Astütu wätayninman Jesús tinkutsinqan
16
Mastami discïpulunkunata Jesús nirqan: “Juk imaykayuq runapashi mas yärakunqan wätaynin kanä. Tsay wätayninpäshi imaykayuq runata willayänä imaykankunatapis llutalla ushanqanta. 2 Tsayta musyaskirnashi wätayninta qayaykatsir ninä: ‘Imaykätapis llutalla ushaykanqaykitami runakuna parlayan. Kananpitaqa mananami yärakunqä wätaynïnatsu kanki. Llapanta cuentata qomänaykipä kamarikuy’.3 “Wätayninnashi yarpachakur ninä: ‘Patronnï qarqamaptinqa ¡imatarä rurashä! Chakracho aruytaqa qelanämi. Limushna mañakuytapis penqakümi. 4 ¡Kananmi sï, imata ruranäpäpis musyäna! ¡Patronnï qarqamaptinpis runakuna wayinkunacho chaskiyämänanpä kaynömi rurashä!’
5 “Tsaynö yarpachakuskirshi patronninpa jaqan kaq runakunata juk jukllaylla qayaykatsir punta kaqta tapunä: ‘¿Aykatä patronnïpa jaqan kanki?’
6 “Tsay runanashi ninä: ‘Paypa jaqan kaykä ishkay pachak (200) läta aceitimi’. Tsayshi yärakunqan wätaynin ninä: ‘Juk pachak (100) lätallatana päganaykipä kay recïbucho firmay’.
7 “Tsaypitashi juknin kaqtana tapunä: ‘Qamqa ¿aykatä jaqan kaykanki?’ Tsay runanashi ninä: ‘Chusku pachak (400) säcu trïgumi’. Tsaynö niptinshi ninä: ‘Kimsa pachak (300) säcullatana päganaykipä kay recïbucho firmay’.
8 “Tsaynö musyaq yachaq kanqanta musyaykurshi patronnin alabanä. Tsay wätay musyaq yachaq kanqannömi Tayta Diosman mana yärakuqkunapis amïguta rurayänanpä yärakuqkunapitapis mas musyaq yachaq kaykäyan. 9 Noqami nï: Qamkunapis kay patsacho qellaynikikunawan y imaykaykikunawanpis muchuqkunata yanapar amïguta ashiyay. Tsaynöpami wanuyaptikipis gloriacho mana ushakaq wayiman chaskiyäshunki.
10 “Wallkallata tsararanqanwan allillata rurarqa atskata tsarararpis allitami ruranqa. Wallkallata tsararanqanwan allita mana rurarqa atskata tsarararpis manami allita ruranqatsu. 11 Kay patsacho riquëzaykikunawan runa mayikikunata mana yanapayaptikiqa ¡imanöparä Tayta Dios gloriacho riquëzakunata kamaripäyäshunkiman! 12 Jukpa kaqkunawan mana allita rurayaptikiqa Tayta Dios ¿yärakuyäshunkimantsurä töcayäshunqayki kaqta entregayäshunaykipä?a
13 “Manami pï runapis ishkay patrontaqa sirvinmantsu. Ishkay patronyuq karqa jukaqta chikirmi jukaqta kuyanqa. Jukaqta cäsur jukaqtaqa manami cäsunqatsu. Tsaynöpis imaykayuq kayllapä yarpachakurqa Tayta Diosta sirviyta manami kamäpakuyankitsu”.
14 Tsaynö yachatsinqankunata wiyarmi fariseukuna qellaypä mallaqashqa kar Jesúspita burlakur asipäyarqan. 15 Tsaynami Jesús nirqan: “Qamkuna runakunapa ñöpancho allish tukuyaptikipis Tayta Diosqa musyaykanmi shonquykikuna imanö kanqantapis. Tsaymi runakuna respitayäshuptikipis Tayta Diosqa melanäyäshunki.
Tayta Diospa palabranta cumplinanpä Jesús ninqan
16 “Tayta Diospa leyninkuna y profëtakuna qellqanqankunaqa Bautizaq Juan willakunqanyaqmi karqan. Kananqa Tayta Diospa mandakuynin chämunqantanami willakuykä. Tsaymi tsay mandakuyninman atskaq runakuna imanöpapis yaykuyta munayan. 17 Ciëluwan kay patsa ushakaptinpis leyninkunacho ninqankunataqa Tayta Dios llapantami cumplinqa.
Majayuqkuna mana rakikäyänanpä Jesús yachatsinqan
18 “Mayqan runapis warminpita rakikaskir juk warmiwan tarqa adulteriu jutsatami ruraykan. Tsaynöllami runanpita rakikashqa warmiwan tarqa adulteriu jutsata ruraykan”.
Lázarupä y imaykayuq runapä Jesús willakunqan
19 “Juk imaykayuq runashi alli latsapakunallata jatikuq. Qoyay qoyayshi fiestata rurar alli allillata mikuq. 20 Tsay imaykayuq runapa punkunchöshi juk imaynaq runa Lázaro jutiyuq jamaräkuq. Paypa entëru cuerpuntashi qeri ushanä. 21 Pasaypa mallaqarshi imaykayuq runapa mësanpita mikuy shushuqtapis munapänä. Tsaychöshi allqukuna qerinta laqwayänä. 22 Lázaro wanuskiptinnashi Abrahampa ñöpanman angelkuna apayänä. Imaykayuq runa wanuptinnashi pampayänä.
23 “Hadescho pasaypa ñakaykarshi imaykayuq runa karupita rikaskinä Abrahampa ñöpancho Lázaro kaykaqta. 24 Tsayshi qayakur ninä: ‘Tayta Abraham, kuyapaykallämay. Lázaruta kachaykallämuy dëdunta ushmarkatsir shimïta oqutsipaykamänanpä. Pasaypami kay ninacho rupar ñakaykä’.
25 “Tsaynö niptinshi Abraham ninä: ‘Hïju, yarpay imayka janancho kawanqaykita. Lázaruqa imaynaq karmi pasaypa ñakarqan. Tsaymi kananqa kaycho kushishqa kaykan y qamna tsaycho ñakaykanki. 26 Jinachöpis wanwanyaykaq raqrami rakiykämantsik. Tsaymi qam kanqaykiman pipis tsimpamuyta kamäpakuntsu ni qampis kayman tsimpamuyta kamäpakunkitsu’.
27 “Tsaynö niptinshi imaykayuq runa ninä: ‘Tayta Abraham, tsaynö kaptinqa taytäpa wayinman Lázaruta kachaykullay. 28 Tsaycho pitsqarämi wawqïkuna kayan. Kay ñakayman mana shayämunanpä paykunata willaq aywaykutsun’.
29 “Abrahamnashi ninä: ‘Moisés y profëtakuna qellqayanqankunata musyayanmi. Tsaykunata cäsukuyätsun’.
30 “Imaykayuq runanashi ninä: ‘Tayta Abraham, manami cäsukuyanqatsu. Juk runa wanunqanpita kawaskamur willakuptinmi itsanqa jutsa rurayninkunata kachariyanqa’.
31 “Tsaynö niptinshi Abraham ninä: ‘Moisés y profëtakuna qellqayanqankunata mana cäsukuykarqa wanunqanpita kawaskamur willakuptinpis manami cäsukuyanqatsu’ ”.