Chusku waranqa runakuna mikuyänanpä milagruta Jesús ruranqan
8
Tsay junaqkunami atskaq runakuna Jesús kaqman yapay qorikäyarqan. Mikuyänanpä imapis mana kaptinmi discïpulunkunata qayaykur Jesús nirqan:
Marcos 8.1-21
2 “Kay runakunatami pasaypa kuyapä. Kimsa junaqnami mikuytapis mana yawaypa noqantsikwan kaykäyan. 3 Wakinqa karu markapitami shayämushqa. Mallaqllata ‘aywakuyay’ niptïqa wayinkunamanpis manarä chäyaptinchi shonqunkunapis aywapakäyanqa”.
4 Discïpulunkunanami niyarqan: “Kay jäkuqchöqa ¿maychörä mikuyta tariykushun atskaq runakunapä?”
5 Jesúsnami tapurqan: “¿Aykatä tantaykikuna kaykan?”
Niptinnami niyarqan: “Taytay, qanchisllami”.
6 Tsaynö niyaptinmi runakuna jamakuyänanpä Jesús nirqan. Jamaskiyaptinnami qanchis tantata aptarkur Tayta Diosta mañakur agradëcikurqan. Nirkurnami pakiskir discïpulunkunata makyarqan aypukuyänanpä. 7 Tsaynöllami juk ishkay taksha pescädutapis Jesúsman apapäyarqan. Tsaykunatapis aptarkurmi Tayta Diosta agradëcikuskir runakunata aypuyänanpä discïpulunkunata makyarqan. 8 Tsaymi pacha junta llapanpis mikuyarqan. Sobraq kaqkunatanami qanchis canasta juntata discïpulunkuna qoriyarqan. 9 Tsaycho mikuqkunaqa chusku waranqanömi (4,000) kayarqan.
Mikuyta ushaskiyaptinnami aywakuyänanpä runakunata Jesús nirqan. 10 Nirkurnami büquiman yarkurkur discïpulunkunawan Dalmanuta niyanqanman aywayarqan.
Milagrutarä rikayta munayanqan
11 Chaykuyaptinmi fariseukuna ishkitsiyta munar Jesústa niyarqan: “Taytay, Tayta Dios rasunpaypa kachamushunqaykita musyayänäpä ima milagrutapis ruramuy”.†
12 Tsaynö niyaptinmi Jesús llakikur nirqan: “¿Imanirtä kanan witsan runakuna milagrutarä ruranäta munayan?† Rasunpaypami nï: Qamkuna munayanqaykinöqa manami ima milagrutapis rurashätsu”.
13 Tsaynö niskirmi runakunata jaqiskir büquiman yarkurkur discïpulunkunawan jukaq tsimpaman aywakuyarqan.
Fariseukuna mana criyiyanqanta levadüraman Jesús tinkutsinqan
14 Jesúspa discïpulunkuna mirkapankuna apayta qonqashqa kayaptinmi büquicho juk tantalla karqan. 15 Jesúsnami nirqan: “Paqtä fariseukunapa y Herodespa levadüranta chaskiyankiman”.†
16 Tsaynö niptinmi discïpulunkuna kikinkunapura niyarqan: “Tantata mana apamunqantsikpitami tsaynö nikämantsik”.
17 Tsaynö parlaykäyanqanta tantiyaskirmi Jesús nirqan: “¿Imanirtä parlaykäyanki tantata mana apayämunqaykita? ¿Manaku tantiyayanki imapä parlanqätapis? ¿Juiciuynaqku kayanki? 18 Ñawiyuq kaykarpis ¿manaku rikayanki? Rinriyuq kaykarpis ¿manaku wiyayanki?† ¿Manaku yarpäyanki? 19 Pitsqa tantapita pitsqa waranqa (5,000) runakuna mikuyänanpä milagruta ruranqäpita sobraqkunata ¿ayka canasta juntatatä qoriyarqayki?”
Paykunanami niyarqan: “Chunka ishkaytami, taytay”.
