Murukuq runaman Jesús tinkutsinqan
13
Tsay junaqllami wayipita yarquskir Galilea qocha kuchunman Jesús aywarqan. Chaykurmi yachatsinanpä jamakurqan. 2 Jesús yachatsinqanta wiyayta munarmi atskaq runakuna tsayman qorikäyarqan. Alläpa kichkïyaptinnami qocha kuchuncho kaykaq büquiman yarkurkur Jesús jamakurqan.†3 Tsaypitanami imamanpis tinkutsiypa atska yachatsikuykunata yachatsir nirqan: “Juk runashi trïgu muruq aywanä. 4 Muruta mashtaptinshi näniman wakin chänä. Tsayshi pishqukuna shamur upshaskiyänä. 5 Wakin murunashi shaqaman chänä. Tsaycho allpa mana kaptinshi ras jeqamurpis 6 michïkuyta mana kamäpakur achaywan tsakiskinä. 7 Wakin kaq murushi kashakuna rurinman chänä. Jeqamurpis kashakuna ñitiptinshi qarwashtaykällar ushakänä. 8 Wakin kaq murunashi alli allpaman chänä. Tsaycho alli wiñamurshi alli espïgayuq kayänä. Wakin espïgashi juk pachak (100) trïguta wayunä, wakin espïgashi soqta chunka (60) trïguta wayunä y wakinnashi kimsa chunka (30) trïguta wayunä. 9 Rinriyuq kaqkunaqa ninqäkunata wiyakuyätsun”.
Tinkutsiypa imanir Jesús yachatsinqanpis
10 Tsaypitanami discïpulunkuna Jesústa tapuyarqan: “Taytay, tinkutsiypa imanir yachatsinqaykitapis tantiyaykatsiyällämay”.
11 Jesúsnami nirqan: “Qamkunataqa Tayta Diospa mandakuynin imanö kanqantapis shumaqmi tantiyatsiyäshayki. Wakinkunataqa manami tantiyatsishätsu. 12 Yachatsinqäta cäsukuqkunaqa masmi tantiyayanqa. Mana cäsukuqkunami itsanqa ichik tantiyayanqallantapis qonqaskiyanqa.† 13 Tsaymi imamanpis tinkutsiypa willaykä. Paykunaqa rikarpis manami cuentata qokuyantsu y wiyaykarpis manami tantiyayantsu. 14 Tsaynö kananpä kanqanta musyarmi profëta Isaías qellqar nirqan:
“Mayjina wiyarpis manami tantiyayankitsu.
Mayjina rikarpis manami cuentata qokuyankitsu.
15 Tsay runakunapa shonqunkunami chukruyashqa.
Rinrinkunapis upayashqami.
Ñawinkunapis qaprayashqami.
Tsaynö karmi rikayantsu, wiyayantsu, tantiyayantsu ni jutsankunata kachariyantsu.
Tsaynö kayaptinmi noqapis alliyätsishätsu.a †
16 “Tsaynö kaptinpis qamkunatami itsanqa Tayta Dios yanapaykäyäshunki rikayanqaykita y wiyayanqaykita tantiyakuyänaykipä. 17 Rasunpaypami nï: Unay profëtakunapis y Tayta Dios munanqannö kawaq runakunapis rikayanqaykita rikayta munarpis manami rikayashqatsu. Wiyayanqaykita wiyayta munarpis manami wiyayashqatsu.†
Murukuqman tinkutsinqanta Jesús tantiyatsinqan
18 “Kanan tantiyatsiyäshayki murukuq runaman tinkutsiypa yachatsinqäta. 19 Trïgu muruqa Tayta Diospa mandakuyninpa willakuyninmi. Wakin runakunaqa chukru näninömi. Tsaymi Tayta Diospa willakuyninta wiyarpis mana chaskikuyaptin Satanás shamur wiyayanqallantapis qonqaskatsin.
20 “Wakin runakunaqa shaqa chakranömi kayan. Paykunaqa Diospa willakuyninta wiyar kushishqami chaskikuyan. 21 Kushishqa chaskikurpis michïkuyta mana kamäpakuq trïgunömi kayan. Tsaymi Diospa palabranta chaskikuyanqanpita runakuna chikiyaptin punta kayanqallanman kutiyan.
