Tayta Diosta mañakunantsikpä Jesús yachatsikunqan
11
Juk kutichönami Tayta Diosta Jesús mañakuykarqan. Mañakuyta ushaskiptinnami juk discïpulun Jesústa nirqan: “Taytay, discïpulunkunata Juana yachatsinqannö noqakunatapis Tayta Diosta mañakuyänäpä yachaykatsiyämay”.2 Tsaymi Jesús nirqan: “Tayta Diosta mañakur niyanki:
“[Ciëlucho kaykaq] Papä,
qampa jutiki respitashqa kaykullätsun.
Kay patsacho mandaq kanaykipä shamuykullay.
[Ciëlucho cäsukuyäshunqaykinö kay patsachöpis cäsukuykuyälläshuy.]
3 Cada junaqpä mikuylläkuna ama pishiykutsuntsu.
4 Chikimaqnïkunata perdonayanqänö noqakunatapis perdonaykayällämay.
Jutsa rurayman mana ishkiyänäpä ama kachaykayällämaytsu.
[Tsaypa trokinqa mana allikunapita tsapaykayällämay]”.
El Padre Nuestro
5 Mastami Jesús nirqan: “Juk runashi pullan paqas amïgunpa wayinman aywar ninä: ‘Amïgu, kimsa tantaykita mañakushayki. 6 Juk amïgümi wayïman patsakamushqa. Imäpis manami kantsu qaranäpä’. 7 Tsaynö mañakuptinshi amïgun ninä: ‘¿Imanirtä kay hörarä shamuykanki? Punküpis trancashqanami y wamräkunapis punuykäyannami. Kay höraqa manami atiendïmannatsu’.
8 “Noqami nï: Amïgun kanqanta reqiykar sharkamuyta mana munaykarpis kutin kutin takakuptinqa kamaripanqami. 9 Tsaymi qamkunata nï: Mañakuyaptikiqa Tayta Dios qarayäshunkimi. Ashirqa tariyankimi. Punkuta takakuyaptikiqa kichapäyäshunkimi. 10 Mañakuq kaqqa chaskinmi. Ashiq kaqqa tarinmi.† Punkuta takakuq kaqtaqa kichapanmi.
11 “Mayqaykitapis wamraykikuna [tantata mañakuyäshuptiki ¿rumitatsurä aptaparkuyankiman?] Pescäduta mañakuyäshuptiki ¿culebratatsurä qaraykuyankiman? 12 Runtuta mañakuyäshuptiki ¿alacrantatsurä qaraykuyankiman? 13 Qamkuna mana alli ruraq kaykarpis wamraykikunata alli kaqllata qaraykäyaptikiqa ¿manatsurä ciëlucho kaykaq Taytaykipis mañakuq kaqman Espíritu Santuta kachamunqa?”
Jesúspa contran parlayanqan
14 Juk kutinami mana parlaq runapita supayta Jesús qarqurqan. Supay yarquskiptinnami tsay runa parlar qallaykurqan. Tsayta rikaykurmi runakuna espantakuyarqan. 15 Wakin runakunami niyarqan: “Kay runaqa supaykunapa mandaqnin Beelzebúpa munayninwanmi supaykunata qarqun”.
16 Wakinnami ishkitsiyta munar Jesústa niyarqan: “Taytay, Tayta Dios rasunpaypa kachamushunqaykita musyayänäpä ima milagrutapis ruramuy”.
17 Paykuna llutanta yarpäyanqanta musyarmi Jesús nirqan: “Juk nacioncho runakuna kikinkunapura chikinakurqa ¿manatsurä wanutsinakur ushakäyanman? Tsaynöpis juk wayicho taqkuna chikinakurqa ¿manatsurä wakpa kaypa aywakur ushakäyanman? 18 Tsaynöpis kikinpa contran shäriptinqa Satanáspa mandakuyninpis ushakanqami. Tsaynö nï Beelzebúpa munayninwan supaykunata qarqunqäta niyaptikimi.
