Bautizaq Juan willakunqan
3
Tsay watakunami Judea provincia tsunyaq jirkacho Bautizaq Juan willakur 2 nirqan: “¡Tayta Diospa mandakuynin chämushqanami! ¡Jutsa rurayta kacharir Tayta Dios munanqannöna kawayay!”†3 Tsaynö willakunanpämi profëta Isaías qellqanqancho nin:
“Juk runami tsunyaq jirkacho qayakuypa willakur nin:
‘Tayta Dios shamunanpä nänita allitsayay.
Wenqu nänikunata derechayay’ ”.†
4 Juanpa latsapanqa camëllupa aqtsanpita awashqami karqan. Wachukunpis camëllupa qaranpita rurashqami karqan.† Mikuyninpis chukllushkuna y abëjapa mishkinmi karqan.
5 Juan willakunqanta wiyayänanpämi Jerusalénpita, Judeapita y Jordán mayu kinran markakunapita runakuna aywayarqan. 6 Tayta Diosta perdonta mañakuyaptinmi Jordán mayucho tsay runakunata Juan bautizarqan.
7 Tsayman atskaq fariseukuna y saduceukuna bautizakuq chäyanqanta rikarmi Juan nirqan: “¡Culebra casta runakuna!† ¡Pitä qamkunata niyäshushqayki Tayta Diospa castïgunpita qeshpiyänaykipä kanqanta! 8 Jutsaykikunata rasunpaypa kacharishqa karqa Tayta Dios munanqannöna kawayay. 9 Ama yarpäyaytsu Abrahampa castan kayanqaykipita† Tayta Dios salvayäshunaykipä kanqanta. Noqami nï: Tayta Dios munarqa kay rumikunatapis Abrahampa castanmanmi tikratsinman. 10 Mana wayuq jachakunata michinpitaa muturir ninaman jitaqnömi jutsa ruraqkunata castigananpä Tayta Dios kamarikushqana kaykan.†
11 “Jutsa rurayta kacharir Tayta Dios munanqannö kawayänaykipämi yakuwan bautizä. Qepäta shamuq kaqmi itsanqa Espíritu Santuwan y ninawan bautizayäshunki. Noqapita mas munayyuq kaptinmi llanqinta apanalläpäpis välïtsu. 12 Trïguta wayrananpä jurquitan aptashqanami kaykan. Wayraskirnami trïguta wayinman churanqa. Päjantanami imaypis mana upiq ninaman qaykunqa”.
Jesústa Juan bautizanqan
13 Juan bautizananpämi Jesúspis Galileapita Jordán mayuman aywarqan. 14 Chaykuptinmi bautizayta mana munar Juan nirqan: “Tayta, manami qamta bautizämantsu, tsaypa trokinqa noqatami bautizamankiman”.
15 Jesúsnami nirqan: “Imanö kaptinpis bautizamay. Bautizamänaykitami Tayta Dios munan”.