Supaykuna löcuyätsinqan runata alliyätsinqan
5
Qochata tsimpaskirnami Gerasaa niyanqan partiman discïpulunkunawan Jesús chäyarqan.
Marcos 5.1-20
2 Büquipita Jesús yarpuskiptinmi supaykuna löcuyätsinqan runa panteonpita yarqamurqan. 3 Tsay runaqa panteonllachömi täkuq. Cadënawan watarpis manami watarätsiyta kamäpakuyaqtsu. 4 Chakipita makipita watayaptinpis cadënata rachirmi ushaq. Tsaymi pipis ima ruraytapis kamäpakuqtsu. 5 Tsay runaqa paqaspapis junaqpapis panteoncho y jirkakunachömi qayarar rumikunawan takakur puriq.
6 Paymi Jesústa rikaskir cörrilla aywarnin ñöpanman qonqurikuykur 7 jinchi nirqan: “¡Munayyuq Diospa Tsurin Jesús! ¡Imatatä noqawan munanki! ¡Diospa jutinchömi rugä! ¡Ama ñakatsillämaytsu!”
8 Tsaynö nirqan “¡supay, kay runapita yarquy!” Jesús nishqa kaptinmi.
9 Tsaypitanami Jesús tapurqan: “¿Imatä jutiki?”
Niptinmi nirqan: “Noqapa jutïqa Legiónmi.b Noqakunaqa atskaqmi kayä”.
10 Karuman mana qarqunanpämi supaykuna pasaypa rugakuyarqan. 11 Washalänin jirkanchömi atska kuchikunata mitsiykäyarqan. 12 Tsaymi supaykuna Jesústa rugakur niyarqan: “Kuchikunallaman yaykuyänäpä kachaykayämay”.
13 Rugakuyanqanta Jesús awniptinmi runapita yarquskir tsay kuchikunaman supaykuna yaykuskiyarqan. Tsay kuchikunaqa ishkay waranqanömi (2,000) kayarqan. Tsaymi kuchikuna tunapa cörrir qochaman jeqarpur shenqaypa wanuyarqan.
14 Tsayta rikaykurmi kuchi mitsiqkuna cörrilla aywar markacho taq y cercancho taq runakunata willayarqan. Willayaptinmi runakuna ima päsanqantapis rikayänanpä aywayarqan. 15 Jesús kaqman chaykurmi tariyarqan tsay löcuyashqa runata latsapan jatishqata y juiciunchöna jamaraykaqta. Tsayta rikaykurmi pasaypa mantsakäyarqan.
16 Jesús alliyätsinqanta rikaqkunami willayarqan tsay runa imanö alliyanqanta y kuchikuna shenqaypa wanuyanqanta. 17 Tsaymi runakuna Jesústa rugayarqan tsaypita aywakunanpä.
18 Büquiman Jesús yarkurkuptinmi alliyätsinqan runa Jesústa rugarqan paywan aywakunanpä. 19 Rugaptinpis mana awnirmi Jesús nirqan: “Wayikipa kutir castaykikunata willay Tayta Dios kuyapäshurniki alliyätsishunqaykita”.
20 Tsaynami kutikur patsan Decápolis provinciacho willakurqan Jesús alliyätsinqanta. Tsaynö willakuptinmi wiyaqkuna kushikuyarqan.
Jairupa tsurinta kawatsinqan y warmita alliyätsinqan
21 Tsaypitanami qocha wak tsimpanman büquiwan Jesús yapay kutirqan. Qocha kuchuncho kaykaptinmi atskaq runakuna qorikäyarqan.
Marcos 5.21-43
22 Tsaymanmi sinagögacho mandaq Jairo jutiyuq runa charqan. Paymi Jesúspa ñöpanman qonqurikuykur 23 rugakur nirqan: “Taytay, warmi tsurïmi wanuykanna. Aywaykulläshun. Yataykuptikiqa alliyanqami”.
24 Tsaynö rugakuptinmi Jairuwan Jesús aywarqan. Aywaptinmi atskaq runakuna kichkiyparä qatiyarqan. 25 Tsay runakunawanmi chunka ishkay watana yawar apaywan qeshyaykaq warmipis aywarqan. 26 Tsay qeshyawan pasaypa ñakarmi mëdicukunata pägananpä imaykantapis rantikur usharqan. Imaykawan jampiyaptinpis mas peormi antsarqan.
27 Jesús munayyuq kanqanta musyarmi atskaq runakuna kaykaptinpis tsay warmi qepallanpa witiykur Jesúspa latsapanta yataykurqan. 28 Jesúspa latsapallantapis yataykur alliyänanpä kanqanta yarparmi tsaynö rurarqan. 29 Yataykuptinmi jinan höra yawar apaynin alliyaskirqan. Tsaymi tantiyarqan alliyaskinqanta.
30 Munayninwan pipis alliyanqanta musyarmi tumaykur Jesús nirqan: “¿Pitä latsapäta yatamushqa?”
31 Discïpulunkunanami niyarqan: “Taytay, kayläya kichki aywaykarqa ¿imanöpatä musyayäman mayqan yatashunqaykitapis?”
32 Tsaynö niyaptinmi Jesús rikachakurqan pï yatanqantapis musyananpä. 33 Tsaymi tsay warmi mantsariywan tsuktsukyar Jesúspa ñöpanman qonqurikuykurqan. Nirkurmi latsapanta yataykullar alliyanqanta willarqan. 34 Jesúsnami nirqan: “Hïja, yärakamanqaykipitami alliyashqayki. Kananqa kushishqana aywakuy”.
35 Jesús tsaynö parlaykaptinmi Jairupa wayinpita willakuqkuna chaykur Jairuta niyarqan: “Taytay, tsurikiqa wanushqanami. Amana Jesústa pushaynatsu”.
36 Tsaynö niqta wiyaykurmi Jesús nirqan: “Ama llakikuytsu. Tayta Diosman yärakuy”.
37 Tsaynö nirmi Pedruta, Santiaguta y Santiagupa wawqin Juanta pushakurkur Jairupa wayinman Jesús aywarqan. Wakinkuna aywayänantaqa manami munarqantsu. 38 Chaykurnami runakuna pasaypa llakikur waqaykäyaqta tarirqan. 39 Tsaymi Jesús yaykuskir nirqan: “¿Imanirtä tsayjinanpa waqaykäyanki? Wamraqa manami wanushqatsu; punuykanllami”.
40 Tsaynö niptinmi asipäyarqan. Tsaypitanami llapan runakunata waqtaman qarquskir Jairuta, warminta y paywan kaykaq discïpulunkunata pushakurkur wamra sutaraykanqanman Jesús yaykurqan. 41 Tsaychömi makinpita aptarkur wamrata nirqan: “Talita, cumi”.
Tsay ninqanqa “wamra, shäriy” ninanmi.