Jesúswan Nicodemo parlanqan
3
Juk fariseo runami Nicodemo jutiyuq karqan. Payqa Israel runakuna respitayanqan runami karqan. 2 Juk paqasmi Jesús kaqman aywaykur nirqan: “Rabí, musyayämi yachatsiyämänaykipä Tayta Dios kachamushunqaykita. Tayta Dios mana yanapaptinqa manami pipis qam ruranqayki milagrukunata ruranmantsu”.3 Jesúsnami nirqan: “Rasunpaypami nï: Pipis yapay mana yurirqa manami Diospa mandakuyninman yaykunqatsu”.
4 Nicodemunami nirqan: “¡Imanöpatä awkinna kaykar yapay yuriyanman! ¿Mamanpa pachanman kutiyanmantsurä yapay yuriyänanpä?”
5 Jesúsnami nirqan: “Rasunpaypami nï: Pipis yakuwan y Espíritu Santupa munayninwan† mana yurirqa manami Tayta Diospa mandakuyninman yaykunqatsu. 6 Mamanpita yuriqkunaqa runallami kayan. Espíritu Santupita yuriqkunami itsanqa Diospa wamrankuna kayan.
7 “Llapan runakunapis yapayrämi yuriyänan† niptï ama llakikuytsu. 8 Wayramuqta wiyarpis manami maypita shamunqanta ni maypa aywanqantapis musyankitsu. Tsaynöllami pipis tantiyantsu Espíritu Santupa munayninwan runakuna imanö yuriyanqantapis”.†
9 Nicodemunami yapay tapurqan: “Taytay, kay ninqaykiqa ¡imanötä kanqa!”
10 Jesúsnami nirqan: “Israel runakunapa yachatsiqnin kaykarpis ¿manaku tantiyanki? 11 Rasunpaypami nï: Rikanqäta y musyanqätami willä. Tsaynö kaptinpis ninqäta manami criyiyankitsu. 12 Kay patsacho kaqkunapä ninqäta mana criyiykarqa ¿imanöpatä criyiyankiman ciëlucho kaqkunapä niptï?a
13 “Manami pipis gloriaman aywar kutimushqatsu. Runapa Tsurinmi itsanqa gloriapita shamushqa kar rasun kaqta willakun. 14 Tsunyaq jirkacho broncipita fundishqa culebrata† qeruman Moisés joqarinqannömi Runapa Tsurintapis joqariyanqa.b † 15 Tsaymi pipis payman criyikuqkunaqa mana ushakaq kawayta tariyanqa”.
Tsurinta Tayta Dios kachamunqan
16 Runakunata kuyarmi japallan Tsurinta Tayta Dios kachamurqan. Tsaymi pipis payman yärakuq kaqkunaqa ushakäyanqatsu,c sinöqa mana ushakaq kawaytami tariyanqa. 17 Manami runakunata infiernuman qaykunanpätsu Tayta Dios Tsurinta kachamurqan tsaypa trokinqa payman criyikuyaptin salvananpämi.
18 Tayta Diospa Tsurinman yärakuqkunaqa manami infiernuman qaykushqatsu kayanqa. Mana yärakuqkunami itsanqa qaykushqa kayänanpäna kaykäyan. Tsaynö kayanqa Tayta Diospa japallan Tsurinman mana yärakuyanqanpitami.
19 Kay patsaman aktsi shamushqa kaptinpis runakunaqa tsakäpakushqanö kar y jutsallacho kawarmi tsay aktsita chaskiyantsu. 20 Llapanpis jutsa rurayllacho kawaqkunaqa Tayta Dios kachamunqan aktsita chikirmi chaskiyantsu. Tsaynö chaskiyantsu jutsankuna musyakänanta mana munarmi.† 21 Alli ruraqkunami itsanqa Tayta Dios kachamunqan aktsita chaskiyan. Tsaynö chaskikuyaptinmi Tayta Dios munanqannö kawayanqan musyakan.
Jesúspä Bautizaq Juan willakunqan
22 Jerusalénpita yarquskirnami Judea provinciacho jukläman discïpulunkunawan Jesús aywarqan. Tsaychömi runakunata bautizarqan.
23 Bautizaq Juannami Enón ninqan raqracho atska yaku kaptin tsaycho bautizarqan. Enónqa Salim ñöpanchömi karqan. Tsaycho bautizanqanta musyarmi wakin runakuna tsayman bautizakuq aywayarqan. 24 Tsay witsanqa Juan manarämi carcelcho wichqararqanrätsu.†
25 Tsaychömi imanö purificakuyänanpä kanqanpita Juanpa discïpulunkuna Israel mayinkunawan rimanakuyarqan. 26 Tsaymi Juan kaqman aywaykur niyarqan: “Rabí, ¿yarpankiku Jordán tsimpancho kaykar juk runata rikaskir paypä willayämanqaykita? Kananqa paypis bautizaptinmi llapan runakuna payman aywaykäyan”.
27 Juannami nirqan: “Tayta Dios yanapaptinmi runakuna payman aywaykäyan. 28 Qamkunata ninqänöpis noqaqa manami Cristutsu kä,† sinöqa paypa puntanta willakunäpä Tayta Dios kachamanqan runallami kaykä. 29 Majatsakänanpä kaq chölullami noviayuqqa. Majatsakaq chölu parlanqanta wiyar amïgun kushikunqannöllami noqapis kushikü.d 30 Mas allimi kaykan noqaman shayämunanpa trokin payman aywayaptin.
Ciëlupita Jesús shamunqan
31 “Kay patsapita kaqkunaqa kay patsacho kaqkunallata musyarmi kay patsacho kaqkunallapä parlayan. Ciëlupita shamuq kaqmi itsanqa ciëlucho kaqkunata y kay patsacho kaqkunatapis musyan. Payqa llapanpitapis mas munayyuqmi. 32 Ciëlucho rikanqankunata y wiyanqankunata willaptinpis runakuna manami chaskikuyantsu. 33 Chaskikuqkunami itsanqa Tayta Diospa willakuynin rasun kaq kanqanta tantiyayan. 34 Tsaynö tantiyayan ciëlupita shamuq runa Tayta Dios ninqankunata parlaptinmi. Tsaynö parlananpämi Espíritu Santuta Tayta Dios qararqan.