Jesústa Satanás tentayta munanqan
4
Tsaypitanami Jesústa Espíritu Santu tsunyaq jirkaman pusharqan diablu tentananpä.† 2 Tsaycho chusku chunka (40) junaq y chusku chunka paqas ayunaskirnami Jesús wanunayparä mallaqaskirqan. 3 Tsaymi diablu chaykur nirqan: “Diospa Tsurin karqa mä kay rumikunata tantaman tikratsiy”.4 Jesúsnami nirqan: “Tayta Diospa palabrancho kaynömi qellqaraykan: ‘Manami tantata mikullartsu runa kawan, sinöqa Tayta Dios llapan ninqankunata cäsukurmi’ ”.†
5 Tsaypitanami sagrädu Jerusalén markaman Jesústa diablu pusharqan. Tsaychönami templupa mas altunninman ichiykatsir 6 nirqan: “Diospa tsurin karqa mä kaypita jeqarpuy. Diospa palabrancho kaynömi qellqaraykan: ‘Angelninkunatami Tayta Dios kachamunqa imapitapis tsapäyäshunaykipä. Paykunami tsariyäshunki chakillaykitapis rumikunacho mana takakunaykipä’ ”.†
7 Jesúsnami nirqan: “Tsaynöpis Tayta Diospa palabrancho kaynömi qellqaraykan: ‘Tayta Diosta ama tentankitsu’ ”.†
8 Tsaypitanami altunnin jirkaman diablu pushaykur maytsay nacionkunata riquëzankunatawan rikatsir 9 nirqan: “Qonqurikuykur adoramaptikiqa llapan rikanqaykikunatami qarashayki”.
10 Jesúsnami nirqan: “¡Witikuy, Satanás! Tayta Diospa palabrancho kaynömi qellqaraykan: ‘Tayta Diosllatami adorayanki. Pay japallantami sirviyanki’ ”.†
11 Tsaynö niptinmi diablu aywakurqan. Tsaypitanami angelkuna chaykur Jesústa yanapayarqan.
Galileacho willakur Jesús qallanqan
12 Carcelcho Juan wichqaraykanqanta musyaskirmi† Galileaman Jesús kutirqan. 13 Nazaret markacho tänanpa trokinqa Capernaúm markacho tänanpämi aywarqan. Tsay markaqa karqan Galilea qocha kuchuncho y Zabulón y Neftalí trïbu runakuna täyanqan kaqchömi. 14 Capernaúmcho Jesús tarmi profëta Isaías kaynö willakunqanta cumplirqan:
15 “Zabulón trïbu y Neftalí trïbu runakuna,
qamkuna täyanqaykipami lamar kuchunpa y Jordán mayu wak tsimpanpa näni päsaykan.
Mana Israel runakunapis qamkuna täyanqaykicho atskaqmi täyan.
16 Tsakäpakushqanö kawarpis atsikyayta rikaqnömi salvayäshuqnikita rikayanki.
Tsakaykaqchönö kawayaptikipis salvayäshuqnikiqa aktsinömi kanqa”.†
17 Capernaúmcho tarmi willakuyta qallaykur Jesús nirqan: “¡Tayta Diospa mandakuynin chämushqanami! ¡Jutsaykikunata kacharir Tayta Dios munanqannöna kawayay!”†
Discïpulun kayänanpä pescaqkunata Jesús qayanqan
18 Galilea qocha kuchunpa aywaykanqanchömi ishkaq runakunata Jesús rikarqan. Pescädu tsariq karmi mällankunata yakuman jitaykäyarqan. Paykunami kayarqan Simón y wawqin Andrés. Simónpa jukaq jutinmi karqan Pedro. 19 Paykunatami Jesús nirqan: “Qatiyämay. Noqami yachatsiyäshayki runakunata pescayänaykipä”.
20 Tsaynö niptinmi mällankunata kachaskir Jesúswan aywayarqan.
21 Tsaypita päsaskirnami Santiaguta y wawqin Juanta rikarqan. Paykunaqa taytan Zebedeuwanmi büquincho mällankunata shillpaykäyarqan. Paykunapis Jesús qayaptinmi 22 taytanta y büquita jaqiskir jinan höra aywayarqan.
Qeshyaykaqkunata Jesús alliyätsinqan
23 Llapan Galileapa Jesús purirmi Tayta Diospa mandakuyninpa alli willakuyninta sinagögakunacho yachatsirqan y tukuyläya qeshyawan qeshyaqkunatami alliyätsirqan.† 24 Tsaytami Siria nación markakunachöpis musyayarqan. Tsaymi paykunapis Jesús kaqman apapäyarqan tukuyläya qeshyawan qeshyaykaqkunata, supay ñakatsinqan runakunata, wanuy qeshyawan ñakaqkunata y pullan cuerpun wanushqa runakunatapis. Tsay llapan qeshyaqkunatami Jesús alliyätsirqan.
25 Atskaqmi Jesústa qatiräyarqan. Tsay runakunami kayarqan Galileapita, Decápolispita, Jerusalénpita, Judeapita y Jordán mayu wak tsimpanpitapis.