Majayuqkuna mana rakikäyänanpä Jesús yachatsinqan
10
Capernaúmpita aywarmi Judea provinciaman Jesús charqan. Nirkurnami Jordán mayu tsimpanman päsarqan. Tsaychöpis atskaq runakuna qorikäyaptinmi imaypis yachatsinqannölla yachatsirqan.
Marcos 10.1-31
2 Fariseukunapis tsayman aywaykurmi llutanta parlatsiyänan raykuq Jesústa tapuyarqan: “¿Warminpita runa rakikanmanku o manaku?”
3 Jesúsnami nirqan: “Moisés qellqanqancho ¿imatatä nin?”
4 Fariseukunanami niyarqan: “Moisés yachatsirqan pipis warminpita rakikayta munarqa divorciu papelta firmapaskir qarqunanpämi”.†
5 Jesúsnami nirqan: “Moisés tsaynö yachatsirqan runakuna chukru shonqu kayaptinmi. 6 Tayta Diosqa kay patsata kamar ollquta y warmitami kamarqan.† 7 Tsaymi mamanpita y taytanpita runa yarqukun warminwan mana rakikaypa tänanpä. 8 Warminwan täkurnami jukllayllanöna kayanqa. Tsaynö kaykaptinqa mananami ishkaqnatsu kayan, sinöqa jukllayllanönami.† 9 Tsaymi Tayta Dios jukllatsanqantaqa pipis rakinmantsu”.
10 Wayicho kaykarnami discïpulunkuna Jesústa tapuyarqan tsay yachatsinqanpita. 11 Tsaymi Jesús nirqan: “Mayqan runapis warminpita rakikaskir juk warmiwan tarqa adulteriu jutsatami ruran. 12 Tsaynöllami mayqan warmipis runanpita rakikaskir juk runawan tarqa adulteriu jutsata ruraykan”.†
Wamrakunapä Tayta Diosta Jesús mañakunqan
13 Tsaypitanami wamrakunata Jesús kaqman apayarqan umankunata yataykur Tayta Diosta mañakunanpä. Apaqkunata discïpulunkuna michaykaqta 14 rikaykurmi Jesús ollqutupar nirqan: “Wamrakunata apayämunanta ama michäyaytsu. Wamranö kaqkunapämi Tayta Diospa mandakuynin kaykan. 15 Rasunpaypami nï: Pipis Tayta Diospa mandakuyninta wamranö mana chaskirqa manami paypa mandakuyninman yaykunqatsu”.
16 Tsaynö nirmi wamrakunata marqarkur umanta yataykurnin Tayta Diosta mañakurqan.
Imaykayuq runa ajatarä salvakunanpä Jesús ninqan
17 Tsaypita Jesús aywaykaptinmi juk chölu cörrilla aywar puntanman qonqurikuykur nirqan: “Rabí, alli runami kanki. ¿Imatatä ruräman mana ushakaq kawayta tarinäpä?”
18 Jesúsnami nirqan: “¿Imanirtä alli runa kanqäta nimanki? Tayta Diosllami alliqa. 19 Musyankimi mandamientukuna ninqanta: ‘Ama runa mayikita wanutsinkitsu.† Ama majaykita qanratankitsu.† Ama suwakunkitsu.† Ama manakaqkunata pitapis tumpankitsu.† Ama runa mayikita llullapankitsu. Mamaykita y taytaykita alli rikanki†’ ”.
20 Tsay runanami nirqan: “Rabí, tsaykunataqa wamra kanqäpita patsami llapanta cumplishqä”.
21 Tsaymi Jesús rikaykur kuyaparnin nirqan: “Jukrämi cumplinaykipä pishin. Llapan imaykaykikunatapis rantikuskir tsay qellayta muchuqkunata qaray. Tsaynö ruraptikiqa ciëluchömi riquëzayki kanqa. Nirkur [cruznikita umrukurkur] qatirämay”.
22 Tsaynö niptinmi pasaypa imaykayuq kar tsay chölu llakishqa aywakurqan. 23 Tsaymi wakpa kaypa rikachakuskir discïpulunkunata Jesús nirqan: “¡Pasaypa ajami imaykayuq runakuna Tayta Diospa mandakuyninman yaykuyänanpä!”
24 Tsaynö niptinmi discïpulunkuna mantsakashqa kayarqan. Tsaymi Jesús yapay nirqan: “Kuyay wamräkuna, ¡pasaypa ajami [imaykayuq kayninman yärakuq runakuna] Tayta Diospa mandakuyninman yaykuyänanpä! 25 Imaykayuq runa Tayta Diospa mandakuyninman yaykunqanpitaqa mas rasllami camëllupis awjapa uchkunpa ullkunman”.†
26 Tsaynö niptinmi discïpulunkuna masrä mantsakar kikinkunapura parlayarqan: “Tsaynö kaptinqa ¿pirä salvakunqa?”
27 Paykunata rikaykurmi Jesús nirqan: “Runakuna salvakunanpäqa pasaypa ajami kaykan. Tayta Diospämi itsanqa imapis ajatsu”.
