San Juan
Jesucristupä qellqanqan
Dios kaykar kay patsaman Jesucristo shamunqan
1
Imapis manarä kaptinmi Diospa Palabran kaykarqanna.Tayta Dioswanmi payqa kaykarqan.
Payqa Diosmi.
2 Qallaykunanpitami Tayta Dioswan kaykarqan.
3 Paywanmi llapan imaykatapis Tayta Dios kamarqan.
Kay patsacho kaqkunaqa llapanpis pay kamanqanmi.†
4 Paychömi mana ushakaq kaway.
Tsay kawayqa runakunapä aktsimi.
5 Tsay aktsiqa tsakaychöpis pasaypami atsikyan.
Tsakaypis tsay aktsita manami upitsintsu.
6 Juk runami Juan jutiyuq karqan.† Paytami Tayta Dios kacharqan 7 willakuptin llapan runakuna tsay aktsiman criyiyänanpä. 8 Juanqa manami tsay aktsitsu karqan, sinöqa tsay aktsipä willakuqllami.
9 Rasunpaypa kaq aktsiqa llapan runakunatami aktsipan.
Payqa kay patsamanmi shamurqan.
10 Kay patsacho kaykaptinpis y kay patsata kikin kamashqa kaykaptinpis runakuna manami payta reqiyarqantsu.
11 Kuyanqan runakunaman shamuptinpis manami chaskiyarqantsu.
12 Payman yärakur chaskikuqkunatami itsanqa wamrankuna kayänanpä Tayta Dios legitimakun.
13 Manami mamanpita yuriyanqanpitatsu
ni runapa tsurin kayanqanpitatsu Tayta Diospa wamran kayan,
tsaypa trokinqa Tayta Diospita yurishqa karmi.
14 Diospa Palabran kay patsaman shamurmi runanö yurirqan.
Noqakunawanmi kay patsacho purirqan.
Tayta Diospa japallan Tsurin kaptinmi munayyuq kaykaqta rikayarqä.
Kuyapäkuq y rasun kaqta parlaqmi karqan.
15 Paypämi Juan willakur nirqan: “Tsay runapämi noqa nirqä: Qepäta shamuqqa noqapita mas munayyuqmi. Payqa manarä yuriptïmi kaykarqanna”.
16 Payqa pasaypa kuyakuq karmi llapantsikta imaypis kuyamantsik.
17 Leyninkunataqa Moiséswanmi Tayta Dios willakatsirqan.
Kuyapäkuyninta y rasunpa kaq willakuynintami itsanqa Jesucristuwan tantiyatsimashqantsik.
18 Manami pipis Tayta Diosta imaypis rikashqatsu.
Japallan Tsurinmi itsanqa, Dios kar y Tayta Dioswan jukllaylla kar, Tayta Dios imanö kanqanta musyatsimashqantsik.†
Bautizaq Juan willakunqan
19 Juan pï kanqantapis tapuyämunanpämi sacerdötikunatawan levitakunata Jerusalén autoridäkuna kachayarqan. Tapuyaptinmi Juan nirqan: 20 “Rasun kaqtami nï: Noqa manami Cristutsu kaykä”.
21 Tsaymi yapay tapuyarqan: “Tsaynö kaptinqa ¿pitä kaykanki? ¿Profëta Elíasku?”†
Juannami nirqan: “Manami Elíastsu kä”.
“Tsayöraqa ¿shamuqpä kaq profëtaku kaykanki?”†
Niyaptinmi nirqan: “Manami tsay profëtatsu kä”.
22 Tsaymi niyarqan: “Tsaynö kaptinqa ¿pitä kanki? Kachamaqnïkunata willayänäpä pï kanqaykitapis willayämay”.
23 Juannami nirqan: “Profëta Isaías qellqanqanchömi nin: ‘Juk runami tsunyaq jirkacho qayakuypa willakur nin: “Tayta Dios shamunanpä wenqu nänita derechayay” ’. Tsay willakuq runaqa noqami kaykä”.†
24 Kachayanqan fariseukunami 25 Juanta niyarqan: “Cristupis ni Elíaspis ni shamuqpä kaq profëtapis mana kaykarqa ¿imanirtä runakunata bautizaykanki?”
26 Juannami nirqan: “Noqaqa yakullawanmi bautizä. Tsaynö kaptinpis kaychönami mana reqiyanqayki runapis kaykan. 27 Paymi [noqapita mas ñöpata karpis] qepätarä shamunqa. Noqaqa llanqi watunta paskanalläpäpis manami välïtsu”.
