2 profëta Isaías qellqarqan. Tsay qellqanqanchömi nin:

4 Isaías qellqanqannöllami tsunyaq jirkacho Juan bautizar runakunata nirqan: “Tayta Dios perdonayäshunaykipä jutsaykikunata kacharir bautizakuyay”.

5 Juan willakunqanta wiyayänanpämi Judea provinciapita y Jerusalénpita llapan runakuna aywayarqan. Tayta Diosta perdonta mañakuyaptinmi Jordán mayucho tsay runakunata Juan bautizarqan.

6 Juanpa latsapanqa camëllupa aqtsanpita awashqami karqan. Wachukunpis camëllupa qaranpita rurashqami karqan.^† Chukllushkunata y abëjapa mishkintami mikurqan.

7 Willakurmi nirqan: “Qepäta shamuq kaqmi noqapita mas munayyuq kaykan. Paypa llanqi watunta paskanalläpäpis manami välïtsu. 8 Noqaqa yakullawanmi bautizä. Paymi itsanqa Espíritu Santuwan bautizayäshunki”.

9 Tsay witsanmi Galileacho kaykaq Nazaretpita Juan bautizaykanqan kaqman Jesús aywarqan. Chaykuptinmi paytapis Jordán mayucho Juan bautizarqan. 10 Yakupita yarqurmi Jesús rikarqan ciëlu kichakaskiptin Espíritu Santu imayka palumanö payman uraykämuqta. 11 Tsay hörami ciëlupita Tayta Dios nimurqan: “Qammi kuyay tsurï kanki. Qampitami kushikü”.^†

12 Tsaypitanami Jesústa Espíritu Santu tsunyaq jirkaman pusharqan. 13 Chusku chunka (40) junaq munti uywakuna kayanqancho kaykaptinmi Satanás tentarqan. Angelkunami Jesústa yanapayarqan.

14 Juan carcelcho wichqaraykaptinnami Galileaman Jesús kutirqan. Tsaychömi Tayta Diospa mandakuyninpä alli willakuyta willakur

15 nirqan: “¡Awninqankunata Tayta Dios cumplishqanami! ¡Tayta Diospa mandakuynin chämushqanami! ¡Jutsaykikunata kacharir Tayta Diospa alli willakuyninta chaskikuyay!”

16 Galilea qocha kuchunpa aywaykanqanchömi Simónta y wawqin Andrésta Jesús rikarqan. Paykunaqa pescädu tsariq karmi mällankunata yakuman jitaykäyarqan. 17 Paykunatami Jesús nirqan: “Qatiyämay. Noqami yachatsiyäshayki runakunata pescayänaykipä”.

18 Tsaynö niptinmi mällankunata kachaskir Jesúswan aywayarqan.

19 Tsaypita mas washaqläninta aywaykarnami Zebedeupa tsurin Santiaguta y wawqin Juanta rikarqan. Paykunami büquincho mällankunata shillpaykäyarqan. 20 Paykunatapis qayaptinmi jinan höra aywayarqan taytan Zebedeuta y peonninkunata büquicho jaqiskir.

21 Tsaypitanami Capernaúm markaman discïpulunkunawan Jesús aywayarqan. Jamay junaqnami sinagögaman yaykur yachatsir qallaykurqan. 22 Yachatsiptinmi runakuna pasaypa almirakuyarqan. Manami ley yachatsiq runakunanötsu yachatsirqan, sinöqa mas munayyuq karmi shumaq yachatsirqan.

23 Tsay sinagögachömi supay löcuyätsinqan runa kaykarqan. Paymi qayarar 24 nirqan: “[¡Waauuu!] ¡Nazaretpita Jesús! ¿Imatatä noqakunawan munanki? ¿Ushakätsiyämänaykipäku shamushqayki? ¡Musyämi Tayta Dios kachamunqan santu runa kanqaykita!”

25 Tsaymi supayta ollqutupar Jesús nirqan: “¡Upälla kay runapita yarquy!”

26 Tsaynö niptinmi tsay runata tsapiskir pasaypa qayarar supay aywakurqan. 27 Tsayta rikaykurmi jukninpis jukninpis mantsakashqa niyarqan: “¡Imatanatä rikantsik! ¡Munayninwan niptinmi supaykunapis cäsukur aywakuyan! ¡Pay yachatsinqannöqa manami pipis yachatsintsu!”

28 Supayta qarqunqanta musyaykurmi entëru Galileacho Jesús munayyuq kanqanta parlayaq.

29 Sinagögapita Jesús yarqurnami Santiaguta y Juanta pushakurkur Simónpa y Andréspa wayinman aywayarqan. 30 Chaykuyaptinmi Simónpa suegran fiebriwan antsa ujuraykanqanta willayarqan. 31 Tsaymi qeshyaykanqan kaqman Jesús yaykuskir makipita shäritsiptin jinan höra alliyaskirqan. Alliyaskirnami paykunata mikuyta qararqan.

32 Patsa tsakaykaptinnami llapan qeshyaykaqkunata y supaykuna ñakatsinqan runakunatapis Jesúsman apayämurqan. 33 Tsay markacho llapan runakunami Jesús kaykanqan wayi punkuman qorikäyarqan. 34 Tsaychömi imaykaläya qeshyawan qeshyaykaqkunata Jesús alliyätsirqan. Tsaynöllami atskaq runakunapita supaykunatapis qarqurqan. Pï kanqantapis supaykuna musyayaptinmi mana parlayänanpä Jesús ollqutuparqan.

35 Warayninnami Tayta Diosta mañakunanpä tsaka tsakalla tsunyaqman Jesús aywakurqan. 36 Tsaymi Jesústa watukaskir Simón y paywan kaykaqkuna ashir aywayarqan. 37 Tariskirnami niyarqan: “Taytay, llapanmi ashiykäyäshunki”.

38 Jesúsnami nirqan: “Tayta Diospa willakuyninta willakuq wakin markakunamanpis aywashun. Tsaypämi shamushqä”.

39 Tsaymi llapan Galileapa Jesús purirqan sinagögakunacho willakur y supaykunata runakunapita qarqur.^†

40 Juk kutichömi leprawan qeshyaykaq runa Jesúspa ñöpanman qonqurikuykur nirqan: “Taytay, munarninqa alliyaykatsillämay”.

41 Tsaynö rugakuptinmi kuyaparnin yataykur Jesús nirqan: “Alliyashqa kanaykitami munä”.

42 Tsaynö niptinmi jinan höra leprawan qeshyaykanqanpita alliyaskirqan. 43 Aywakunanpä niskirmi Jesús chunkapis nirqan: 44 “Alliyätsinqäta pitapis ama willankitsu, tsaypa trokinqa alliyanqaykita rikashunaykipä sacerdötiman ayway. Nirkur Moisés qellqanqancho ninqannölla purificakunaykipä ofrendaykita templuman apay. Tsaynöpami alliyanqaykita musyayanqa”.^†

45 Tsaynö nikaptinmi tsay runaqa Jesús alliyätsinqanta pïmayta willarqan. Tsaymi markamanpis Jesús yaykurqantsu, tsaypa trokinqa tsunyaqllachömi quëdakurqan. Tsaymanpis maytsaypitami runakuna aywayarqan.