28 Pedrunami nirqan: “Taytay, noqakunaqa llapan imaykäkunatapis jaqiskirmi qamta qatiraykäyä”.
29 Jesúsnami nirqan: “Rasunpaypami nï: Pipis wayinta, wawqinkunata, paninkunata, mamanta, taytanta, [warminta,] tsurinkunata y chakrankunatapis noqa raykuq y alli willakuynï raykuq jaqiq kaqqa 30 kay vïdacho juk pachak (100) kuti mastami chaskinqa. Tsaynöpami wayinkuna, wawqinkuna, paninkuna, mamankuna, tsurinkuna y chakrankunapis paypa kayanqa. Itsanqa chaskikamanqanpitami chikiyanqa. Tsaynö kaptinpis wak vïdacho mana ushakaq kawaytami tarinqa. 31 Atskaqmi kanan respitashqa kaykaqkuna manakaqman churashqa kayanqa. Manakaqman churashqa kaqkunanami respitashqa kayanqa”.
Wanutsiyänanpä kanqanta Jesús yapay willakunqan
32 Jerusalénpa aywar discïpulunkunapa puntantami Jesús aywarqan. Jerusaléncho wanutsiyta munayanqanta musyarmi discïpulunkuna y paywan aywaqkunapis mantsariykar aywayarqan. Tsaymi chunka ishkay discïpulunkunata jukläman qayaskir ima päsananpä kanqantapis willar Jesús nirqan:
Marcos 10.32-52
33 “Musyayankimi Jerusalénman aywaykanqantsikta. Tsaychömi Runapa Tsurinta prësu tsariskir mandaq sacerdötikunaman y ley yachatsikuqkunaman apayanqa. Paykunami wanutsiyänanpä condenayanqa. Mana Israel autoridäkunapa makinman entregayaptinmi 34 asipäyanqa, castigayanqa, toqapäyanqa y wanutsiyanqa. Tsaynö kaptinpis kimsa junaqtaqa kawarimunqami”.
Santiago y Juan rugakuyanqan
35 Tsaypitanami Zebedeupa tsurinkuna Santiago y Juan Jesúsman witiykur niyarqan: “Rabí, rugakuyälläshayki”.
36 Jesúsnami nirqan: “¿Imallatarä rugakamayta munaykäyanki?”
37 Paykunanami niyarqan: “Mandaq kanaykipä Tayta Dios churashuptiki juknïta derëchaykiman y juknïtana itsuqnikiman jamatsiyämanki”.
38 Jesúsnami nirqan: “Imata mañakayämanqaykitapis manami musyayankitsu. ¿Noqa upunäpä kaq cöpataa upuyankimantsurä? ¿Awantayankimantsurä bautizayämänanpä kanqannö bautizayäshuptiki?”b
39 Tsaymi niyarqan: “Awmi, taytay”.
Jesúsnami nirqan: “Rasunpaypami noqa upunäpä kaq cöpata upuyanki y bautizayämänanpä kanqannömi bautizayäshunki. 40 Tsaynö kaptinpis derëchäman ni itsuqnïman jamatsinäpä manami noqapitatsu kaykan. Tsaymanqa jamayanqa Taytä munanqan kaqkunallami”.
41 Tsay rugakuyanqanta wiyaykurmi wakin kaq discïpulunkuna Juanta y Santiaguta ajapäyarqan. 42 Tsaymi discïpulunkunata qayaykur Jesús nirqan: “Musyayanqaykinöpis nación mandaq runakunaqa runakunata munayanqantami ruratsiyan. 43 Qamkunachöqa manami tsaynö kanmantsu. Mayqaykipis mandaq kayta munarqa wätaynölla runa mayikikunata yanapayay.† 44 Alli rikashqa kayta munarqa pïmaypäpis wätaynölla kayay.† 45 Runapa Tsurinpis manami sirvishqa kananpätsu shamushqa, sinöqa sirvinanpämi† y runakuna raykuq wanur atskaqta salvananpämi”.
Bartimeuta Jesús alliyätsinqan
46 Tsaypitanami Jericó markaman chäyarqan. Jericópita discïpulunkunawan y mas atskaq runakunawan yarquykäyaptinmi Timeupa tsurin Bartimeo limushnata mañakur nänicho jamaraykarqan. Payqa qaprami karqan. 47 “Nazaret runa Jesúsmi päsaykan” niyaptinmi qayakur nirqan: “¡Davidpa Tsurin Jesús, kuyapaykallämay!”
48 Tsaynö qayakuptinmi upällakunanpä runakuna ollqutupäyarqan. Ollqutupäyaptinpis masrämi qayakur nirqan: “¡Davidpa Tsurin, kuyapaykallämay!”
49 Qayakunqanta wiyaskirmi Jesús ichiykur tsay qaprata qayatsirqan. Tsaymi qaprata runakuna niyarqan: “Kallpata tsariy. Jesúsmi qayashunki. Ras aywashun”.
50 Tsaynö niyaptinmi ras shärirkur punchunta jitaskir Jesús kaqman aywarqan. 51 Jesúsnami tapurqan: “¿Imacho yanapanätatä munanki?”
Qapranami nirqan: “¡Rabí, ñawï alliyänantami munä!”
52 Jesúsnami nirqan: “Kananqa aywakuyna. Yärakamunqaykipitami ñawiki rikanqa”.
Tsaynö niptinmi jinan höra ñawin kichakaskirqan. Tsaypitanami Jesúspa qepanta aywarqan.