20 “Tsaynöpis qanchis tantapita chusku waranqa (4,000) runakuna mikuyänanpä milagruta ruraptï sobraqta ¿ayka canasta juntatatä qoriyarqayki?”
Paykunanami niyarqan: “Qanchistami, taytay”.
21 Jesúsnami nirqan: “Tsaykunata rikaykarpis ¿manaku tantiyayanki?”
Betsaidacho qapra runata Jesús alliyätsinqan
22 Tsaypitanami Betsaida markaman chäyarqan. Tsaycho kaykäyaptinmi qapra runata pushaykur Jesústa rugayarqan alliyätsinanpä.
Marcos 8.22-38
23 Tsaymi makinpita jancharkur markapita jukläman Jesús jipirqan. Tsaychömi qaprapa ñawinman toqapaykurnin yataykur tapurqan: “¿Rikankinaku?” nir.
24 Tsaymi rikachakuskir nirqan: “Jachakunatanömi runakunata rikaykä. Itsanqa puriykäyanmi”.
25 Tsaymi ñawinta yapay yataykuptin llapantapis allina rikarqan. 26 Alliyaskatsirmi Jesús nirqan: “Markaman mana yaykur [ni pitapis mana willar] wayikiman kutikuy”.
Jesús Cristo kanqanta Pedro ninqan
27 Tsaypitanami discïpulunkunawan Jesús aywarqan Cesarea de Filipupa caseriunkunaman. Aywaykäyanqanchömi discïpulunkunata tapurqan: “¿Pï kanqätatä runakuna niyan?”
28 Discïpulunkunanami niyarqan: “Wakinmi niyan Bautizaq Juan kanqaykita. Wakinnami niyan profëta Elías kanqaykita. Y wakinnami niyan mayqan profëtapis kanqaykita”.†
29 Jesúsnami tapurqan: “Qamkunaqa ¿pï kanqätatä yarpäyanki?”
Pedrunami nirqan: “Qamqa Tayta Dios kachamunqan Cristumi kaykanki”.†
30 Tsaynö niptinmi pitapis mana willayänanpä discïpulunkunata Jesús nirqan.a
Wanunanpä kanqanta Jesús willakunqan
31 Tsaypitanami discïpulunkunata Jesús willar nirqan: “Runapa Tsurintami pasaypa ñakatsiyanqa. Mayor runakuna, mandaq sacerdötikuna y ley yachatsikuqkunami contran shärir wanutsiyanqa. Tsaypita kimsa junaqtaqa kawarimunqami”.
32 Tsaytaqa mana tumatsipayllapami Jesús nirqan. Tsaynö niptinmi jukläman qayaskir Pedro ollqutuparqan. 33 Tsaymi discïpulunkunaman Jesús tumaykur Pedruta nirqan: “¡Ñöpäpita witikuy, Satanás! Qam manami munankitsu Tayta Dios munanqanta ruranäta, tsaypa trokinqa runa munanqanta ruranätami munanki”.
34 Nirkurmi discïpulunkunatawan runakunata qayaykur Jesús nirqan: “Pipis discïpulü kayta munarqa kikin munanqannö ama kawatsuntsu, tsaypa trokinqa cruzninta apaqnö noqata qatirämätsun.b † 35 Kawayninta salvayta munaqkunaqa kawayninta oqrayanqami. Kawayninta noqa raykuq y alli willakuynï raykuq oqraqkunami itsanqa kawayninta salvayanqa.c †
36 “Infiernuman qaykushqa kananpä kaptinqa ¿imapätä välin llapan mundupa duëñun kanqanpis? 37 Mayläya imaykayuq karpis manami imaykayuq kanqanwanqa salvacionta rantinqatsu. 38 Jutsasapa runakunapa ñöpancho pipis noqapita y willakuynïpita penqakuptinqa Runapa Tsurinpis Tayta Diospa munayninwan y santu angelninkunawan shamurmi paypita penqakunqa”.