Jutsa rurayta kachariyänanpä Jesús ninqan
13
Tsaychömi runakuna Jesústa willar niyarqan: “¡Galilea runakuna templucho sacrificiuta rupaykätsiyaptinshi Pilato kachanqan soldädunkuna wanutsiyashqa!”2 Tsaynö willayaptinmi Jesús nirqan: “¿Wakin Galilea runakunapita tsay wanuq runakuna mas jutsayuq kayanqantaku yarpäyanki? 3 Noqami nï: Manami jutsayuq kayanqanpitatsu wanuyashqa. Tsaynö kaptinpis jutsa rurayta mana kacharirqa paykunanömi wanuyanki. 4 Tsaynöpis Jerusaléncho Siloé törri juchur chunka puwaq runakunatami wanutsirqan. ¿Jerusaléncho taq marka mayinkunapita tsay wanuq runakuna mas jutsayuq kayanqantaku yarpäyanki? 5 Noqami nï: Manami jutsayuq kayanqanpitatsu wanuyashqa. Tsaynö kaptinpis jutsa rurayta mana kacharirqa paykunanömi wanuyanki”.
Mana wayuq hïgusman Jesús tinkutsinqan
6 Hïgusman tinkutsirmi Jesús nirqan: “Juk runapashi üva chakrancho hïgusnin kanä. Tsayshi wayuyninta pallaq aywar ni jukllayllatapis tarinätsu. 7 Tsayshi aruqninta ninä: ‘Kimsa watana kay hïguspa wayuyninta pallaq shamurpis manami ni jukllayllatapis tarishqätsu. ¡Juklla muturiy! Mana wayuqtaqa ¡imapätä chakrachöpis katsishun!’
8 “Chakran cuidaqnashi ninä: ‘Taytay, juk wata mas shuyaykushun. Shumaq oqtipaskirmi iskan wiñashä. 9 Tsaynö ruraptï capazchi wayunmanpis. Mana wayuptinmi itsanqa muturinki’ ”.a
Kurkayashqa warmita Jesús alliyätsinqan
10 Jamay junaqnami sinagögacho Jesús yachatsikuykarqan. 11 Tsaychömi supay kurkayätsinqan warmi kaykarqan. Payqa imanöpapis derechakayta mana puëdirmi chunka puwaq watana kurkayashqa kakurqan. 12 Tsaynö kaykaqta rikarmi Jesús qayaykur nirqan: “Warmi, kananqa alliyashqanami kanki”.
13 Tsaynö nir yataykuptinmi tsay warmi jinan höra derechakaskir Tayta Diosta alabarqan.
14 Jamay junaqcho Jesús alliyätsiptinmi sinagögacho mandaq runa ajar nirqan: “Soqta junaqmi kaykan runakuna aruyänanpä. Alliyayta munarqa tsay junaqkunacho shayämunkiman. ¡Imanirtä jamay junaqchörä shayämunki!”
15 Tsaynami Jesús nirqan: “¡Allish tukuq runakuna! Jamay junaq kaptinpis ¿manaku töruykikunata y ashnuykikunata paskaskir yakuta uputsiyanki? 16 Kay warmiqa Abrahampita aywaraqmi. ¡Allaw! Chunka puwaq watami Satanás ñakatsishqa. Tsaynö kaykaptinqa ¿manaku jamay junaqchöpis alliyätsïman?”
17 Tsaynö niptinmi chikiqninkuna pasaypa penqakuyarqan. Wakin runakunami itsanqa Jesús almiraypä ruranqankunata rikar kushikuyarqan.
Sanación en el Sabbat
Ñäbus muruman Jesús tinkutsinqan
18 Mastami Jesús nirqan: “Tayta Diospa mandakuyninta ¿imamanrä tinkutsïman? ¿Ima tinkutsikuywanrä tantiyatsïman? 19 Tayta Diospa mandakuyninqa ñäbus muruta juk runa chakranman murunqannömi kaykan. Jeqamur jatunyaptinmi llimllankunacho pishqukunapis qeshunkuna rurayan”.b
El Reino de Dios como una Semilla de Mostaza
Levadüraman Jesús tinkutsinqan
20 Tsaynöllami yapay nirqan: “Tayta Diospa mandakuyninta ¿imamanrä tinkutsïman? 21 Tsayqa imayka levadüranömi. Tantata rurananpä ishkay arröbanö jarinaman levadürata wiñaptinmi mäsa atskaman jakan”.c
Kichki punkuman Jesús tinkutsinqan
22 Tsaypita Jerusalénman Jesús aywarnami markakunapa y jallqakunapa yachatsiraykar päsarqan. 23 Tsaychömi juk runa tapurqan: “Taytay, ¿wallkaqllaku salvakuyanqa?”
Tsaymi Jesús nirqan: 24 “Imanöpapis kichki punkupa yaykuyay. Noqami nï: Atskaq yaykuyta munarpis manami kamäpakuyanqatsu. 25 Wayiyuq runa punkunta wichqaskamuptinmi waqtacho quëdaskir takakur niyanki: ‘¡Taytay, punkuta kichapaykayällämay!’ Tsaymi wayiyuq niyäshunki: ‘Qamkunata manami reqïtsu. ¡Maypitarä kakuyankipis!’ 26 Qamkunanami niyanki: ‘Qamwanmi mikushqantsik y upushqantsik. Markäkunachöpis yachatsishqaykimi’. 27 Paynami niyäshunki: ‘Qamkunata manami reqïtsu. ¡Maypitarä kakuyankipis! ¡Jutsasapa runakuna, ñöpäpita witikuyay!’
28 “Tsaynö niyäshuptikimi pasaypa waqar kiruykikunatapis uchuyanki. Tsay hörami Abrahamta, Isaacta, Jacobta y profëtakunata Tayta Diospa mandakuynincho kaykaqta rikayanki. Qamkunami itsanqa yaykuyta puëdiyankitsu. 29 Maytsay nacionkunapitapis qorikaykurmi Tayta Diospa mandakuynincho mikuyanqa.† 30 Tsay hörami qepa kaqkuna puntacho kayanqa. Punta kaqkunanami qepacho kayanqa”.
Jerusalén runakunapä Jesús llakikur waqanqan
31 Tsay junaqmi fariseukuna Jesúsman chaykur niyarqan: “¡Kaypita juklla aywakuy! Herodesmi wanutsishuynikita munaykan”.
32 Jesúsnami nirqan: “Tsay atuqta willayay: ‘Juk ishkay junaqllanashi supaykunata runakunapita qarqunqa y qeshyaykaqkunatapis alliyätsinqa. Warantinllanashi llapan rurananpä kaqkunata cumplinqa. 33 Imanö kaptinpis kay junaqkunashi Jerusalénman aywanqa. Jerusalénpita juklächöqa profëtakuna manashi wanuyanmantsu’ ”.
34 Tsaypitanami Jesús nirqan: “¡Ay, Jerusalén, Jerusalén! Qamqa Tayta Diospa profëtankunata unaypita patsami wanuykätsinki.† Pay kachamunqan willakuqkunatapis saqmaykankimi. Chipshankunata wallpa oqllaqnö wawaykikunatad atska kuti qoriyta munaptïpis manami munashqaykitsu. 35 Tsaynö kanqaykipitami wayikikunapis templuykipis tsunya rikakunqa. Noqami nï: Manami yapay rikamankinatsu hasta ‘¡Tayta Diospa jutincho shamuq runa alabashqa kaykullätsun!’† ninqaykiyaq”.