22 “Wakin runakunaqa kasha chakranömi kayan. Paykunaqa Diospa willakuyninta wiyarpis kay vïdacho imaykapä llakikur y imaykayuq kayllapä yarpachakurmi Diospa willakuyninta qonqaskir mana wayuq trïgunö kayan.
23 “Wakin runakunami itsanqa alli allpanö kayan. Paykunaqa Tayta Diospa willakuyninta chaskikurmi Tayta Dios munanqannö kawayan. Tsaymi alli allpacho juk murullapita juk pachak (100) trïgu o soqta chunka (60) trïgu o kimsa chunka (30) trïgu wayunqannö kayan”.
Trïguwan ballïcu wiñamunqanpita Jesús yachatsinqan
24 Tsaypitanami tinkutsiypa yapay yachatsir Jesús nirqan: “Tayta Diospa mandakuynin imanö kanqantapis tinkutsiypa yachatsiyäshayki. Juk runashi chakrancho trïguta murunä. 25 Tsaynö kaptinpis murur ushaskiptinnashi chikiqnin runa tsakaypa aywaykur trïgu murunqan jananman ballïcuta mashtaskinä. 26 Trïgu wiñamur espigar qallaykuptinshi ballïcupis wiñamunä.
27 “Tsayshi wätayninkuna aywaykur patronninta niyänä: ‘Taytay, akraykur muruykaptikiqa ¿maypitarä ballïcu jeqamushqa?’
28 “Tsaynö willayaptinnashi ninä: ‘Mayqanpis chikimaqnïmi mashtashqa kanqa’.
“Wätayninkunanashi tapur niyänä: ‘¿Munankiku tsay ballïcuta llukiyänäta?’
29 “Niyaptinnashi ninä: ‘Ama llukiyaytsu. Ballïcuta llukirqa trïgutapis llukiyankimi. 30 Jina cosëchayaq tsayllacho wiñakutsun. Cosëchachönami achuqkunata nishä: “Puntata ballïcuta qoriskir kayanantsikpä wankuyay. Trïguta itsanqa qoriskir trïgu churakunäman churayay” ’ ”.
Ñäbus muruman Jesús tinkutsinqan
31 Mastapis tinkutsiypa yachatsirmi Jesús nirqan: “Tayta Diospa mandakuyninqa ñäbus muruta juk runa chakranman murunqannömi kaykan. 32 Llapan murupita mas ichikanaylla karpis wiñamurqa wakin qewakunapitapis mas jatunmi wiñan. Tsaymi llimllankunacho pishqukunapis qeshunkuna rurayan”.b
Levadüraman Jesús tinkutsinqan
33 Tinkutsiypa yapay yachatsirmi Jesús nirqan: “Tayta Diospa mandakuyninqa imayka levadüranömi. Tantata rurananpä ishkay arröbanö jarinaman levadürata wiñaptinmi mäsa atskaman jakan”.c
Imanir tinkutsiypa Jesús yachatsinqan
34 Tsaynömi Jesús imamanpis tinkutsiypa runakunata yachatsirqan. Imamanpis mana tinkutsiypaqa manami imaypis yachatsirqantsu. 35 Tsaynö yachatsirqan Tayta Diospa profëtan kaynö ninqanta cumplinanpämi:
“Imamanpis tinkutsiypami yachatsiyäshayki.
Kay patsata kamanqanpita patsa pipis mana tantiyanqankunatami willakushä”.†
Ballïcuman tinkutsiypa yachatsinqanta Jesús tantiyatsinqan
36 Tsaypitanami runakuna aywakuyänanpä niskir Jesús juk wayiman yaykurqan. Tsaychömi discïpulunkuna rugayarqan ballïcuman tinkutsiypa yachatsinqanta tantiyatsinanpä.
