Jerusalénman Jesús yaykunqan
21
Jerusalénman Jesús aywarmi Olivos jirkancho Betfagé markaman chäyarqan. Tsaypitanami ishkay discïpulunkunata kachar 2 nirqan: “Taqay markaman aywayay. Chaykurmi malta wawayuq ashnu wataraykaqta tariyanki. Tsay ashnuta paskaskir wawantinta apayämuy. 3 Pipis tapuyäshuptikiqa niyanki: ‘Señor Jesúsmi ministin. Rasllami kutitsiyämunqa’ ”.4 Tsaynöpami Tayta Diospa profëtan kaynö qellqanqanta cumplirqan:
5 “Sión runakunata willay:
‘Rikayay mandashuqniki rey shamuykaqta.
Qollmi shonqu karmi ashnun muntashqa shamuykan.
Malta ashnun muntashqami shamuykan’ ”.†
6 Discïpulunkuna aywarmi Jesús ninqannölla rurayarqan. 7 Mamantinta apaykur punchunkunata karunaparkuyaptinmi malta ashnun muntashqa Jesús aywarqan. 8 Tsaynö aywaptinmi atskaq runakuna kushikur punchunkunata näniman mashtayarqan. Tsaynöllami wakinkunapis palmakunapa llimllankunata pakiskir näniman mashtayarqan. 9 Tsaymi puntanta y qepanta aywaqkuna kushikur niyarqan: “¡Hosana!a ¡Davidpa Tsurin alabashqa kaykullätsun! ¡Tayta Diospa jutincho shamuq runa alabashqa kaykullätsun! ¡Ciëluchöpis alabashqa kaykullätsun!”†
10 Jerusalénman Jesús yaykuptinmi tsaycho kaykaq llapan runakuna jukninpis jukninpis tapunakuyarqan: “¿Pirä kay runa?” nir.
11 Jesúswan aywaq runakunanami niyarqan: “Payqa Galileacho kaykaq Nazaretpita shamuq profëta Jesúsmi”.
Templucho rantikuqkunata qarqunqan
12 Templupa patiunman yaykuskirnami rantikuqkunata y rantipakuqkunatapis Jesús qarqurqan. Tsaynöllami qellay trukatsiqkunapa mësankunatapisb y paluma rantikuqkunapa sïllankunatapis jitar usharqan. 13 Qarqurmi nirqan: “Tayta Diospa palabrancho kaynömi qellqaraykan: ‘Wayïqa runakuna mañakayämänanpämi kanqa’.† Tsaynö nikaptinpis qamkunaqa suwakunapa machayninmanmi tikratsiyashqayki”.†
14 Templupa patiuncho kaykaptinmi qaprakuna y weqrukunapis Jesúsman witiyarqan. Paykunataqa llapantami alliyätsirqan. 15 Tsaychömi wamrakunapis payta alabar niyarqan: “¡Hosana! ¡Davidpa Tsurinta alabashun!”
Runakunata Jesús alliyätsiqta rikaykur y wamrakuna alabaykaqta wiyarmi mandaq sacerdötikuna y ley yachatsikuqkunapis pasaypa ajäyarqan. 16 Tsaynami Jesústa niyarqan: “¿Wiyankiku kay wamrakuna niyanqanta?”
Jesúsnami nirqan: “Awmi. ¿Manaku liyiyashqayki Diospa palabrancho qellqaranqanta? Tsaychömi nin: ‘Pishi wamrakuna y chuchuykaq wamrakunapis alabayäshunkimi’ ”.†
17 Tsaynö niskirmi paykunata jaqiskir Betania markaman kutirqan tsaycho patsakunanpä.
Hïgus jacha tsakinanpä Jesús ninqan
18 Waraynin tuta Jerusalénman Jesús kutiykarmi mallaqaskirqan. 19 Tsaymi näni kuchuncho hïgus jachata rikaykur wayuyninta ashiq aywarqan. Raprallanta tariykurmi nirqan: “¡Kananpitaqa manami imaypis wayunkinatsu!”
Tsaynö niptinmi jinan höra hïgus jacha tsakiskirqan.c 20 Tsayta rikaykurmi discïpulunkuna mantsakashqa parlar niyarqan: “¿Imanöpatä hïgus jacha jinan höra tsakiskishqa?”
21 Jesúsnami nirqan: “Rasunpaypami nï: Llapan shonquykikunawan Tayta Diosman yärakurqa manami kay hïgus jachata tsakitsinqänöllatsu rurayanki, sinöqa taqay jirkata: ‘Kaypita lamarman ayway’ niyaptikipis aywanqami.† 22 Llapan shonquykiwan yärakur imatapis Tayta Diosta mañakurqa chaskiyankimi”.
Jesústa sacerdötikuna tapuyanqan
23 Tsaypita templupa patiunman yaykuskir yachaykätsiptinnami mandaq sacerdötikuna y Israel mayor runakuna Jesústa tapuyarqan: “Qamqa ¿pipa munayninwantä rantikuqkunata qarqushqayki? ¿Pitä tsaynö qarqunaykipä nishushqayki?”
