3 Jesúsnami nirqan: “¿Manaku imaypis liyiyashqayki yanapaqninkunawan mallaqar David imata ruranqantapis? 4 Davidshi Tayta Diospa wayinman yaykur Diospä churayanqan tantata mikunä.^† Tsay tantaqa manami David ni paywan kaykaq runakuna mikuyänanpätsu karqan, tsaypa trokinqa sacerdötikunalla mikuyänanpämi.^† 5 Tsaynöpis Moisés qellqanqan leykunachömi nin sacerdötikuna templucho jamay junaq arurpis jutsayuq mana kayanqanta. Tsaytapis ¿manaku liyiyashqayki?^† 6 Tsaymi qamkunata nï: Noqami templupitapis mas munayyuq kaykä.^a

7 “Tayta Diospa palabranchömi nin: ‘Sacrificiuta rupatsiyanqaykipitapis mas munä kuyapäkuq kayänaykitami’. Tsayta tantiyakurqa manami discïpulükunata manakaqman churaykäyankimantsu.^† 8 Runapa Tsurinqa jamay junaqpäpis munayyuqmi”.^b

9 Tsaypita aywarmi sinagögaman Jesús yaykurqan. 10 Tsaychömi makin wanushqa runapis kaykarqan. Tsaymi Jesústa tapuyarqan: “Jamay junaq kaykaptin qeshyaykaqta ¿alliyätsishwanku o manaku?”

Tsaynö tapuyarqan alliyätsiptinqa tsay achäquilla Jesúspa contran shäriyänanpämi.

11 Tsaymi Jesús nirqan: “Mayqaykipapis üshaykikuna pözuman jeqaptin jamay junaq kaykaptinpis ¿manaku jinan höra jipiq aywayanki?^† 12 Runaqa üshapitapis masmi välin. Tsaymi jamay junaq kaptinpis runa mayintsikta alliyätsishwan”.

13 Tsaypitanami makin wanushqa runata nirqan: “¡Makikita joqariy!”

Joqarkuptinmi jukaq makinnö allina rikakurqan. 14 Tsaymi fariseukunaqa yarquskir Jesústa wanutsiyänanpä willanakuyarqan.

15 Tsaynö willanakuyanqanta musyaskirmi tsay markapita Jesús aywakurqan. Aywakuptinmi atskaq runakuna qepanta aywayarqan. Llapan qeshyaqkunatami Jesús alliyätsirqan. 16 Alliyaskatsirnami Jesús nirqan: “Noqa alliyätsinqäta pitapis ama willayankitsu”.

17 Tsaynöpami profëta Isaías kaynö qellqanqanta Jesús cumplirqan:

22 Tsaypitanami supay qaprayätsinqan y upayätsinqan runata Jesús kaqman pushayarqan. Tsay runata alliyätsiptinmi rikarqanna y parlarqanna. 23 Tsayta rikarmi runakuna kushikur niyarqan: “¿Kay runaqa Davidpa Tsurintsurä kaykan?”

24 Tsaynö niyanqanta wiyarmi fariseukuna niyarqan: “Kay runaqa supaykunapa mandaqnin Beelzebúpa^d munayninwanmi supaykunata qarqun”.^†

25 Paykuna llutanta yarpäyanqanta musyarmi Jesús nirqan: “Juk nacioncho runakuna kikinkunapura chikinakurqa ¿manatsurä wanutsinakur ushakäyanman? Tsaynöpis juk markacho taqkunapis o juk wayicho taqkunapis chikinakurqa ¿manatsurä wakpa kaypa aywakur ushakäyanman? 26 Tsaynöllami Satanáspis kikinpa contran shärirqa rakikashqa kayanqa. Tsaynö kaptinqa mandakuyninpis ushakanqami.

27 “Beelzebúpa munayninwan supaykunata qarquptïqa ¿pipa munayninwantä discïpuluykikunaqa supaykunata qarquyan? Diospa munayninwan supaykunata qarquyanqanta tantiyaykarqa ¿imanirtä tantiyayankitsu noqapis Diospa munayninwan qarqunqäta? 28 Diospa Espïritunwan supaykunata qarquptïmi Tayta Diospa mandakuynin qamkunaman chämunqanta musyayanki”.

