Jesústa Satanás tentayta munanqan
4
Bautizakuskir Espíritu Santupa munaynincho Jesús kaptinmi Jordán mayupita tsunyaq jirkaman Espíritu Santu pusharqan. 2 Tsaycho chusku chunka (40) junaq kaykaptinmi diablu tentarqan. Tsay junaqkunaqa imatapis mana mikushqa karmi Jesús pasaypa mallaqarqan.3 Tsaymi diablu nirqan: “Diospa Tsurin karqa mä kay rumita tantaman tikratsiy”.
4 Jesúsnami nirqan: “Tayta Diospa palabrancho kaynömi qellqaraykan: ‘Manami tantata mikullartsu runa kawan, [sinöqa Tayta Dios llapan ninqankunata cäsukurmi]’ ”.†
5 Tsaypitanami altunnin jirkaman diablu pushaykur maytsay nacionkunata raslla rikaskatsir 6 nirqan: “Llapan rikanqayki nacionkunata y tsaycho kaykaq riquëzakunata qamtami qarashayki. Tsaykuna noqapa kaptinmi munanqä kaqta pitapis qaraykushä. 7 Qonqurikuykur adoramaptikiqa llapan rikanqaykikunatami qarashayki”.
8 Jesúsnami nirqan: “[¡Witikuy, Satanás!] Tayta Diospa palabrancho kaynömi qellqaraykan: ‘Tayta Diosllatami adorayanki. Pay japallantami sirviyanki’ ”.†
9 Tsaypitanami Jerusalénman Jesústa diablu pusharqan. Tsaychönami templupa mas altunninman ichiykatsir nirqan: “Diospa Tsurin karqa mä kaypita jeqarpuy. 10 Diospa palabrancho kaynömi qellqaraykan: ‘Angelninkunatami Tayta Dios kachamunqa imapitapis tsapäyäshunaykipä. 11 Paykunami tsariyäshunki ni chakillaykitapis rumikunacho mana takakunaykipä’ ”.†
12 Jesúsnami nirqan: “Tsaynöpis Tayta Diospa palabrancho kaynömi nin: ‘Tayta Diosta ama tentankitsu’ ”.†
13 Jesústa tentayta mana kamäpakurmi diablu aywakurqan yapaychöna kutimuyta yarpar.
El Diablo Tienta a Jesús
Galileacho Jesús willakur qallaykunqan
14 Tsaypitanami Espíritu Santupa munayninwan Galileaman Jesús kutirqan. Tsay markakunachömi Jesús alli yachatsikuq kanqanta runakuna parlayaq. 15 Sinagögakunacho yachatsiptinmi payta alabarnin niyaq: “¡Payqa shumaqmi yachatsikun!”
Nazaret markacho Jesús willakunqan
16 Tsaypitanami markan Nazaretman Jesús kutiykur costumbrinkunamannö jamay junaqcho sinagögaman aywarqan. Tsaychömi Tayta Diospa palabranta liyimunanpä runakunapa puntanman ichirqan. 17 Profëta Isaías qellqanqan rölluta makyayaptinmi liyiyta munanqanta tariskir kaynö liyirqan:
18 “Tayta Diosmi Espïritunta noqaman kachamushqa.
Paymi akramashqa muchuqkunata alli willakuyninta willanäpä.
Tsaynöpis kachamashqa [llakishqa kawaqkunata shakyätsinäpä,]
juklä nacionman prësu aywaqkuna librina kayanqanta willanäpä,
qaprakunapa ñawinta alliyätsinäpä,
chikiqninkunapa munaynincho ñakaykaq runakunata jipinäpä
19 y Tayta Dios salvananpä kaq tiempu chämunqanta willakunäpä”.†
20 Tsaynö liyiskirnami rölluta wankurkur sinagögacho yanapakuq runata kutiykatsirqan. Jamaskiptinnami tsaycho kaykaq runakuna payta rikaräyarqan. 21 Tsaymi Jesús nirqan: “Liyimunqächo ninqannömi kanan cumplishqana kaykan”.
22 Tsaynö niptinmi llapan runakuna kushikurnin niyarqan: “¡Payqa shumaqmi parlan! ¿Manaku Josépa tsurin kaykan?”
23 Jesúsnami nirqan: “ ‘Jampikuq karqa kikikirä jampikuy’ niyanqannömi qamkunaqa munaykäyanki Capernaúmcho milagruta ruranqänö kay markantsikchöpis milagruta ruranäta”.
