Tsaynöllami llapan mikuyänanpä ishkay pescädutapis makyarqan. 42 Pacha junta mikuskiyaptinnami 43 katuyanqan tantakunata y pescädukunata chunka ishkay canasta juntata qoriyarqan. 44 Tsaycho mikuqkunaqa pitsqa waranqa (5,000) runakunami kayarqan.

45 Tsaypitanami discïpulunkunata Jesús nirqan büquiman yarkurkur Betsaida markaman puntayänanpä. Aywakuyaptinnami tsaycho kaykaq runakunata despachaskir 46 Tayta Diosta mañakunanpä jirkaman witsarqan.

47 Patsa tsakaskiptinnami discïpulunkuna büquiwan karutana aywaykäyarqan. Tsayyaqqa jirkallachörämi Jesús kikillan kaykarqan. 48 Tsaypitami rikarqan wayra kutitsimuptin büquiwan discïpulunkuna ñakaykäyaqta. Patsa waraykaptinnami discïpulunkuna kaqman yaku jananpa Jesús aywaykarqan. Büqui ñöpanpa päsaykaqtanö 49 rikaykurmi discïpulunkuna alma kanqanta yarpar pasaypa mantsakar qayaräyarqan. 50 Tsaymi Jesús nirqan: “¡Kallpata tsariyay! ¡Noqami kaykä! ¡Ama mantsayämaytsu!”

51 Tsaynö nir büquiman yarkuskiptinmi wayrapis juklla wiyaskirqan. Tsaykunata rikarmi discïpulunkuna pasaypa mantsakashqa yarpachakuyarqan. 52 Atskaq runakunata qarananpä milagruta ruranqanta rikarpis shonqunkuna chukruyashqa kaptinmi tantiyakuyarqantsu Jesús munayyuq kanqanta.

53 Qochata tsimpaskirnami Genesaret pampaman chaykur büquita watayarqan. 54 Büquipita yarpuskiptinnami runakuna Jesústa reqiskir 55 maytsaypapis cörrilla aywar Jesús tsaycho kaykanqanta willakuyarqan. Tsayta musyaskirmi maytsaypitapis qeshyaykaqkunata kirmawan apayämurqan. 56 Tsaypita markakunapa y jallqakunapapis Jesús puriptinmi nänikunamanpis qeshyaykaqkunata apayarqan. Tsaypa päsaptinmi rugakuyarqan latsapanpa kuchullantapis qeshyaqkuna yataykuyänanpä. Tsaychömi llapanpis yataq kaqkunaqa alliyäyarqan.