Peonkunaman tinkutsiypa Jesús yachatsinqan
20
“Kananmi Tayta Diospa mandakuynin imanö kanqantapis tantiyatsiyäshayki. Juk runashi üva chakrancho arutsinanpä tutalla peonkuna ashiq aywanä. 2 Peonta tariykurshi juk jornalta pägananpä parlaskir üva chakranman aruq kachanä.3 “Tsaypita tuta jamay höranö pläzapa yapay aywarshi runakuna aruyniynaq kaykäyaqta tarinä. 4 Tsayshi ninä: ‘Qamkunapis üva chakrächo aruyänaykipä aywayay. Aruyanqaykipitaqa pägayäshaykimi’. Tsaynö niptinshi paykunapis aywayänä.
5 “Pullan junaqpis y tardi jamay hörapis yapayshi peón ashiq aywanä. Tariykurshi wakin kaqtanölla chakranman kachanä.
6 “Tsaypita peonkuna yarquyänanpä juk höranö pishiykaptinshi yapay aywar runakuna aruyniynaq kaykäyaqta tarinä. Tsayshi ninä: ‘¿Imanirtä qoyat imatapis mana ruraypa kaykäyanki?’
7 “Paykunanashi niyänä: ‘Taytay, manami pipis minkakayämashqatsu’.
“Tsayshi ninä: ‘Qamkunapis chakräman aruq aywayay’.
8 “Tsakaykaptinnashi capatazninta ninä: ‘Aruqkunata qayaskamur llapanta juk jornalta pägay.† Tardirä yaykuqkunata puntata päganki y tutapita aruqkunataqa qepatarä päganki’. 9 Ninqannöllashi tardirä aruq yaykuqkunata juk jornal complëtuta päganä. 10 Tsayta rikaykurshi tutapita aruqkunaqa yarpäyänä mas atskata chaskiyänanpä kayanqanta. Tsaynö yarparpis juk jornalllatashi paykunapis chaskiyänä. 11 Tsayshi chakrayuqta reclamar 12 niyänä: ‘Tardirä yaykamuqkuna juk höralla aruykäyaptinqa ¿imanirtä noqakunataqa pasaypa achaycho aruykäyaptï paykunatanölla pägaykäyämanki?’
13 “Tsaynö niyaptinshi chakrayuq runa ninä: ‘Amïgu, parlanqantsiknömi pägaykä. Manami engañaykätsu. 14 Pägaykaptïnaqa upälla aywakuyay. Tardi yaykamuqkunatapis qamkunatanöllami pägaykä. 15 Qamkunaqa aykata pägaptïpis ¿ima cuentayuqtä kayanki? ¿Alli runa kanqäpitaku ajanäyanki?’ ”
16 Tsaypitanami Jesús nirqan: “Tsaynöllami qepa kaqkuna puntacho kayanqa. Punta kaqkunanami qepacho kayanqa.a [Atskaqta qayarpis wallkaqllatami Tayta Dios akranqa]”.†
Wanutsiyänanpä kanqanta Jesús yapay willakunqan
17 Jerusalénman aywaykäyanqanchömi chunka ishkay discïpulunkunata jukläman qayaskir Jesús nirqan: 18 “Musyayankimi Jerusalénman aywanqantsikta. Tsaychömi Runapa Tsurinta prësu tsariskir mandaq sacerdötikunaman y ley yachatsikuqkunaman apayanqa. Paykunami wanutsiyänanpä condenayanqa. 19 Mana Israel autoridäkunapa makinman entregayaptinmi asipäyanqa, castigayanqa y crucificayanqa. Tsaynö kaptinpis kimsa junaqtaqa kawarimunqami”.
Santiagupa y Juanpa maman rugakunqan
20 Tsaypitanami Zebedeupa warmin wawankunata pushakurkur Jesús kaqman charqan. Jesúspa ñöpanman qonqurikuykurmi nirqan: “Taytay, rugakulläshayki”.
21 Jesúsnami nirqan: “¿Imallatarä rugakamayta munaykanki?”
Tsaymi tsay warmi nirqan: “Taytay, mandakuynikicho kaykar kay ishkan wawäkunata churaykullanki yanapayäshunaykipä. Jukta jamaykatsinki derëchaykiman y jukaqtana itsuqnikiman”.
22 Jesúsnami nirqan: “Imata mañakayämanqaykitapis manami musyayankitsu. ¿Noqa upunäpä kaq cöpatab upuyankimantsurä? [¿Awantayankimantsurä bautizayämänanpä kanqannö bautizayäshuptiki?]”c
Tsaymi niyarqan: “Awmi, taytay”.
23 Jesúsnami nirqan: “Rasunpaypami noqa upunäpä kaq cöpata upuyanki [y bautizayämänanpä kanqannömi bautizayäshunki]. Tsaynö kaptinpis derëchäman ni itsuqnïman jamatsinäpä manami noqapitatsu kaykan. Tsaymanqa jamayanqa Taytä munanqan kaqkunallami”.
24 Tsay rugakuyanqanta wiyaykurmi wakin kaq discïpulunkuna Juanta y Santiaguta ajapäyarqan. 25 Tsaymi discïpulunkunata qayaykur Jesús nirqan: “Musyayanqaykinöpis nación mandaq runakunaqa runakunata munayanqantami ruratsiyan. 26 Qamkunachöqa manami tsaynö kanmantsu.† Mayqaykipis mandaq kayta munarqa wätaynölla runa mayikikunata yanapayay. 27 Alli rikashqa kayta munarqa wätaynölla runa mayikikunata yanapayay.† 28 Runapa Tsurinpis manami sirvishqa kananpätsu shamushqa, sinöqa sirvinanpämi y runakuna raykuq wanur atskaqta salvananpämi”.†
Ishkay qaprakunata Jesús alliyätsinqan
29 Jericó markapita discïpulunkunawan Jesús aywakuptinmi atskaq runakuna qepanta aywayarqan. 30 Tsay nänichömi ishkay qaprakuna jamaraykäyarqan. Paykunami Jesús päsaykanqanta musyaskir qayakur niyarqan: “¡Davidpa Tsurin Tayta Jesús, kuyapaykayällämay!”
31 Tsaymi upällakuyänanpä ollqutupäyarqan. Ollqutupäyaptinpis qaprakunaqa masrämi qayarar niyarqan: “¡Davidpa Tsurin Jesús, kuyapaykayällämay!”
32 Jesúsnami tsay qaprakunata qayaykur tapurqan: “¿Imacho yanapanätatä munayanki?”
33 Qaprakunanami niyarqan: “Taytay, ñawïkuna rikanantami munayä”.
34 Tsaymi kuyaparnin ñawinkunata yataykuptin jinan höra alliyaskiyarqan. Alliyaskirnami Jesúspa qepanta aywayarqan.