Jakapäkuykaq runata Jesús alliyätsinqan
14
Tsaypitanami juk jamay junaqcho mandaq fariseupa wayinman Jesús mikuq aywarqan. Tsaycho kaykaq runakunanami Jesústa rikaraykäyarqan “mä imatashi ruranqa” nirnin. 2 Jesúspa ñöpanchönami entëru cuerpun jakapäkuykaq runa kaykarqan. 3 Jesúsnami ley yachatsikuqkunata y fariseukunata tapurqan: “Qeshyaykaq runata jamay junaqcho ¿alliyätsishwanku o manaku?”4 Tsaynö niptinmi paykunaqa imatapis parlakuyarqantsu. Tsaymi qeshyaykaq runata Jesús yataykur alliyätsirnin nirqan: “Kananqa wayikipana aywakuy”.
5 Tsaypitanami tsay runakunata nirqan: “Mayqaykipapis wamraykikuna o töruykikuna pözuman jeqaptin jamay junaq kaykaptinpis ¿manaku jinan höra jipiq aywayanki?”a
6 Tsaynö niptin manami ima niytapis kamäpakuyarqantsu.
Punta puntaman mana jamakunantsikpä Jesús yachatsinqan
7 Inkitanqan runakuna jamakuyänanpä punta puntamanrä aywaqta rikaykurmi Jesús nirqan: 8 “Majatsakay fiestaman inkitayäshuptiki punta puntamanqa ama jamakuyankitsu. Capazchi qamkunapita mas respitashqa runata inkitashqa kanman. 9 Tsayman jamakuyaptikiqa inkitayäshuqnikimi niyäshunki: ‘Pay jamakunanpä witikuy’. Tsaynö niyäshuptikimi penqakurnin qepaman aywar jamakuyanki. 10 Tsaypa trokinqa fiestaman inkitayäshuptiki qepaman jamakuyanki. Tsaymi inkitashuqniki shamur niyäshunki: ‘Amïgu, mas puntaman päsakamuy’. Tsaynö jamatsiyäshuptikimi qamwan jamakuqkuna respitayäshunki. 11 Runa tukuqkunaqa penqakuyman churashqami kayanqa. Qollmi shonqu kaqkunami itsanqa alliman churashqa kayanqa”.
Mikuyänanpä pikunata inkitanantsikpä Jesús ninqan
12 Tsaypitanami wayinman inkitaq fariseuta Jesús nirqan: “Pitapis mikuyänaykipä inkitarqa ama kuyanakuyanqayki kaqkunallata, ni wawqikikunallata, castaykikunallata ni imaykayuq kaq vecïnuykikunallataqa inkitankitsu. Paykunallata inkitaptikiqa trokintami qamtapis inkitayäshunki. 13 Tsaypa trokinqa inkitanki muchuqkunata, ratakunata, wiskukunata y qaprakunata. 14 Paykuna mana kutitsiyäshuptikipis alli ruraq runakuna kawayämunqan junaqmi Tayta Dios kutitsishunki”.
Mikuyänanpä inkitanqan runakunaman Jesús tinkutsinqan
15 Tsaymi mësacho Jesúswan jamaraykaq juk runa nirqan: “¡Ima kushishqarä kayanqa Tayta Diospa mandakuynincho mikuqkuna!”
16 Jesúsnami nirqan: “Juk runashi atskaq runakunata wayinman inkitanä mikuq aywayänanpä. 17 Mikuy höranashi wätayninta kachanä inkitanqan runakunata ninanpä: ‘Llapanpis listunami. Rasshi aywaykulläshun’.
18 “Tsay inkitanqan runakunashi aywayta munayänätsu. Tsayshi juknin ninä: ‘Chakratami tsayrä rantishqä. Tsaymi chakra rikaq aywar shamuyta kamäpakütsu. Noqapita ama qallayaykutsuntsu’.
19 “Jukaqnashi ninä: ‘Pitsqa yuntatami rantishqä. Tsaymi yachatsiq aywaykä. Noqapita ama qallayaykutsuntsu’.
20 “Jukaqnashi ninä: ‘Tsayrämi majatsakashqä. Tsaymi shamuyta kamäpakütsu’.
21 “Wätaynin kutiykurnashi runakuna imanö niyanqantapis patronninta willanä. Willaptinshi patronnin pasaypa ajanar wätayninta ninä: ‘Pläzakunapa y cällikunapa ras aywar muchuqkunata, wishtukunata, ratakunata y qaprakunatapis pushamuy’.
22 “Ninqannö pushaykurshi patronninta ninä: ‘Taytay, nimanqaykinöllami pushamushqä. Tsaynö kaptinpis wayikiman manarämi juntayanrätsu’.
23 “Patronninnashi ninä: ‘Nänikunapa y chakrakunapa aywar tarinqayki runakunata wayïman juntanqanyaq imaykanöpapis pushamuy. 24 Noqami nï: Puntata inkitanqäkunaqa mananami wayïcho mikuyanqanatsu’ ”.
Discïpulun kananpä Jesús yachatsinqan
25 Atskaq runakuna qatiräyaptinmi Jesús nirqan: 26 “Pipis discïpulü kayta munarqa mamanta, taytanta, warminta, tsurinkunata, wawqinkunata, paninkunata y kikinpa vïdanta kuyanqanpitapis noqata mas kuyamätsun. Tsaynö mana kuyamarqa manami discïpulü kayanmantsu. 27 Cruzninta apaqnö mana qatirämarqab manami discïpulü kayanmantsu.†
28 “Mayqaykipis wayita rurayänaykipä shumaqrämi yarpachakuyanki ushatsiyänaykipä qellayniki aypanqanta o mana aypanqantapis. 29 Cimientuykullar jaqiskiptikiqa llapan rikaqkunami jamurar niyäshunki: 30 ‘¡Kay runaqa wayita qallaskatsir manami ushatsiyta kamäpakushqatsu!’
31 “Mayqan reypis juk nacionwan manarä pelyar ¿manaku puntataqa shumaqrä yarpachakun kaynö nir: ‘Ishkay chunka waranqa (20,000) soldädukunata chunka waranqa (10,000) soldädulläwan vincishätsurä o manatsurä’? 32 Mana vincinanpä kanqanta tantiyarqa contran rey karullachörä kaykaptinmi manana pelyayänanpä willakuqkunata kachan. 33 Tsaynöllami mayqaykipis imaykaykikunata noqa raykuq mana kacharirqa discïpulü kayta kamäpakuyankitsu”.
Kachiman Jesús tinkutsinqan