24 Nirkurnami nirqan: “Rasunpaypami nï: Manami ni mayqan profëtatapis markanchöqa chaskiyantsu. 25 Rasunpaypami nï: Profëta Elías kawanqan witsan kimsa wata soqta killa mana tamyaptin maytsay Israel markakunacho pasaypami muchuy karqan. Tsay witsanqa Israel nacioncho atska viüdakunami kayarqan. 26 Tayta Dios manami Israelcho mayqan viüdamanpis Elíasta kacharqantsu sinöqa Sidóncho kaq Sarepta markacho taq viüdallata yanapananpämi kacharqan.
27 “Profëta Eliseo kawanqan witsanpis Israelcho lepra qeshyawan atskaqmi qeshyaykäyarqan. Tsaynö kayaptinpis manami mayqantapis Eliseo alliyätsirqantsu, tsaypa rantinqa Siria nacionpita Naamánllatami alliyätsirqan”.
28 Jesús tsaynö niptinmi sinagögacho kaykaq runakuna pasaypa ajanäyarqan. 29 Tsaymi Jesústa markapita jipiskir marka kuchun tunaman apayarqan tsaypita tanqariyänanpä. 30 Tsaynö apaykäyaptinmi Jesúsqa runakunapa chawpinkunapita aywakurqan.
Jesús Proclama el Cumplimiento de las Escrituras
Supay löcuyätsinqan runata Jesús alliyätsinqan
31 Tsaypitanami Galileacho Capernaúm markaman Jesús aywarqan. Tsaychömi cada jamay junaq runakunata yachatsirqan. 32 Shumaq yachatsinqanta wiyarmi runakuna almirashqa niyarqan: “¡Payqa munayyuq karmi shumaq yachatsimantsik!”
33 Tsay sinagögachömi supay löcuyätsinqan runa kaykarqan. Paymi qayarar nirqan: 34 “¡Nazaretpita Jesús, [kaypita aywakuy]! ¿Imatatä noqakunawan munanki? ¿Ushakätsiyämänaykipäku shamushqayki? ¡Musyämi Tayta Dios kachamunqan santu runa kanqaykita!”
35 Tsaymi supayta ollqutupar Jesús nirqan: “¡Upälla kay runapita yarquy!”
Tsaynö niptinmi llapan runakunapa ñöpancho tsay runata tsapiskir aywakurqan. Tsapirpis manami däñarqantsu. 36 Tsayta rikaykurmi jukninpis jukninpis mantsakashqa niyarqan: “¡Imatanatä rikantsik! ¡Munayninwan niptinmi supaykunapis cäsukur aywakuyan!”
37 Supayta qarqunqanta musyaykurmi entëru Galileacho Jesús munayyuq kanqanta parlayaq.
Pedrupa suegranta Jesús alliyätsinqan
38 Sinagögapita yarquskirnami Simónpa wayinman Jesús aywarqan. Chänanpä Simónpa suegran fiebriwan antsa qeshyaptinmi Jesústa rugakuyarqan alliyätsinanpä. 39 Tsaymi qeshyaykaqman witiykur tsay fiebrita ollqutupaptin jinan höra alliyaskirqan. Alliyaskirnami paykunata mikuyta qararqan.
Atskaq qeshyaykaqkunata Jesús alliyätsinqan
40 Rupay jeqaykaptinnami imaykaläya qeshyawan qeshyaykaqkunata Jesúsman apayämurqan. Tsaymi yataykuptillan qeshyaykaqkuna alliyäyarqan. 41 Wakin qeshyaykaqkunapitanami supaykuna yarqurnin qayarar niyarqan: “¡Qamqa Diospa Tsurinmi kanki!”
Tayta Dios kachamunqan Cristo kanqanta supaykuna niyaptinmi mana parlayänanpä Jesús ollqutuparqan.
Jesús willakur purinqan
42 Patsa waraskiptinnami tsunyaqman Jesús aywakurqan. Tsaymi runakuna ashirnin pay kaykanqan kaqman chaykur rugayarqan paykunapita mana aywakunanpä. 43 Tsaymi Jesús nirqan: “Tayta Diospa mandakuyninpa alli willakuyninta wakin markakunachöpis willakunämi kaykan. Tsaypämi Tayta Dios kachamashqa”.
44 Tsaypitanami Israelcho maytsay markakunapa purira sinagögakunacho Tayta Diospa willakuyninta Jesús willakurqan.