19 “Beelzebúpa munayninwan supaykunata qarquptïqa ¿pipa munayninwantä discïpuluykikunaqa supaykunata qarquyan? Diospa munayninwan supaykunata qarquyanqanta tantiyaykarqa ¿imanirtä tantiyayankitsu noqapis Diospa munayninwan qarqunqäta? 20 Diospa munayninwan supaykunata qarquptïmi Tayta Diospa mandakuynin qamkunaman chämunqanta musyayanki.
21 “Kallpasapa runa armanwan wayinta täpaykaptinqa manami pipis imantapis suwanmantsu.b 22 Tsaynö täpaykaptinpis paypita mas kallpasapa runa chaykurmi itsanqa armanman yärakuykaptinpis vinciskir qechunqa. Nirkurmi imaykankunatapis apakur rakipänakuyanqa.c
23 “Pipis favornï mana karqa conträmi kaykan. Mana qorishimaq kaqqa qarqunmi.d
Runaman supay kutinqan
24 “Runapita supay yarqurmi maychöpis tänanpä ashir tsunyaq jirkakunapa purin. Mana tarirnami nin: ‘Yarqamunqä wayïman kutikushä’. 25 Kutiykurnami tarin pitsapakushqa y churapakushqa jäkuykaqtana. 26 Tsaynöta tariykurmi supay mayinkunaman aywar paypita mas mana alli qanchis supaykunata pushakurkur tsay tanqanman kutin. Tsaymi ñöpata kanqanpitapis peorrä tsay runa rikakun”.
Diosta cäsukuqkuna kushishqa kawayänanpä Jesús ninqan
27 Jesús tsaynö parlaykaptinnami runakunapa chawpinpita juk warmi nimurqan: “¡Ima kushishqarä wachashuqniki y chuchushuqniki mamayki!”
28 Tsaynö niptinnami Jesús nirqan: “Tayta Diospa palabranta wiyar cäsukuqkunami paypita masrä kushishqa kaykäyan”.
Bendecidos Son Aquellos que Escuchan y Obedecen
Milagrutarä Jesús rurananta munayanqan
29 Tsaytsika runakuna qorikäyaptinmi Jesús nirqan: “Kanan witsan runakunaqa mana cäsukuqmi kayan. Milagruta ruranäta munayaptinpis manami ima milagrutapis rurashätsu. Tsaypa trokinqa profëta Jonásta salvar milagruta ruranqannömi Tayta Dios juk milagruta ruranqa. 30 Imanömi Nínive runakuna Jonásta chaskiyänanpä Tayta Dios milagruta rurarqan, tsaynömi kanan witsan runakuna Runapa Tsurinta chaskiyänanpäpis milagruta ruranqa.
31 “Salomón yachatsinqanta wiyananpämi mandaq reinapis sur kaqlä karu nacionpita shamurqan.† Kananqa Salomónpita mas yachaq kaqmi willaykäyäshunki.e Tsaymi juiciu finalcho tsay reina sharkamur kanan witsan runakunata shimpinqa.
32 “Jonás willakunqanta cäsukurmi Nínive runakuna jutsankunata kachariyarqan.† Kananqa Jonáspita mas munayyuq kaqmi willaykäyäshunki.f Tsaymi juiciu finalcho Nínive runakuna sharkamur kanan witsan runakunata shimpiyanqa”.
Alli yarpayyuq kaqkuna Jesústa chaskiyanqan
33 “Manami pipis aktsita tsarirkatsir pakapanman ni manka rurinman churantsu, tsaypa trokinqa wayiman yaykuqkuna rikayänanpä rikananmanmi churan.g 34 Ñawikikunami shonquykipä aktsinö. Tsaymi ñawikikuna alli kaptinqa shonquykipis aktsicho kaykan. Ñawikikuna mana alli kaptinmi itsanqa tsakaycho kaykäyanki.h
35 “Aktsicho kayanqaykita yarparpis paqtä tsakaycho kayankiman. 36 Ichikllapis shonquykikunacho tsakay ama katsuntsu. Shonquykikunacho atsikyaylla kaptinqa llapan rurayanqaykipis runakunapä allimi kanqa. Aktsi atsikyaqnömi qamkunapis alli kawayanki”.
