4 “Kushishqami kawayanqa llakikur waqaqkuna. Paykunatami Tayta Dios shoqanqa.^†

5 “Kushishqami kawayanqa alli shonquyuqkuna. Paykunami herencian kananpä mushuq patsata chaskiyanqa.^†

6 “Kushishqami kawayanqa mallaqaypanörä y yakunaypanörä Tayta Dios munanqannö kawayta munaqkuna.^† Paykunatami Tayta Dios yanapanqa.

7 “Kushishqami kawayanqa runa mayinta kuyapaqkuna. Paykunatami Tayta Dios kuyapanqa.

8 “Kushishqami kawayanqa shonqunkunacho imaypis allillata yarpaqkuna.^† Paykunami Tayta Diosta rikayanqa.

9 “Kushishqami kawayanqa runa mayinta amistatsiqkuna. Paykunatami Tayta Dios ‘wamrämi kanki’ ninqa.

10 “Kushishqami kawayanqa Tayta Dios munanqannö kawanqanpita runakuna ñakatsiyaptin.^† Paykunapämi Tayta Diospa mandakuynin kanqa.

11 “Kushishqami kawayanki noqaman yärakayämunqaykipita runakuna ashlliyäshuptiki, ñakatsiyäshuptiki y llullakur imaykata tumpayäshuptiki.^† 12 Tsaynö kaptinpis kushikuyay. Qamkunataqa gloriacho maynami Tayta Dios premiuta shuyaraykätsiyäshunki. Qamkunata chikiyäshunqaykinöllami unay runakunapis Tayta Diospa profëtankunata chikiyarqan.^†

13 “Qamkunaqa kay patsacho kachinömi kaykäyanki. Kachi qamyaskirqa manami imapäpis välintsu. Tsay kachita jitariptin pïmaypis jarutakunmi.

14 “Qamkunaqa aktsinömi kay patsacho kaykäyanki.^† Rikakänancho kaykaq markata pïmaypis rikayanqannömi imanö kawayanqaykitapis rikayäshunki. 15 Manami pipis aktsita tsarirkatsir cajón rurinman churantsu, tsaypa trokinqa wayicho llapanta atsikyapänanpämi rikananman churan.^† 16 Tsaynölla qamkunapis runakuna rikayäshunaykipä tsakaycho atsikyaqnö allikunata rurayay. Tsaynö kawayanqaykita rikarmi ciëlucho kaykaq Taytaykita alabayanqa.^†

17 “Ama yarpäyaytsu Moisés qellqanqan leykunata y profëtakuna qellqayanqankunata manakaqman churanäpä shamunqäta. Manami manakaqman churanäpätsu shamushqä, tsaypa trokinqa paykuna qellqayanqankuna noqacho cumplinanpämi. 18 Rasunpaypami nï: Ciëlupis kay patsapis manarä ushakaptinqa manami ni juk letrallapis Diospa leyninpita illakanqatsu. Tsaycho qellqaraqkuna llapanmi cumplinqa.^†

19 “Pipis kay mandamientukunata jukllayllatapis mana cäsukur y wakin runakunatapis mana cäsukuyänanpä shimita jatiparqa Tayta Diospa mandakuynincho manami ima premiutapis chaskinqatsu. Llapan kay mandamientukunata cäsukur y wakin runakunatapis cäsuyänanpä yachatsirmi itsanqa Tayta Diospa mandakuynincho premiuta chaskinqa. 20 Noqami nï: Fariseukunapitapis y ley yachatsiqkunapitapis mas alli mana kawarqa manami Tayta Diospa mandakuyninman yaykuyankitsu.

21 “Qamkuna musyayankimi unay runakunata kaynö ninqanta: ‘Ama runa mayikita wanutsinkitsu. Wanutsiq kaqqa juzgashqami kanqa’.^† 22 Tsaynö niptinpis noqami nï: Pipis runa mayinta ajanaparqa jutsayuqmi rikakunqa. Tsaynöpis runa mayinta ashllirqa juzgashqami kanqa. Runa mayinta manakaqman churarqa infiernuman qaykushqami kanqa.

23 “Tsaynö kaykaptinqa altarman ofrendaykikunata churayänaykipä kaykäyanqaykicho runa mayikiwan ajätsinakushqa kayanqaykita yarparqa 24 altar ñöpanman ofrendaykikunata kachaykur jinan höra ajätsinakuyanqaykiwan amistayänaykipä aywayay. Tsaypita kutiskirrä Tayta Diospä ofrendaykita churayanki.

25 “Pipis demandayäshuptiki autoridäman manarä char juklla arreglayay. Mana arreglayaptikiqa juezmanmi apatsiyäshunki. Jueznami wardiakunawan carcelman wichqatsiyäshunki. 26 Rasunpaypami nï: Tsaypita manami yarquyankitsu llapan jaqa kaynikikunata manarä pägakurqa.

