Majatsakay fiestaman tinkutsiypa Jesús yachatsinqan
22
Mastapis tinkutsiypa yachatsirmi Jesús nirqan: 2 “Tayta Diospa mandakuyninqa majatsakay fiestanömi. Juk reyshi ollqu tsurin majatsakaptin fiestata ruranä. 3 Tsayshi wätayninkunata kachanä inkitanqan runakunata qayamunanpä. Qayatsiptinpis manashi aywayta munayänätsu. 4 Tsaypitashi wakin wätayninkunatana kachar ninä: ‘Törükunata y wera kaq torïtukunatapis pishtaskatsir maynami kusinatsishqäna. Llapanpis kamarishqanami kaykan. Inkitanqä runakuna shayämutsunna’. 5 Tsaynö nir qayatsiptinpis manashi mayqanpis fiestaman aywayänätsu. Wakinshi aruq aywayänä. Wakinshi negociun rantikuq aywayänä. 6 Wakinnashi reypa wätayninkunata maqar wanutsiyänä.7 “Tsayshi reyqa pasaypa ajar soldädunkunata kachanä. Chaykurnashi wätaynin wanutsiq runakunata wanuskatsir markantapis rupatsiyänä. 8 Tsaypitanashi wätayninkunata ninä: ‘Tsurï majatsakänanpä llapanpis kamarishqanami kaykan. Tsaynö kaptinpis inkitanqä runakuna manakaqman churamarmi shayämushqatsu. 9 Kananqa nänikunapa aywar tariyanqayki kaq runakunata qayayämuy majatsakay fiestaman shayämunanpä’.
10 “Tsaynö niptinshi wätayninkuna nänikunapa aywar llapan tariyanqan runakunata willayänä. Tsayshi alli runapis mana alli runapis wayiman juntaqpä fiestaman chäyänä. 11 Inkitanqan runakunata rikaq yaykurshi tsay rey rikanä juk runa trukakunni kaykaqta. 12 Tsayshi tsay runata tapunä: ‘Amïgu, majatsakay fiestaman inkitaykaptïqa ¿imanirtä mana trukakuyllapa shamushqayki?’ Tsaynö tapuptinshi tsay runa ima niytapis kamäpakunätsu. 13 Tsayshi wätayninkunata rey ninä: ‘Kay runata chakipita makipita pankaykur mantsaypä tsakayman jitarpuyay. Tsaychömi pasaypa waqar kiruntapis uchunqa’ ”.†
14 Tsaypitanami Jesús nirqan: “Atskaqtami Tayta Dios qayashqa. Tsaynö kaptinpis wallkaqllatami akrashqa”.
Impuestuta pägayänanpä Jesústa tapuyanqan
15 Tsaypitanami fariseukuna templupita yarquskir Jesústa imanöpapis llutanta parlatsiyänanpä willanakuyarqan. 16 Tsaymi shumaq yachaskatsir fariseukuna kachayarqan discïpulunkunata y Herodespa janan shäriq runakunata. Paykunami Jesústa niyarqan: “Rabí, noqakuna musyayämi rasun kaqllata yachatsinqaykita. Manami runakuna alabayäshunaykita munartsu yachatsinki, tsaypa trokinqa Tayta Dios munanqannöllami. 17 Kanan mä niyämay. Romacho mandaq Césarpä ¿impuestuta pägashwanku o manaku?”a
18 Llutanta parlatsiyänanpä tapuyanqanta tantiyarmi Jesús nirqan: “¡Allish tukuq runakuna! ¿Imanirtä llutanta parlatsimayta munayanki? 19 Mä impuestu pägana qellayta rikatsiyämay”.
Tsaynö niptinmi tsararäyanqan qellayta Jesústa aptatsiyarqan. 20 Tsayta rikaykurmi Jesús tapurqan: “Kay qellaycho ¿pipa reträtuntä kaykan? Tsaynöpis ¿pipa jutintä qellqaraykan?”
