Qanchis chunka ishkay discïpulunkunata Jesús kachanqan
10
Tsaypitanami qanchis chunka ishkaya (72) discïpulunkunata akraskir ishkay ishkay Señor Jesús kacharqan pay chänanpä kaq markakunaman. 2 Kacharmi nirqan: “Cosëcha qoriypä kanqannömi atskaq runakunapis Tayta Diospa willakuyninta chaskikuyänanpä kaykäyan. Tsaynö kaptinpis wallkaqllami willakuqkuna kayan. Willakuqkunata kachamunanpä Tayta Diosta mañakuyay”.3 “Kanan willakuq aywayay. Löbukunaman üshakunata qaykuqnömi qamkunata kachaykä. 4 Aywar ama apayankitsu qellayta, qepikikunata ni llanqikikunatapis. Piwanpis nänicho tinkuskir parlakur ama ichiräkuyankitsu.
5 “Pipa wayinmanpis charqa niyanki: ‘Alli kaway qamkunacho kaykullätsun’. 6 Alli chaskiyäshuptikiqa niyanqaykinömi alli kaway kanqa. Mana chaskiyäshuptikimi itsanqa alli kaway kanqatsu. 7 Wayin wayinqa ama puriyankitsu, tsaypa trokinqa patsatsiyäshunqayki wayillacho kakuyanki. Qarayäshunqaykita mikuyanki y upuyanki. Arupakuq runa päguta chaskinanpä derëchun kanqannömi qamkunapapis qarayäshunaykipä derëchuykikuna kaykan.
8 “May markaman chäyaptikipis chaskiyäshuptikiqa qarayäshunqaykita mikuyanki. 9 Tsay markacho qeshyaykaqkunata alliyätsir niyanki: ‘¡Tayta Diospa mandakuynin chämushqanami!’ 10 May markachöpis mana chaskiyäshuptikiqa cälliman yarquskir niyanki: 11 ‘Kikikikuna jutsayuq kayanqaykita musyayänaykipämi markaykikunapa polvun chakïkunacho kaykaqtapis tapsikuyä. Ima kaptinpis musyayay Tayta Diospa mandakuynin chämunqanta’.
12 “Noqami nï: Sodoma runakunata castiganqanpitapis mas peormi juiciu finalcho tsay runakunata Tayta Dios castiganqa.†
13 “¡Allaw, Corazín runakuna! ¡Allaw, Betsaida runakuna! Markaykikunacho milagrukunata ruranqänö Tiro y Sidón markakunacho† rurashqa kaptïqa maynami jutsankunata kacharir qachqa latsapata jatikurkur uchpa janancho jamaräyanman karqan. 14 Tsaymi Tiro y Sidón runakunata castiganqanpitapis mas peorrä juiciu finalcho Tayta Dios castigayäshunki. 15 Capernaúm runakuna, ¿ciëluman chäyänaykipä kanqantaku yarpäyanki? Qamkunaqa Hadesman qaykushqami kayanki”.†
16 Tsaypitanami discïpulunkunata nirqan: “Qamkuna willakuyanqaykita chaskikurqa noqatami chaskiyäman. Qamkunata mana chaskiyäshurnikiqa noqatapis manami chaskiyämantsu. Noqata mana chaskimarqa kachamaqnïtapis manami chaskiyantsu”.
Willakuq aywaqkuna kutiyanqan
17 Qanchis chunka ishkay (72) aywaqkuna kushishqa kutiykurmi Jesústa willar niyarqan: “Taytay, jutikicho qarquyaptïmi ¡supaykunapis cäsukayämashqa!”
18 Jesúsnami nirqan: “Noqa rikashqämi imayka illaqukuynörä Satanás jeqamuqta.b 19 Noqami munaynïta qamkunata qarashqä culebrakunata, alacrankunata jaruyänaykipä y Satanás imata ruraptinpis vinciyänaykipä. Satanásta ichipäyaptikipis manami imapis päsayäshunkitsu. 20 Supaykuna cäsuyäshunqaykipita kushikurpis ciëlucho jutikikuna qellqaranqanpita mas kushikuyay”.