Fariseukunata y ley yachatsikuqkunata Jesús qayapanqan
37 Jesús parlayta ushaskiptinnami juk fariseo runa wayincho mikuyänanpä pusharqan. Chaykurnami mësaman Jesús jamakurqan. 38 Fariseukunapa costumbrin kanqannö mikunanpä makinta Jesús mana awikuqta rikarmi pushaq fariseo yarpachakurqan.
39 Jesúsnami nirqan: “Fariseukuna, qamkunaqa janallanpa awishqa pucillunö y matinömi kaykäyanki. Tsay plätukuna rurincho qanra kanqannömi qamkunapis shonquykikunacho suwakuyänaykipä y mana allita rurayänaykipä yarpaykäyanki. 40 ¡Mana tantiyakuq runakuna! ¿Manaku musyayanki Tayta Dios cuerpuykikunata kamar shonquykikunatapis kamanqanta? 41 Muchuqkunata kuyapar imallawanpis yanapayay. Tsaynö yanapayaptikiqa shonquykikunapis limpiumi kanqa.
42 “¡Allaw, fariseukuna! Qamkunaqa mentapita, rüdapita y wakin jachapita diezmuta rakiykarpis manami runa mayikikunata kuyapäyankitsu ni Tayta Diostapis kuyayankitsu. Diezmupä rakir cumpliyanqaykinö runa mayikikunata y Tayta Diostapis kuyayankiman.
43 “¡Allaw, fariseukuna! Qamkunaqa sinagögacho punta kaq bancakunamanrämi jamakuyta munayanki. Pläzakunachöpis winchikur respitayäshunaykitami munayanki.
44 “¡Allaw, [allish tukuq fariseukuna y ley yachatsikuqkuna]! Qamkunaqa mana rikakaq sepultüranömi kaykäyanki. Mana rikakaq sepultüra jananpa pipis purir rurincho melanaypä kanqanta mana musyanqannömi runakuna musyayantsu shonquykikunacho mana alli yarpaykuna kanqanta”.
45 Jesús tsaynö niptinmi ley yachatsikuq runa nirqan: “Rabí, tsaynö nirqa noqakunatapis wiyaykätsiyämankimi”.
46 Niptinmi Jesús nirqan: “¡Allaw qamkunapis, ley yachatsikuqkuna! Qamkunaqa apaytapis mana kamäpakuyanqanyaq qepita aparitsiqnömi runakuna atska leykunata cumpliyänanpä nikäyanki. Tsaynö kaptinpis cumpliyänanpä manami ichikllapis yanapayankitsu.
47 “¡Allaw, qamkuna! Unay castaykikuna wanutsiyanqan profëtakuna pamparaykäyanqan jananchömi nïchunkunata ruraykäyanki. 48 Tsaynö rurarqa ‘allichömi wanuyashqa’ niqnömi kaykäyanki.
49 “Tsaymi Tayta Dios yachaq kayninwan nirqan: ‘Paykunamanmi profëtakunata y apostolkunata kachamushä. Paykunatami wakinta wanutsiyanqa y wakinta mana alli runatanö qatikachäyanqa’. 50 Kay patsata kamanqanpita patsa profëtakunata wanutsiyanqanpitami kanan witsan runakunata Tayta Dios juzganqa. 51 Abelta† wanutsinqanpita hasta Zacaríasta† templu punkucho wanutsinqanyaqmi Diospa profëtankunata wanutsiyarqan. Noqami nï: Tsay wanutsiq runakunatanömi kanan witsan Israel runakunata Tayta Dios juzganqa.
52 “¡Allaw, ley yachatsikuqkuna! Wayiman pipis mana yaykuyänanpä llävita tsararaqnömi Tayta Diospa willakuyninta mana chaskiyänanpä runakunata michaykäyanki. Tsaynöllami kikikikunapis chaskiykäyankitsu”.