29 “Kallpasapa runata manarä pankarqa manami pipis wayinman yaykur imantapis apakunmantsu. Pankaskirmi itsanqa imantapis apakunman.^e

30 “Pipis favornï mana karqa conträmi kaykan. Mana qorishimaq kaqqa qarqunmi.^f 31 Tsaymi qamkunata nï: Runakuna jutsata rurayanqanta y Diospa contran parlayanqantapis Tayta Dios perdonanqami. Espíritu Santupa contran parlayanqantami itsanqa perdonanqatsu. 32 Runapa Tsurinpa contran parlayaptinqa perdonanqami. Espíritu Santupa contran parlayaptinmi itsanqa kay vïdachöpis ni wak vïdachöpis perdonanqatsu.^{g †}

33 “Alli jachaqa allitami wayun. Mana alli jachami itsanqa mana allita wayun. Wayuyninpitami jachataqa reqintsik.^{h †} 34 ¡Culebra casta runakuna!^† Mana alli runa kaykarqa ¿imanöparä allita parlayankiman? Runaqa shonqun yarpanqantami allitapis o mana allitapis parlan.^† 35 Alli runaqa shonqun alli yarpanqantami parlan y mana alli runaqa shonqun mana alli yarpanqantami parlan. 36 Tsaymi qamkunata nï: Imatapis llutankunata parlayanqanpitami juiciu finalcho Tayta Dios juzganqa. 37 Allita parlaqtaqa salvanqami. Tsaynö kaptinpis llutankunata parlaqtami itsanqa infiernuman qaykunqa”.

38 Tsaynö niptinmi wakin fariseukuna y ley yachatsikuqkuna Jesústa niyarqan: “Rabí, Tayta Dios rasunpaypa kachamushunqaykita musyayänäpä ima milagrullatapis ruramuy”.^†

39 Tsaymi Jesús nirqan: “¡Mana cäsukuq jutsasapa runakuna! Milagruta ruranäta munayaptikipis^† manami ima milagrutapis rurashätsu. Tsaypa trokinqa profëta Jonásta salvar milagruta ruranqannömi Tayta Dios juk milagruta ruranqa. 40 Kimsa junaq kimsa paqas jatun pescädupa pachancho Jonás kanqannömi^† Runapa Tsurinpis kimsa junaq kimsa paqas pamparanqa.

41 “Jonás willakunqanta cäsukurmi Nínive runakuna jutsankunata kachariyarqan.^† Kananqa Jonáspita mas munayyuq kaqmi willaykäyäshunki.ⁱ Tsaymi juiciu finalcho Nínive runakuna sharkamur kanan witsan runakunata shimpiyanqa”.

42 “Salomón yachatsinqanta wiyananpämi mandaq reinapis sur kaqlä karu nacionpita shamurqan.^† Kananqa Salomónpita mas yachaq kaqmi willaykäyäshunki.^j Tsaymi juiciu finalcho tsay reina sharkamur kanan witsan runakunata shimpinqa.

43 “Runapita supay yarqurmi maychöpis tänanpä ashir tsunyaq jirkakunapa purin. Mana tarirnami 44 nin: ‘Yarqamunqä wayïman kutikushä’. Kutiykurnami tarin pitsapakushqa y churapakushqa jäkuykaqtana. 45 Tsaynöta tariykurmi supay mayinkunaman aywar paypita mas mana alli qanchis supaykunata pushakurkur tsay tanqanman kutin. Tsaymi ñöpata kanqanpitapis peorrä tsay runa rikakun. Tsaynömi päsanqa kanan witsan mana alli runakunatapis”.

46 Jesús tsaynö yachaykätsiptinmi paywan parlayta munar mamanwan wawqinkuna punkucho shuyaraykäyarqan. 47 Tsaymi Jesústa juk runa willar nirqan: “Mamaykiwan wawqikikunami waqtacho shuyaykäyäshunki”.

48 Willayaptinmi Jesús nirqan: “Kananmi mamä y wawqïkuna pï kayanqantapis musyatsiyäshayki”.

49 Tsaynö nirmi discïpulunkunaman toqiykur nirqan: “Paykunami mamä wawqï. 50 Pipis ciëlucho kaykaq Taytä munanqannö kawaq kaqmi wawqï, panï y mamä kayan”.