Yakuta vïnuman Jesús tikratsinqan
2
Tsaypita kimsa junaqtanami Galileacho kaykaq Caná markacho majatsakay fiesta karqan. Tsay fiestachömi Jesúspa mamanpis kaykarqan. 2 Tsaymanmi Jesústapis discïpulunkunatawan qayatsiyarqan. 3 Fiesta manarä ushakaptinmi vïnunkuna ushakaskirqan. Jesústanami maman nirqan: “Vïnunkunami ushakashqa”.4 Tsaynö niptinmi Jesús nirqan: “Mamay, ¿imanirtä tsaynö nimanki? Manarämi hörä chämunrätsu”.
5 Jesúspa mamannami sirvientikunata nirqan: “Jesús niyäshunqaykita rurayay”.
6 Tsaychömi rumipita rurashqa soqta urpukuna karqan. Tsay urpukunamanmi costumbrin kanqannö purificakuyänanpä yakuta wiñayaq. Tsay urpukunamanmi juk pachak (100) litrunö yaku yaykuq. 7 Sirvientikunatanami Jesús nirqan: “Tsay urpukunaman juntanqanyaq yakuta wiñayay”.
Tsaymi juntanqanyaq yakuta wiñayarqan. 8 Juntaskatsiyaptinnami Jesús nirqan: “Ichikllata chaqarkur mayor sirvienti yawananpä apayay”.
Tsaynö niptinnami Jesús ninqannölla chaqarkur apayarqan. 9 Mayor sirvienti yawaskirmi alli vïnu kanqanta tantiyaskirqan. Itsanqa manami maypita apayanqantapis musyarqantsu. Sirvientikunallami maypita kanqantapis musyayarqan. Yawarkurnami majatsakaq chöluta qayaskir 10 nirqan: “Wakin runakunaqa fiesta qallanqan hörami allinnin kaq vïnuta qarakuyan. Atskata upuskiyaptinnami sheqi kaqllatana qarayan. Tsaynö kaptinpis qammi itsanqa fiesta ushananchörä mas allinnin kaq vïnuta qaraykätsinki”.
11 Tsaynömi Galileacho kaykaq Caná markacho punta kaq milagruta Jesús rurarqan. Munayyuq kanqanta rikarmi discïpulunkuna payman yärakuyarqan.
12 Tsaypitanami mamanwan, wawqinkunawan y discïpulunkunawanpis Capernaúm markaman Jesús aywarqan.† Tsaychömi juk ishkay junaq qoyäyarqan.
Templucho rantikuqkunata Jesús qarqunqan
13 Israel runakunapa Pascua† fiestan qallaykunanpäna kaykaptinmi Jerusalénman Jesús aywarqan. 14 Chaykurnami templupa patiuncho törukunata, üshakunata y palumakunatapis runakuna rantikur kaykaqta tarirqan. Tsaynöllami qellay trukatsiqkunata tarirqan.a 15 Tsaynö tariskirmi chicötita ruraskir üshakunata y törukunata templupa patiunpita Jesús qarqurqan. Qellay trukatsiqkunapa mësankunatapis tikrarmi qellayninkunatapis mashtar usharqan. 16 Paluma rantikuqkunatanami nirqan: “¡Kaykunata jipiyay! ¡Imanirtä taytäpa wayinta mercäduman tikratsiyashqayki!”
17 Jesús tsaynö ruraptinmi discïpulunkuna yarpäyarqan Tayta Diospa palabrancho ninqanta: “Templuykitami wanur kawarpis respitatsishä”.†
18 Israel autoridäkunanami Jesústa niyarqan: “¿Ima munaynikiwantä rantikuqkunata qarqushqayki? Mä munayyuq kanqaykita musyayänäpä milagruta ruray”.
19 Jesúsnami nirqan: “Kay templuta juchutsiyay. Juchutsiyaptiki kimsa junaqllatami shäritsishä”.†
20 Tsaynö niptinmi autoridäkuna niyarqan: “Kay templuta chusku chunka soqta (46) watatami shäritsiyashqa. ¿Imanöpatä kimsa junaqllata shäritsinkiman?”
21 Tsaynö parlarqa manami templupätsu Jesús parlarqan, sinöqa templuman tinkutsikurmi kikinpä parlarqan. 22 Jesús wanunqanpita kawaskamuptinnami discïpulunkuna tsaynö ninqanta yarpaskiyarqan. Tsaynöpami Jesús ninqanta y Tayta Diospa palabran ninqantapis criyiyarqan.
Runakuna imata yarpäyanqantapis Jesús musyanqan