Leprawan qeshyaykaqta Jesús alliyätsinqan
8
Jirkancho yachatsinqanpita Jesús urämuptinmi atskaq runakuna qatipäyarqan. 2 Tsaychömi leprawan qeshyaykaq runa Jesúspa ñöpanman qonqurikuykur nirqan: “Taytay, munarninqa alliyaykatsillämay”.3 Tsaynö rugakuptinmi yataykur Jesús nirqan: “Alliyashqa kanaykitami munä”.
Tsaynö niptinmi jinan höra alliyaskirqan. 4 Nirkurnami Jesús nirqan: “Alliyätsinqäta pitapis ama willankitsu, tsaypa trokinqa alliyanqaykita rikashunaykipä sacerdötiman ayway. Nirkur alliyanqaykita musyayänanpä Moisés qellqanqancho ninqannölla ofrendaykita templuman apay”.†
Capitanpa wätayninta Jesús alliyätsinqan
5 Capernaúm markaman Jesús chaykuptinmi Roma soldädukunapa capitannin rugakur 6 nirqan: “Taytay, wätaynïmi wayïcho qeshyar ujuraykan. Pasaypa antsa karmi kuyukuntsu. Jinchimi ñakaykan”.
7 Jesúsnami nirqan: “Alliyätsinäpä aywashun”.
8 Capitannami nirqan: “Taytay, mana Israel runa kaykaptïqa wayïman manami yaykunkimantsu. Kayllapita wätaynï alliyänanpä niykullay. 9 Noqapis mandamaqnïpa munayninchömi kaykä. Tsaynöllami soldädükunapis munaynïcho kayan. Mayqantapis ‘tsaypa ayway’ niptï aywanmi, ‘shamuy’ niptï shamunmi. Tsaynöllami wätaynïpis ‘kayta ruray’ niptï ruran”.
10 Tsayta wiyaykurmi Jesús kushikur paywan aywaykaq runakunata nirqan: “Rasunpaypami nï: Paynö yärakamaq runataqa Israel runakunachöpis manami tarishqätsu. 11 Qamkunatami nï: Maytsay nacionkunapitapis qorikaykurmi Tayta Diospa mandakuynincho Abrahamwan, Isaacwan y Jacobwan jamaykur mikuyanqa.† 12 Wakin runakunami itsanqa Tayta Diospa mandakuynincho kawayänanpä kanqanta yarparpis mantsaypä tsakayman qaykushqa kayanqa. Tsaychömi pasaypa waqar kirunkunatapis uchuyanqarä”.†
13 Capitantanami Jesús nirqan: “Wayikipa kutikuy. Yärakamanqaykinömi wätayniki alliyashqana”.
Tsay hörami capitanpa wätaynin alliyaskirqan.
Pedrupa suegranta Jesús alliyätsinqan
14 Tsaypitanami Pedrupa wayinman aywar Jesús tarirqan Pedrupa suegran fiebriwan qeshyaykaqta. 15 Tsaymi makinta yataykuptin jinan höra alliyaskir mikuyta qararqan.
Atskaq qeshyaykaqkunata Jesús alliyätsinqan
16 Patsa tsakaykaptinnami Jesúsman apayämurqan supaykuna ñakatsinqan atskaq runakunata. Tsay runakunapitami supaykunata juk shimilla Jesús qarqurqan. Tsaynöllami imaykaläya qeshyawan qeshyaqkunatapis alliyätsirqan. 17 Tsaynö alliyätsirmi profëta Isaías kaynö qellqanqanta cumplirqan:
“Paymi qeshyantsikkunata apakushqa.
Paymi nanaynintsikkunatapis jipishqa”.†
Qatirayta munaqkunata Jesús tantiyatsinqan
18 Atskaq runakuna juntapaykuyaptinmi discïpulunkunata Jesús nirqan: “Wak tsimpaman tsimpashun”.
19 Büquiman yaykuyänanpäna kaykäyaptinmi ley yachatsiq runa Jesústa nirqan: “Rabí, maypa aywaptikipis qatiräshaykimi”.
20 Jesúsnami nirqan: “Atuqkunapapis machayninkuna kanmi. Pishqukunapapis qeshunkuna kanmi. Runapa Tsurinpami itsanqa maycho pununallanpäpis kantsu”.
21 Juk discïpulunnami nirqan: “Taytay, qatiränäpä taytätarä puntata pampaskamushä”.
22 Jesúsnami nirqan: “Wanushqakunataqa wanushqa mayinkuna pampayätsun. Qamqa juklla qatimay”.
Wayrata y yakuta Jesús wiyätsinqan
23 Tsaypitanami büquiman Jesús yarkuptin discïpulunkunapis qepanta yarkuyarqan. 24 Qochata tsimpaykäyaptinmi Jesús punukaskirqan. Tsayyaqmi pasaypa wayrawan yaku pulchaqyar büquita jundikätsinanpäna kaykarqan. 25 Tsaymi discïpulunkuna Jesústa rikchatsir niyarqan: “¡Taytay, jundikaykantsiknachä! ¡Salvaykayällämay!”
26 Jesúsnami nirqan: “Yärakuyniynaq janan shonqu runakuna, ¿imanirtä mantsakashqa kaykäyanki?”
Niskirmi shäriskir wayratawan yakuta ollqutuparqan. Ollqutupaskiptinmi wayrawan yakupis wiyaskiyarqan. 27 Tsayta rikarmi discïpulunkuna mantsakashqa niyarqan: “Yakupis wayrapis tsaynö cäsunanpäqa ¡pinatä kay runaqa!”
Supaykuna löcuyätsiyanqan runakunata alliyätsinqan
28 Qochata tsimpaskirnami Gadara niyanqan partiman chäyarqan. Tsaychömi supaykuna löcuyätsiyanqan ishkay runakuna panteonpita yarqayämurqan. Paykuna pasaypa mantsaypä kayaptinmi tsaypaqa pipis päsayaqtsu. 29 Jesústa rikaskirmi jinchi qayarar niyarqan: “¡Diospa tsurin Jesús! ¡Imatatä noqakunawan munanki! ¿Manaräpis hörakuna chämuptinku ñakatsiyämänaykipä shamushqayki?”
30 Paykunapita mas washaläninchömi atska kuchikunata mitsiykäyarqan. 31 Tsaymi supaykuna Jesústa rugakur niyarqan: “Kay runakunapita qarqayämarqa taqay kuchikunallaman yaykuyänäpä kachaykayämay”.
32 Rugakuyanqanta Jesús awniptinmi supaykuna ishkan runakunapita yarquskir tsay kuchikunaman yaykuyarqan. Tsaymi kuchikuna löcuyar tunapa cörrir qochaman jeqarpuyarqan. Tsaychömi shenqaypa wanuyarqan.