Ley yachatsikuqkunawan fariseukuna mana alli ruraq kayanqanta Jesús ninqan
23
Tsaypitanami runakunata y discïpulunkunata Jesús nirqan: 2 “Moisés qellqanqan leykunata yachatsiyänanpämi fariseukuna y ley yachatsikuqkuna munayyuq kaykäyan. 3 Tsaynö kaykaptinqa yachatsiyäshunqaykita cäsukuyay. Paykuna kawayanqannöqa ama kawayaytsu. Diospa palabranta yachatsirpis kikinkunaqa mandamientukunata manami cumpliyantsu. 4 Paykunaqa apaytapis mana kamäpakuyanqanyaq qepita aparitsiqnömi atska leykunata cumpliyänanpä runakunata mandayan. Tsaynö kaptinpis cumpliyänanpä manami ichikllapis yanapayantsu.5 “Runakuna rikayänallanpämi imatapis rurayan.† Tsaymi jatusaq filacteriankunataa ruraskir puritsiyan. Tsaynöllami largu jïlukunata latsapankunapa chuskun kuchunman jirarkur puriyan.† 6 Mikuyänanpä qayatsiyaptinpis paykunaqa mësamanrämi jamakuyan. Sinagögakunachöpis punta kaq bancakunamanrämi jamakuyan. 7 Pläzakunachöpis runakuna ‘rabí’ nir respitayänantami munayan.
8 “Qamkunapaqa jukllayllami yachatsiyäshuqniki.b Tsaynöpis tsay wawqillami kaykäyanki. Tsaynö kaykaptinqa ama munayaytsu ‘rabí’ niyäshunaykita. 9 Kay patsachöqa ama pitapis ‘Taytantsik’ nir Diostanö respitayaytsu. Jukllayllami Taytaykiqa. Payqa ciëluchömi kaykan. 10 Qamkunatapis ama yachatsikuq niyäshuytsu. Jukllayllami yachatsiyäshuqnikiqa. Payqa Cristumi. 11 Mas alli rikashqa kayta munarqa wätaynölla kayay.† 12 Runa tukuqkunaqa penqakuyman churashqami kayanqa. Qollmi shonqu kaqkunami itsanqa alliman churashqa kayanqa.†
Ley yachatsikuqkunata y fariseukunata Jesús qayapanqan
13 “¡Allaw, allish tukuq fariseukuna y ley yachatsikuqkuna! Punkuta wichqaqnömi Tayta Diospa mandakuyninman pipis mana yaykuyänanpä tsapata churapaykäyanki. Kikikikunapis manami yaykuyankitsu.
14 [“¡Allaw, allish tukuq fariseukuna y ley yachatsikuqkuna! Qamkunaqa viüdakunapa imantapis qechuykäyankimi. Nirkurmi santu tukurnin unayyaq Tayta Diosta mañakuyanki. Tsaynö kayanqaykipitami Tayta Dios pasaypa castigayäshunki.]
15 “¡Allaw, allish tukuq fariseukuna y ley yachatsikuqkuna! Qamkunaqa juk runallapis yachatsiyanqaykita cäsukunanta munarmi maytsaypapis aywayanki. Cäsukurnami qamkunapitapis ishkay kuti masrä Satanás munanqanta rurayan.
16 “¡Allaw qamkuna! Qamkunaqa qapranö karmi llutanpa pushaykäyanki. Tsaynö karmi niyanki: ‘Templupa jutincho awnir mana cumpliyaptikipis manami imanantsu. Tsaynö kaptinpis templucho kaykaq qoripa jutincho awnirmi itsanqa cumpliyänayki’. 17 ¡Mana tantiyakuq qaprakuna! ¿Mayqantä mas sagrädu? ¿Templucho kaykaq qoriku o tsay qorita sagräduyätsiq templuku?
18 “Tsaynöllami qamkuna nikäyanki: ‘Altarpa jutincho awnir mana cumpliyaptikipis manami imanantsu. Tsaynö kaptinpis altar janancho churayanqan ofrendapa jutincho awnirmi itsanqa cumpliyänayki’. 19 ¡Mana tantiyakuq qaprakuna! ¿Mayqantä mas sagrädu? ¿Ofrendaku o ofrendata sagräduyätsiq altarku?