28 Jordán mayu tsimpan Betaniacho runakunata bautizaykaptinmi Juanta tsaynö tapuyarqan.
Jesús shamuykaqta Bautizaq Juan rikanqan
29 Tsaypita waraynin junaq Jesús shamuykaqta rikaskirmi Juan nirqan: “¡Paymi Tayta Dios kachamunqan Carnish kaykan! Paymi runakunata jutsankunapita perdonanqa. 30 Tsay runapämi noqa nirqä: ‘Qepäta shamuqqa noqapita mas munayyuqmi. Payqa manarä yuriptïmi kaykarqanna’. 31 Noqapis manami musyarqätsu Tayta Dios kachamunqan pay kanqanta. Tsaynö kaptinpis Israel runakuna payta reqiyänanpämi runakunata bautizaykä”.
32 Mastami Juan nirqan: “Noqami rikarqä imayka palumanö Espíritu Santu ciëlupita payman urämuqta. 33 Manarä tsayta rikar manami musyarqätsu Tayta Dios kachamunqan kanqanta. Itsanqa yakuwan bautizanäpä kachamarmi Tayta Dios nimarqan: ‘Mayqan runapa jananmanpis Espíritu Santu palumanö rataqta rikarmi musyanki Espíritu Santuwan bautizananpä kanqanta’. 34 Tsay nimanqannöllami tsay runapa jananman Espíritu Santu palumanö rataqta rikashqä. Tsaymi qamkunata willä Tayta Diospa Tsurin kanqanta”.
Punta kaq discïpulunkunata Jesús akranqan
35 Tsaypita waraynin junaqmi ishkay discïpulunkunawan Juan kaykarqan. 36 Jesús päsaykaqta rikaskirmi nirqan: “¡Rikayay! ¡Tayta Dios kachamunqan Carnishmi päsaykan!”
37 Tsaynö ninqanta wiyarmi Juanpa ishkay discïpulunkuna Jesúspa qepanta aywayarqan. 38 Tikraykunqanchömi qepanta paykuna aywaykäyaqta Jesús rikarqan. Tsaymi nirqan: “¿Pitatä ashiykäyanki?”
Paykunanami niyarqan: “Rabí, ¿maychötä patsakushqayki?”
(Rabíqa yachatsikuq ninanmi.)
39 Jesúsnami nirqan: “Aku, reqitsiyäshayki”.
Tsaynö nir pusharmi maycho patsakunqantapis reqitsirqan. Tardiyaykaptinnami tsay ishkay discïpulukuna tsayllachöna Jesúswan quëdakuyarqan.
40 Tsay ishkay discïpulunpita jukaqmi karqan Simón Pedrupa wawqin Andrés. Paymi Juan ninqanta wiyar Jesúspa qepanta aywarqan. 41 Nirkurnami Andrés aywarqan wawqin Simón kaqman. Chaykurmi willarqan: “¡Mesíaswanmi tinkuyashqä!” nir.
(Mesíasqa Tayta Dios kachamunqan Cristumi.)
42 Tsaypitanami Jesús kaqman pusharqan. Chaykuptinnami Simónta rikaykur Jesús nirqan: “Qamqa Jonáspa tsurin Simónmi kaykanki. Kananpitaqa Cefasnami jutiki kanqa”.
(Cefasqa Pedro ninanmi.a)
Felipita y Natanaelta Jesús qayanqan
43 Tsaypita waraynin junaq Galileaman aywaykanqanchömi Felipita tariskir Jesús nirqan: “Aku aywashun”.
44 Felipiqa Betsaida markapitami karqan. Andréswan Pedrupis tsay markallapitami kayarqan. 45 Tsaymi Natanaelman aywaykur Felipe nirqan: “¡Moisés y wakin profëtakunapis Cristo shamunanpä qellqayanqannöllami shamushqa! ¡Paywanmi tinkuyashqä! ¡Payqa Josépa tsurin Nazaret markapita Jesúsmi!”
46 Natanaelnami nirqan: “Nazaretpita ¿pillaqa alli runa kanmantsurä?”
Felipinami nirqan: “Rikanaykipä aku aywashun”.
47 Natanael chaykaqta rikaykurmi Jesús nirqan: “Kay runami itsanqa rasunpaypa Israel runa. Payqa manami llullakuntsu”.
48 Tsaynö niptinnami Natanael tapurqan: “¿Imanöpatä reqimashqayki?”
Jesúsnami nirqan: “Felipe manarä qayashuptikimi hïgus jacha chakincho jamaraykaqta rikashqä”.b
49 Tsaynö niptinmi Natanael nirqan: “Rabí, ¡qamqa Tayta Diospa Tsurinmi kaykanki!† ¡Israel runakunapa mandaqnin reymi kaykanki!”
50 Jesúsnami nirqan: “¿‘Hïgus jacha chakincho jamaraykaqta rikashqä’ ninqäpitaku tsaynö nimanki? Tsaypita mas mantsakaypä kaqkunatami rikanki”.
51 Tsaypitanami Jesús nirqan: “Rasunpaypami nï: [Kananpitaqa] ciëlu punku kichakämuptin Tayta Diospa angelninkuna Runapa Tsurinman uraykämuqta y kutiykaqtami rikayanki”.†