24 Jesúsnami nirqan: “Qamkunatapis mä tapuyäshayki. Tapunqäta niyämaptikiqa noqapis willayäshaykimi pipa munayninwan qarqunqäta. 25 ¿Pitä Juanta kachamushqa bautizananpä? ¿Tayta Diosku o runakunallaku?”
Tsaynö tapuptinmi kikinkunapura niyarqan: “Tayta Dios kachamunqanta nishqaqa: ‘¿Imanirtä criyiyashqaykitsu?’ nimäshunmi. 26 Runakuna kachayämunqanta nishqaqa contrantsikmi runakuna shäriyanqa. Juan profëta kanqantami llapan yarpäyan”.
27 Tsaymi Jesústa niyarqan: “Manami musyayätsu pï kachamunqantapis”.
Jesúsnami nirqan: “Noqapis manami willayäshaykitsu pipa munayninwan rantikuqkunata qarqunqäta”.
Juk runapa ishkay tsurinkunaman Jesús tinkutsinqan
28 “¿Ima niyankitä? Juk runapashi ishkay tsurinkuna kanä. Mayor kaq tsurintashi ninä: ‘Hïju, kanan junaq üva chakrächo arur yanapaykamay’. 29 Tsaynö rugakuptinshi awninätsu. Mana awniykarpis yarpachakuskirqa aywanäshi. 30 Mayor tsurinta rugakunqannöllashi qepa kaq tsurintapis rugakunä. Tsayshi tsurin ninä: ‘Papä, yanapashayki ari’. Tsaynö awniskirpis manashi aywanätsu.
31 “Kanan mä niyämay. ¿Mayqantä taytan munanqanta rurashqa?”
Tsaynö niptinmi niyarqan: “Mayor kaq tsurinmi”.
Tsaymi Jesús nirqan: “Rasunpaypami nï: Tsay mayor kaq tsurin kanqannömi Romapä impuestu cobraqkuna y prostitüta warmikunapis kaykäyan. Paykunaqa qamkunapita mas puntatami Tayta Diospa mandakuyninman yaykuykäyan. 32 Tayta Dios munanqannö kawayänaykipä Bautizaq Juan yachatsiyäshuptikipis qamkunaqa manami cäsukuyashqaykitsu. Impuestu cobraqkuna y prostitüta warmikunami itsanqa willakunqanta cäsukuyashqa.† Tsayta rikaykarpis qamkunaqa willakunqanta manami cäsukuyashqaykitsu ni jutsaykikunata kachariyashqaykitsu”.
Chakra arrendaq runakunaman tinkutsiypa Jesús yachatsinqan
33 “Mas juktapis tinkutsiypa yachatsiyäshayki: Juk runashi chakranman üvata plantaykatsir† entëru kuchunpa pirqatsinä. Üvata jaruyänanpäshi pözuta ruratsinä. Chakranta täpananpäshi törritapis shäritsinä. Llapanta ruraskatsirnashi chakranta arrendakuskir juklä markapa aywakunä.
34 “Cosëcha qallaykuptinnashi üva chakra arriendunpita cobrayämunanpä wätayninkunata kachanä. 35 Chaykuyaptinshi chakra arrendaqkunaqa tsay wätaykunata jukta maqayänä, jukta wanutsiyänä y jukta saqmar ushayänä. 36 Tsayshi chakrayuq runaqa puntata kachanqanpita mas atskaqtana wätayninkunata kachanä. Paykunatapis tsaynöllashi rurayänä.
37 “Tsaypitanashi kikinpa tsurintana kachanä ‘tsurïtaqa respitayanqami’ nir. 38 Tsayshi tsurin aywaykaqta rikaykur chakra arrendaqkuna willanakur niyänä: ‘Taqaymi kay chakrawan quëdanqa. Chakranwan quëdakunantsikpä wanuskatsishun’. 39 Chaykuptinnashi willanakuyanqannölla üva chakrapita jukläman apaykur wanuskatsiyänä”.
40 Tsaynö willakuskirnami Jesús nirqan: “Tsay üva chakrayuq kutiykur ¿imatatä tsay runakunata ruranqa?”
41 Tsaymi niyarqan: “Tsay mana alli runakunata mana kuyapaypami wanutsinqa. Nirkurmi cada cosëchacho pägaq kaqtana chakranta arrendakunqa”.
42 Jesúsnami nirqan: “¿Manaku liyiyashqayki Tayta Diospa palabranta? Tsaychömi nin:
“ ‘Wayi shäritsiqkuna “kay rumiqa manami allitsu” nir jitariyanqanmi wayi esquïnan cimientuchöna churaraykan.
Tsaynö kananpä Tayta Diosmi kamakätsishqa.
Tsaypitami pasaypa espantashqa kaykantsik’.d †
43 “Tsaymi qamkunata nï: Mandakuyninta qechuskiyäshurnikimi cäsukuq runakunatana Tayta Dios entreganqa. 44 Pipis tsay rumiman ishkirqa ushakanqami. Tsaynöllami pipa jananmanpis tsay rumi charqa ushakätsinqa”.