Tayta Diosta Jesús alabanqan
21 Tsay höranami Espíritu Santupa munayninwan kushikur Tayta Diosta mañakur Jesús nirqan: “Ciëlucho y kay patsacho munayyuq Papä, qamtami alabä. Manami yachaq tukuqkunatatsu yarpanqaykikunata musyatsishqayki, tsaypa trokinqa wamranö kaqkunallatami. Papä, tsaynö kanantami munashqayki”.
22 Tsaypitanami tsaycho kaykaq runakunata nirqan: “Taytämi llapantapis munaynïman churamushqa.† Tsurin kanqäta payllami musyan. Tsaynöpis noqallami musyä Taytä kanqanta. Tsaymi noqa tantiyatsinqä kaqkunalla Taytä imanö kanqantapis musyayan”.†
23 Tsaypitanami discïpulunkunallata nirqan: “Kanan päsanqankunata rikarmi kushishqa kaykäyanki. 24 Noqami nï: Unay profëtakunapis y reykunapis rikayanqaykita rikayta munarpis manami rikayashqatsu. Wiyayanqaykita wiyayta munarpis manami wiyayashqatsu”.†
Runa mayinta Samaria runa kuyapanqan
25 Juk kutichönami ley yachatsikuq runa Jesús yachanqanta o mana yachanqantapis musyayta munar tapurqan: “Rabí, ¿imatatä ruräman mana ushakaq kawayta tarinäpä?”
26 Jesúsnami nirqan: “¿Imatatä Tayta Diospa leynincho nin? Liyir ¿imatatä tantiyashqayki?”
27 Tsay runanami nirqan: “Tayta Diospa leyninchömi nin: ‘Tayta Diosta kuyanki llapan shonquykiwan, llapan voluntänikiwan, llapan kallpaykiwan y llapan yarpaynikiwan. Runa mayikitapis kikiki kuyakunqaykinö kuyanki’ ”.†
28 Niptinnami Jesús nirqan: “Allitami nishqayki. Tsaykunata cumplirqa mana ushakaq kawaytami tarinki”.
29 Tsay runanami yachaq tukur tapurqan: “¿Pitä tsay runa mayïqa?”
30 Tsaynö tapuptinmi Jesús nirqan: “Juk runashi Jerusalénpita Jericó markaman aywaykänä. Aywaykaptinshi suwakuna pasaypa maqakacharkur qepinta y jatiranqan latsapantapis qechuyänä. Nirkurshi wanushqatanö jitaskir aywakuyänä.
31 “Tsay nänipashi juk sacerdöti päsaykänä. Tsay runata rikaykarpis mana rikaq tukurshi päsakunä. 32 Tsaynöllashi levitapis tsay runa jitaraykanqan kaqman chänä. Paypis mana rikaq tukurshi päsakunä.
33 “Paykunapa qepantanashi Samaria runapis chänä. Payshi itsanqa jitaraykaqta tariykur kuyapänä. 34 Tsayshi aceitiwan y vïnuwan jampiykur qerinkunata shumaq watapänä. Nirkurnashi ashnunman muntarkatsir patsakuna wayiman apaykur shumaq jampinä. 35 Waraynin aywakurnashi wayiyuqta ishkay junaq jornalpa chaninta pägar ninä: ‘Kay qeshyaykaq runata jampiykullanki. Masta gastaptikiqa kutimurmi pägalläshayki’ ”.
36 Tsaynö willaskirnami Jesús tapurqan: “Tsay kimsan runakunapita ¿mayqan kaqtä runa mayinta kuyaparqan?”
37 Niptinmi nirqan: “Samaria runami”.
Jesúsnami nirqan: “Kanan qampis tsay runanölla runa mayikita kuyapanki”.
Parábola del Buen Samaritano
Martapa y Maríapa wayinman Jesús chanqan
38 Tsaypita discïpulunkunawan Jesús aywarmi juk takshalla markaman charqan. Tsaychömi Marta jutiyuq warmi wayinman patsatsirqan. 39 Martapa ñañanmi karqan María. Paymi Jesús yachatsinqanta wiyar ñöpancho jamararqan. 40 Martanami wayicho imayka rurayninkunawan ñitipakashqa kar Jesúsman witiykur nirqan: “Taytay, ¿imanirtä ñañä tsaycho jamaräkun japallä ñakaykaptï? ¡Yanapamänanpä niykullay!”