2 Nirkurnami imamanpis tinkutsiypa atska yachatsikuykunata yachatsir nirqan: 3 “Shumaq wiyayämay. Juk runashi trïgu muruq aywanä. 4 Muruta mashtaptinshi näniman wakin chänä. Tsayshi pishqukuna shamur upshaskiyänä. 5 Wakin murunashi shaqaman chänä. Tsaycho allpa mana kaptinshi ras jeqamurpis 6 michïkuyta mana kamäpakur achaywan tsakiskinä. 7 Wakin kaq murushi kashakuna rurinman chänä. Jeqamurpis kashakuna ñitiptinshi wayuyninpis kanätsu. 8 Wakin kaq murunashi alli allpaman chänä. Tsaycho alli wiñamurshi alli espïgayuq kayänä. Wakin espïgashi kimsa chunka (30) trïguta wayunä, wakin espïgashi soqta chunka (60) trïguta wayunä y wakinnashi juk pachak (100) trïguta wayunä”.

9 Tsaynö yachaskatsirmi Jesús nirqan: “Rinriyuq kaqkunaqa ninqäkunata wiyakuyätsun”.

10 Tsaypita runakuna aywakuyaptinnami Jesús quëdarqan chunka ishkay discïpulunkunawan y tsaycho kaykaq wakin runakunawan. Paykunami tsay yachatsinqanta tantiyatsinanpä Jesústa mañakuyarqan.

11 Jesúsnami nirqan: “Qamkunataqa Tayta Diospa mandakuynin imanö kanqantapis shumaqmi tantiyatsiyäshayki. Wakinkunatami itsanqa imamanpis tinkutsiypa willaykä. 12 Tsaymi rikarpis cuentata qokuyantsu y wiyaykarpis tantiyayantsu. Tantiyarqa jutsankunata kacharirmi perdonashqa kayanman”.^†

13 Tsaymi Jesús nirqan: “Tsay yachatsinqäta ¿manaku tantiyayanki? Tsaykunallatapis mana tantiyaykarqa ¿imanörä wakinkunata tantiyayankiman?

14 “Murukuq runaqa Tayta Diospa willakuyninta willakuqmi kaykan. 15 Wakin runakunaqa chukru näninömi kaykäyan. Tsaymi Tayta Diospa willakuyninta wiyaptinpis Satanás shamur wiyayanqallantapis qonqaskatsin.

16 “Wakin runakunaqa shaqa chakranömi kayan. Paykunaqa Diospa willakuyninta wiyar kushishqami chaskikuyan. 17 Kushishqa chaskikurpis Tayta Diosman shumaq mana yärakurmi michïkuyta mana kamäpakuq trïgunö kaykäyan. Tsaymi Diospa palabranta chaskikuyanqanpita runakuna chikiyaptin o ñakaykuna shamuptin punta kayanqallanman kutiyan.

18 “Wakin runakunaqa kasha chakranömi kayan. Paykunaqa Diospa willakuyninta wiyarpis 19 kay vïdacho imaykapä llakikur y imaykayuq kayllapä yarpachakurmi Diospa willakuyninta qonqaskir mana wayuq trïgunö kayan.

20 “Wakin runakunami itsanqa alli allpanö kayan. Paykunaqa Tayta Diospa willakuyninta chaskikurmi Tayta Dios munanqannö kawayan. Tsaymi alli allpacho juk murullapita kimsa chunka (30) trïgu o soqta chunka (60) trïgu o juk pachak (100) trïgu wayunqannö kayan”.

21 Tsaypitanami Jesús nirqan: “Pipis aktsita tsarirkatsir ¿cajón rurinman o catri jawanman pakanmantsurä? ¿Manaku llapanta atsikyapänanpä rikananman churan?^†

22 Tsaynömi yachatsinqäkuna kanan pakaraykaqnö karpis musyakanqa. Kanan mana tantiyakarpis waraykunaqa tantiyakanqami. 23 Rinriyuq kaqkunaqa ninqäkunata wiyakuyätsun”.

24 Mastami Jesús nirqan: “Ninqäkunata shumaq wiyakayämay. Wiyakuyanqaykiman tupumi masta yachakuyänaykipä Tayta Dios yanapayäshunki. [Shumaq wiyakuyaptikiqa] mastarämi tantiyatsiyäshunki. 25 Yachatsinqäta cäsukuqkunaqa masmi tantiyayanqa. Mana cäsukuqkunami itsanqa ichik tantiyayanqallantapis qonqaskiyanqa”.^†

26 Tsaypitanami Jesús nirqan: “Tayta Diospa mandakuyninqa juk runa trïguta murukunqannömi kaykan. 27 Muruykur punukuptinpis rikchaptinpis paqaspapis junaqpapis murunqan wiñanmi. Imanö wiñanqanta tsay runa mana tantiyaptinpis 28 tsay trïguqa qewanöllami puntata jeqamun. Wiñarkurnami espigayta qallaykur poqun. 29 Poquskiptinnami cosechar ösiwan achun”.^†

30 Mastami Jesús nirqan: “Tayta Diospa mandakuyninta ¿imamanrä tinkutsïman? ¿Ima tinkutsikuywanrä tantiyatsïman? 31 Tayta Diospa mandakuyninqa ñäbus muruta juk runa chakranman murunqannömi kaykan. Llapan murupitapis mas ichikanayllami kaykan. 32 Ichikanaylla kaykarpis wiñamurqa wakin qewakunapitapis mas jatunmi. Tsaymi llimllankunacho pishqukunapis qeshunkuna rurayan”.^a

33 Tsaynöpami runakuna tantiyayänanpä tupulla Tayta Diospa willakuyninta imamanpis tinkutsiypa Jesús yachatsirqan. 34 Imamanpis mana tinkutsiypaqa manami imaypis yachatsirqantsu. Discïpulunkunatami itsanqa kikillankuna kaykäyanqan höra llapanta tantiyatsiq.

35 Tsay junaq patsa tsakaykaptinnami discïpulunkunata Jesús nirqan: “Wak tsimpaman tsimpashun”.

36 Tsaynö nirmi tsaycho kaykaq runakunata jaqiskir büquiwan wak tsimpaman aywayarqan. Wakin runakunapis büquinkunawanmi aywayarqan. 37 Qochata tsimpaykäyaptinmi pasaypa wayra qallaskirqan. Yakupis pulchaqyarmi büquita jundikätsinanpäna kaykarqan. 38 Jesúsnami büquipa qepa jamakunancho jawnata jawnakurkur punuykarqan. Tsaymi discïpulunkuna pasaypa mantsakashqa Jesústa rikchatsir niyarqan: “¡Rabí, jundikaykantsiknachä! ¿Manaku imapis qokushunki?”

39 Tsaynö niyaptinmi Jesús shärirkur wayrata y yakuta ajapaypa nirqan: “¡Upällay!” Tsaymi jinan höra wayrawan yakupis wiyakaskirqan. 40 Tsaypitanami discïpulunkunata nirqan: “¿Imanirtä mantsakashqa kaykäyanki? ¿Manaku yärakayämanki?”

41 Tsaymi kikinkunapura mantsakashqa ninakuyarqan: “Yakupis wayrapis tsaynö cäsunanpäqa ¡pinatä kay runaqa!”