21 Paykunanami niyarqan: “Mandaq Césarpami”.
Jesúsnami nirqan: “Césarpa kaqtaqa Césarta entregayay. Tayta Diospa kaqtaqa Tayta Diosta entregayay”.b
22 Tsaynö ninqanta wiyaykurmi tsay runakuna mantsakashqa aywakuyarqan.
Wanushqakuna kawariyämunanpä kanqanta Jesústa tapukuyanqan
23 Tsay junaqllami saduceukuna Jesústa tapuq aywayarqan. Paykunaqa manami criyiyantsu wanuqkuna kawariyämunanpä kanqanta.† 24 Tsaymi Jesústa tapuyarqan: “Rabí, Moisés qellqanqanchömi nin: ‘Warmiyuq runa tsuriynaq wanuptin wawqinmi llumtsuynin viüdawan tanqa. Tsaynöpami wamrankuna kaptin tsay wanuq wawqinpa tsurinkunanö kayanqa’.† 25 Kanan niyäshayki. Juk kutishi qanchis wawqikuna kayänä. Mayor kaqshi juk warmiwan tänä. Payshi manarä tsurin kaptin wanunä. Tsayshi qepa kaq wawqinna tsay viüdawan tänä. 26 Paypis tsurin manarä kaptinshi wanunä. Tsaypita mas qepan kaqnashi tsay viüdawan tänä. Paypis tsurin manarä kaptinshi wanunä. Tsaynöllashi llapan wawqinkuna tsay viüdallawan täyänä. Tsurinkuna manarä kaptinshi llapanpis wanuyänä. 27 Tsaypitanashi tsay viüdapis wanukunä. 28 Wanushqakuna kawariyämunan junaqqa ¿mayqanpa warminrä kanqa, qanchis wawqiwan tashqa kaykaptinqa?”
29 Jesúsnami nirqan: “Qamkunaqa llutantami yarpäyanki. Manami Tayta Diospa palabrantapis ni Tayta Dios munayyuq kanqantapis tantiyayankitsu. 30 Kawaskamurqa mananami pipis majatsakanqanatsu, tsaypa trokinqa ciëlucho [Tayta Diospa] angelninkunanöllanami kayanqa. 31 Wanushqakuna kawariyämunanpä kanqanta ¿manaku Tayta Dios niyäshunqaykita liyiyashqayki? Palabranchömi nin: 32 ‘Noqaqa Abrahampa, Isaacpa y Jacobpa Diosninmi kaykä’.† Tayta Diosqa manami wanushqakunapa Diosnintsu, tsaypa trokinqa kawaqkunapa Diosninmi”.
33 Tsaynö yachatsinqanta wiyaykurmi runakuna pasaypa kushikuyarqan.
Mas cäsukunantsikpä kaq mandamientu
34 Saduceukunata upällatsinqanta musyaykurmi fariseukuna Jesús kaqman qorikäyarqan. 35 Tsaychömi ley yachatsikuq juk fariseo runa Jesús yachanqanta o mana yachanqantapis musyayta munar tapurqan: 36 “Rabí, ¿mayqan mandamientutatä mas cäsukushwan?”
37 Tsaynö tapuptinmi Jesús nirqan: “ ‘Tayta Diosta kuyayanki llapan shonquykikunawan, llapan voluntänikikunawan y llapan yarpaynikikunawan’.† 38 Kay mandamientumi llapan mandamientupitapis mas cäsukunantsikpä kaykan. 39 Tsaynöllami juk mandamientupis nin: ‘Kikiki kuyakunqaykinö runa mayikita kuyanki’.† 40 Tsay ishkan mandamientuta cumplirqa Moisés qellqanqan llapan mandamientukunata y profëtakuna willakuyanqantami cumpliykäyanki”.†
Davidpitapis Cristo mas munayyuq kanqan
41 Fariseukuna tsaycho qorikashqa kaykäyaptinmi Jesús tapurqan: 42 “Cristo ¿pï kanqantatä yarpäyanki? ¿Pipa Tsurintä kaykan?”
Tsaynö tapuptinmi niyarqan: “Tayta, Davidpa Tsurinmi”.c
43 Jesúsnami nirqan: “Davidpa Tsurin kaykaptinqa ¿imanirtä Espíritu Santu tantiyatsiptin kikin Davidpis mandaqnin rey kanqanta nirqan? Pay ninqanqa kaynö nirmi qellqaraykan:
44 “ ‘Mandamaqnïtami Tayta Dios nirqan:
“Derëchäman jamakamuy llapan chikishuqnikikunata munaynikiman churamunqäyaq” ’.†
45 Kikin Davidpis mandaqnin rey kanqanta nikaptinqa ¿imanöpatä Cristuqa Davidpa Tsurin kanman?”d
46 Tsaynö niptin manami pipis contestayta kamäpakurqantsu. Tsay junaqpitaqa manami pipis Jesústa tapuyta valurarqannatsu.