37 Tsaymi Jesús nirqan: “Trïguta muruq runaqa Runapa Tsurinmi. 38 Chakranami entëru patsa. Trïgunami Tayta Diospa mandakuynincho kawaq runakuna. Ballïcunami Satanás munanqannö kawaq runakuna. 39 Ballïcuta muruq kaqnami diablu. Cosëchanami juiciu final. Cosëchata qoriqkunanami angelkuna.
40 “Ballïcuta qoriskir ninaman qaykunqannömi juiciu finalchöpis kanqa. 41 Juiciu finalchömi angelninkunata Runapa Tsurin kachamunqa jutsa ruratsiqkunata y jutsa ruraqkunatapis mandakuyninpita qoriskir 42 lunyaypa lunyaykaq ninaman qaykuyänanpä. Tsaycho pasaypa waqarmi kirunkunatapis uchuyanqarä. 43 Tsaynö kaptinpis Tayta Dios munanqannö kawaqkunami itsanqa Tayta Diospa mandakuynincho rupaynörä atsikyäyanqa.† Rinriyuq kaqkunaqa ninqäkunata wiyakuyätsun.
Pamparaq qellayman Jesús tinkutsinqan
44 “Tayta Diospa mandakuyninqa chakracho qellay pamparaqmanmi tinkun. Juk runashi chakracho atska qellay pamparaykaqta tarikunä. Tsay qellayta tariykurshi kanqallanman pampaykunä. Tsaypitanashi llapan imaykankunatapis rantikuskir tsay qellay pamparaq chakrata kushishqa rantinä.d
Perlaskunaman Jesús tinkutsinqan
45 “Tsaynöllami Tayta Diospa mandakuyninqa kuyayllapä perlasman tinkun. Juk negociantishi allinnin kaq perlasta rantinanpä ashinä. 46 Mas allinnin kaqta tariykurnashi llapan imaykantapis rantikuykur tsay perlasta rantinä”.e
Mällaman Jesús tinkutsinqan
47 “Tsaynöllami Tayta Diospa mandakuyninqa mällaman tinkun. Lamarman mällata jitarmi imaykaläya pescäduta tsariyan. 48 Mälla juntatami lamar kuchunman jipiyan. Tsaychömi alli kaq pescäduta canastaman wiñayan y mana alli kaqtana jitariyan. 49 Tsaynöllami juiciu finalcho angelkuna shamur alli runakunapita jutsa ruraq runakunata rakiyanqa. 50 Jutsa ruraq runakunatami lunyaypa lunyaykaq ninaman qaykuyanqa. Tsaycho pasaypa waqarmi kirunkunatapis uchuyanqarä”.
Maran kaq y mushuq kaq mikuyman Jesús tinkutsinqan
51 Tsaynö yachaskatsirnami discïpulunkunata Jesús tapurqan: “¿Kay yachatsinqäkunata tantiyayankiku?”
Paykunanami niyarqan: “Awmi, taytay”.
52 Jesúsnami nirqan: “Tayta Diospa mandakuyninpita yachatsiq runaqa maran kaq mikuykunata y tsayrä churanqan kaqkunata jipiskamur qaraqnömi kaykan”.f
Nazaretcho Jesús willakunqan
53 Imamanpis tinkutsiypa yachaskatsirnami Jesús tsaypita aywakurqan. 54 Markanman chaykur sinagögacho yachatsiptinmi marka mayinkuna almirakur niyarqan: “Tsaynö yachatsinanpä ¿maychörä yachakamushqa? Tsaynöpis ¿imanöparä milagrukunata ruran? 55 Payqa ¿manaku carpintëru Josépa tsurin? Mamanpis ¿manaku María? Wawqinkunapis ¿manaku Santiago, José, Simón y Judas? 56 Llapan paninkunapis ¿manaku kaycho täyan? Tsayläya yachatsikunanpäqa ¿maychörä yachakamushqa?”
57 Tsaynö nirmi Jesús yachatsinqankunata criyiyarqantsu. Tsaymi Jesús nirqan: “Wakin markakunacho profëtata chaskiyaptinpis castankuna y marka mayinkunaqa manami chaskiyantsu”.†
58 Tsaynö mana chaskiyaptinmi juk ishkay milagrukunallata tsaycho rurarqan.