20 “Altarpa jutincho jurarqa manami altarpa jutinllachötsu juraykäyanki, sinöqa altar jananman churayanqan ofrendakunapa jutinchöpis juraykäyankimi. 21 Templupa jutincho jurarpis manami templupa jutillanchötsu juraykäyanki, sinöqa templucho kaykaq Tayta Diospa jutinchömi juraykäyanki. 22 Ciëlupa jutincho jurarpis† manami ciëlupa jutillanchötsu juraykäyanki, sinöqa Tayta Diospa trönunpa jutincho y kikin Tayta Diospa jutinchömi juraykäyanki.
23 “¡Allaw, allish tukuq fariseukuna y ley yachatsikuqkuna! Qamkunaqa mentapita, anispita y comïnuspita† diezmuta rakiykarpis mas cäsukuyänaykipä kaq mandamientukunata manami cumpliyankitsu. Tsay mandamientukunami nin runa mayikita alli rikayänaykipä, kuyapäyänaykipä y Tayta Diosta awniyanqaykita cumpliyänaykipä. Diezmupä rakir cumpliyanqaykinö tsay mandamientukunatapis cumpliyankiman. 24 Qamkunaqa qapranö karmi llutanpa pushaykäyanki. Yakucho chuspita shuyshurpis camëlluta ultaqnömi kaykäyanki.
25 “¡Allaw, allish tukuq fariseukuna y ley yachatsikuqkuna! Qamkunaqa janallanpa awishqa pucillunö y matinömi kaykäyanki. Tsay plätukuna rurincho qanra kanqannömi qamkunapis shonquykikunacho suwakuyänaykipä y mana allita rurayänaykipä yarpaykäyanki. 26 ¡Qapra fariseukuna! Plätupa rurinta mayllaqnö puntata mana alli yarpaynikikunata kachariyay. Tsaynöparämi rasunpaypa santu kayanki.
27 “¡Allaw, allish tukuq fariseukuna y ley yachatsikuqkuna! Qamkunaqa imayka pintashqa nïchu niraqmi kaykäyanki.† Nïchupa janan kuyayllapä kaptinpis rurincho tullukuna ismur melanaypämi kaykan. 28 Tsaynömi qamkunapis runakuna rikayäshuptiki alli ruraqnö kaykäyanki. Tsaynö kaptinpis allish tukuq kayanqayki y llutan yarpäyanqaykikunami pasaypa penqakuypä kaykan.
29 “¡Allaw, allish tukuq fariseukuna y ley yachatsikuqkuna! Qamkunaqa profëtakunapa nïchunkunatami ruraykäyanki y alli runakunapa monumentunkunatami adornaykäyanki. 30 Nirkurmi niyanki: ‘Unay castäkuna kawayanqan witsan kawarqa profëtakunata wanutsiyaptin noqakuna manami wanutsiyämantsu karqan’. 31 Tsaynö nirmi musyatsiyanki profëtakunata wanutsiq runakunapa castan kar paykunanölla kayanqaykita. 32 ¡Tsaynö kaykarqa unay castaykikunanölla qamkunapis wanutsiyay!
33 “¡Culebra casta runakuna!† Infiernuman Tayta Dios qaykuyäshunaykipä kaykaptinqa ¿imanöparä salvakuyanki? 34 Qamkunata tantiyatsiyäshunaykipämi profëtakunata, yachaq runakunata y yachatsikuqkunatapis kachamushä. Paykunatami wakinta wanutsiyanki, wakinta crucificayanki, wakinta sinagögakunacho castigayanki y wakintanami markan markan qatikachar ñakatsiyanki. 35 Alli ruraq Abelta† wanutsinqanpita hasta Berequíaspa tsurin Zacaríasta† templu punkucho wanutsinqanyaqmi kay patsacho llapan alli runakunata wanutsiyanqanpita qamkuna jutsayuq kaykäyanki. 36 Rasunpaypami nï: Tsay wanutsiq runakunatanömi qamkunatapis Tayta Dios juzgayäshunki”.
Jerusaléncho taqkunapä Jesús llakikunqan
37 “¡Ay, Jerusalén, Jerusalén! Qamqa Tayta Diospa profëtankunata unaypita patsami wanuykätsinki.† Pay kachamunqan willakuqkunatapis saqmaykankimi. Chipshankunata wallpa oqllaqnö wawaykikunatac atska kuti qoriyta munaptïpis manami munashqaykitsu. 38 Tsaynö kanqaykipitami wayikikunapis templuykipis tsunya rikakunqa. 39 Noqami nï: Manami yapay rikamankinatsu hasta ‘¡Tayta Diospa jutincho shamuq runa alabashqa kaykullätsun!’† ninqaykiyaq”.