Oqrakashqa üshaman Jesús tinkutsinqan
15
Jesús yachatsinqanta wiyayänanpämi impuestu cobrakuqkunapis jutsasapakunapis aywayarqan. 2 Tsayta rikaykurnami fariseukuna y ley yachatsikuqkuna jamurar niyarqan: “¿Imanirtä kay runaqa jutsasapakunawan qorikaykur mikun?”3 Tsaynö niyaptinmi tinkutsiypa yachatsir Jesús nirqan: 4 “Pipis juk pachak (100) üshankunapita jukta oqraykurqa ¿manaku isqun chunka isqun (99) kaqta jaqiykur juklla ashiq aywan? 5 Tariskirqa kushishqami matankakurkur apan. 6 Wayinman chaykatsirnami amïgunkunata y vecïnunkunatapis qayaykur nin: ‘¡Llapantsik kushikushun! ¡Oqranqä üshätami tarimushqä!’
7 “Noqami nï: Tsay runa üshanta tariykur kushikunqannöllami ciëluchöpis kushikuyan juk runallapis jutsankunata kacharir Tayta Dios munanqannöna kawaptin. Tsaynö kushikuyan isqun chunka isqun (99) alli ruraq runakunapä kushikuyanqanpitapis masrämi.
Oqrakashqa qellayman Jesús tinkutsinqan
8 “Pï warmipis chunka qellayninpita jukta oqraykurqa ¿manaku aktsita tsarirkatsir juklla wayinta pitsapakun tarinqanyaq? 9 Tariykurnami yanasankunata y vecïnankunata qayaykur nin: ‘¡Llapantsik kushikushun! ¡Oqranqä qellaynïtami tarishqä!’ 10 Tsaynömi Tayta Diospa angelninkunapis kushikuyan juk runallapis jutsanta kacharir Tayta Dios munanqannö kawaptin”.
Aywakuq chöluman Jesús tinkutsinqan
11 Mastami Jesús nirqan: “Juk runapashi ishkay tsurinkuna kanä. 12 Tsayshi qepa kaq tsurin taytanta ninä: ‘Papä, herenciäta rakipaykallämay’. Tsaynö niptinshi ishkan tsurinkunata taytan rakipänä.
13 “Tsaypita juk ishkay junaqllatanashi qepa kaq tsurin llapan chaskinqankunata rantikuskir karu markapa aywakunä. Tsaychöshi mana allikunata rurar llapan qellayninta ushanä. 14 Tsaynö ushakäpakushqa kaykaptinnashi tsay markacho pasaypa muchuy kanä. Tsayshi tsay chölu pasaypa mallaqar 15 aruyta ashiptin tsay markacho taq juk runa kuchinkunata mitsinanpä chaskinä. 16 Tsaychöshi pasaypa mallaqar kuchikunapa mikuynintapis mikuyta munanä. Tsaynö mallaqaptinpis manashi pipis qaranätsu.
17 “Tsayshi yarpachakur ninä: ‘Kaycho mallaqar kaykaptï taytäpa aruqninkunaqa pacha junta mikurchi kaykäyan. 18 Kanan kutiykur taytäta nishä: “Papä, qamta y Tayta Diosta ajätsirmi jutsata rurashqä. 19 Amana tsurikitanöqa chaskimaytsu, sinöqa aruqnikitanöllana chaskiykallämay” ’. 20 Tsaynö yarpachakuskirshi taytan kaqpa kutikunä.
“Karullatarä kutiykaqta rikaykurshi taytanqa kushikurnin cörrilla aywar makallakurkur mutsanä. 21 Tsurinnashi ninä: ‘Papä, qamtapis Tayta Diostapis ajätsirmi jutsata rurashqä. Amana tsurikitanöqa chaskimaytsu’.
22 “Tsaynö nikaptinshi wätayninkunata taytan ninä: ‘Ras mas allinnin kaq latsapakunata jipiskamur tsurïta jatitsiyay. Tsaynölla sortïjata y llanqitapis jatitsiyay. 23 Nirkur wera kaq torïtuta pishtayay fiestata rurar mikunantsikpä. 24 ¡Kay tsurïqa wanunqanpitami kawarimushqa! ¡Oqrakanqanpitami kutimushqa!’ Tsaynö nirshi fiestata rurar qallaykuyänä.
25 “Mayor kaq tsurinqa chakrachöshi kaykänä. Wayiman chaykarnashi fiestata ruraykäyaqta wiyanä. 26 Tsayshi juk wätayninta qayaykur wayicho ima päsanqantapis tapunä. 27 Wätayninnashi ninä: ‘¡Wawqikimi kutimushqa! Yamaylla kutimunqanpitami taytayki kushikur wera torïtuta pishtatsishqa’.
28 “Tsaynö willaptinshi pasaypa ajanarnin wayinman yaykuytapis munanätsu. Tsaynashi taytan aywar yaykunanpä kutin kutin ruganä. 29 Tsayshi taytanta ninä: ‘Mana yarqukuypami llapan nimanqaykikunata rurar imaypis yanapaykä. Tsaynö yanapaykaptïpis manami ni juk malta cabrallatapis qaramashqaykitsu amïgükunawan mikuyänäpä. 30 ¡Kay tsuriki prostitütakunawan qellaynikita ushaskir kutiykamuptinmi itsanqa wera torïtutarä pishtatsishqayki!’