27 “Qamkuna musyayankimi Moisés qellqanqancho ninqanta: ‘Ama majaykita qanratankitsu’.^† 28 Tsaynö kaptinpis noqami nï: Juk warmita munaparqa maynami majaykita qanrataqnö kaykäyanki.

29 “Tsaynö kaptinqa derëcha kaq ñawiki jutsata ruratsiyäshuptiki tsay ñawikita jipiskir jitariyay. Infiernuman qaykushqa kayänaykipa trokinqa mas allimi kanman wiskullapis kayaptiki.^† 30 Derëcha kaq makiki jutsata ruratsiyäshuptikiqa tsay makikita roquskir jitariyay. Infiernuman qaykushqa kayänaykipa trokinqa mas allimi kanman juk makiyuqllapis kayaptiki.^†

31 “Tsaynöllami Moisés qellqanqan leykunacho nin: ‘Pipis warminwan rakikarqa divorciu papelta firmapätsun’.^† 32 Tsaynö niptinpis noqami nï: Mayqan runapis warmin jukwan mana kaykaptin juk warmiwan täkurqa jutsayuqmi rikakunqa warmin juk runawan tar adulteriu jutsata rurananpä. Tsaynöllami runanpita rakikashqa warmiwan taq runapis adulteriu jutsata ruraykan.^†

33 “Tsaynöpis qamkuna musyayankimi unay runakunata kaynö ninqanta: ‘Mana cumpliyänaykipäqa ama jurayankitsu. Jurarqa mana qonqaypa cumpliyanki’.^† 34 Tsaynö niptinpis noqami nï: Ama ni imanirpis jurayankitsu. Ama jurayankitsu ‘ciëlupä’ nirpis. Ciëluqa Tayta Diospa trönunmi. 35 Ama jurayankitsu ‘patsapä’ nirpis. Kay patsaqa Tayta Diospa chaki jarukunanmi.^† Ama jurayankitsu ‘Jerusalénpä’ nirpis. Jerusalénqa llapanpä munayyuq Rey^a tanqan markami.^† 36 Ama jurayankitsu ‘umäpä’ nirpis.^b Manami munayyuqtsu kayanki aqtsaykita yuraqman ni yanaman tikratsiyänaykipäpis. 37 Awnirqa awniyanki, y mana cumpliyänayki kaptinqa ama awniyankitsu. Jurayparä awnirqa Satanás munanqannömi parlaykäyanki.

38 “Musyankimi Moisés qellqanqan leykunacho ninqanta: ‘Ñawinta jipiptinqa kikinpa ñawintapis jipitsun. Kirunta jipiptinqa kikinpa kiruntapis jipitsun’.^† 39 Tsaynö niptinpis noqami nï: Chikiyäshuptikipis ama chikiyankitsu. Laqyayäshuptikipis jukaq qaqllaykita kamapaykuyanki.^† 40 Pipis demandashurniki camisaykita qechuyäshuptikiqa punchuykitapis kachapäyanki. 41 Qepinta juk lëwayaq apapäyänaykipä obligashuptikiqa ishkay lëwayaqpis apapäyanki. 42 Imatapis ‘qaraykallämay’ nir mañakuyäshuptikiqa qaraykuyanki. Tsaynölla imatapis ‘mañaykallämay’ niyäshuptikiqa mañaykuyanki.

43 “Tsaynöpis musyayankimi runakuna niyanqanta: ‘Kuyanakuyanqaykiwanqa kuyanakuyanki. Chikishuqnikitaqa chikiyanki’. 44 Tsaynö niyaptinpis noqami nï: Chikishuqnikikunata kuyayanki. [Ashlliyäshuptikipis alli shimillaykipa parlapäyanki. Mana alli rikayäshuptikipis alli rikayanki. Manakaqman churayäshuptikipis y] ñakatsiyäshuptikipis paykunapä Tayta Diosta mañakuyanki. 45 Tayta Diosqa alli runakunapä y mana alli runakunapämi rupayta yarqatsimun. Tsaynöllami alli runakunapä y mana alli runakunapäpis tamyatsimun. Ciëlucho kaykaq Taytayki kuyapäkuq kanqannö qamkunapis kuyapäkuq karqa paypa wamranmi kaykäyanki.

46 “Kuyanakuyanqallaykiwan kuyanakurqa alli runa kayanqaykita ama yarpäyaytsu. Impuestu cobraq runakunapis kuyanakuyanqallanwanqa kuyanakuyanmi. 47 Amïguykikunallawan alli kawarqa ¿ima allitatä ruraykäyanki? Jutsasapa runakunapis tsaynöllaqa kawayanmi. 48 Ciëlucho kaykaq Taytayki jutsaynaq kanqannö qamkunapis jutsaynaq kayay.^†