4 Galileaman chäyänanpämi Samariaparä päsayänan karqan. 5 Tsaynö aywarmi Sicar markaman chäyarqan. Tsay markaqa tsurin Joséta Jacob qaranqan chakrapa ñöpanchömi kaykan.^† 6 Tsaychömi Jacob uchkutsinqan pözu kaykan. Pullan junaqnöna kaykaptinmi tsay pözuman chaykur pishipashqa Jesús jamaskirqan. 7 Samaria warmi yakukuq tsayman chaykuptinmi Jesús nirqan: “Yakuta qaraykallämay”.

8 (Jesús jamapanqanyaqmi discïpulunkuna mikuy rantiq markapa aywayarqan.)

9 Tsay warminami nirqan: “Israel runa kaykarqa ¿imanirtä Samaria warmi kaykaptï yakuta mañakamanki?”

Samaria runakunawan Israel runakuna chikinakuyaptinmi tsaynö nirqan.

10 Jesúsnami nirqan: “Tayta Diospita imata chaskinaykipä kanqanta musyar y noqa pï kanqätapis musyarqa qammi yakuta mañakamankiman. Mañakamaptikiqa kawatsikuq yakutami qaräman”.^†

11 Tsay warminami nirqan: “Taytay, kay pözuqa jondumi. Jipinaykipä imaykipis mana kaykaptinqa ¿maypitatä tsay kawatsikuq yakuta jipimunkiman? 12 Unay castantsik Jacobmi kay pözuta uchkutsirqan. Kay pözupitami uywankunapis, tsurinkunapis y kikinpis upuyarqan. Tsay yakupita mas alli kaq yakuta qaramänaykipä manami paypita mas munayyuqtsu kanki”.

13 Jesúsnami nirqan: “Kay pözupita yakuta upuq kaqqa yapaypis yakunanqami. 14 Noqa qaranqä yakuta upuq kaqmi itsanqa imaypis yakunanqanatsu. Tsay qaranqä yaku shonquncho pukyunö kaptinmi imayyaqpis kawanqa”.

15 Warminami nirqan: “Taytay, imaypis mana yakunänäpä ni kay pözuman manana kutimunäpä tsay yakuta qaraykallämay”.

16 Jesúsnami nirqan: “Ayway runaykita qayamuy”.

17 Niptinmi warmi nirqan: “Taytay, manami runä kantsu”.

Tsaynö niptinmi Jesús nirqan: “Rasun kaqtami nimashqayki. 18 Qamqa pitsqa runawannami tashqayki. Kanan taykanqayki runapis manami runaykitsu. Tsaymi runayki mana kanqanta nimarqa rasun kaqta nimashqayki”.

19 Warminami nirqan: “Taytay, Diospa profëtanmi kaykanki, ëllu. 20 Noqakunapa unay castäkunaqa taqay jirkachömi Tayta Diosta adorayaq. Tsaynö kaptinpis qamkunaqa Jerusalénchörä adoranantsikpä kanqantami niyanki”.

21 Jesúsnami nirqan: “Rasunpaypami nï: Taqay jirkaman ni Jerusalénmanpis mana aywaypa Tayta Diosta adorayänaykipä tiempu chaykämunnami. 22 Qamkunaqa Diosta adorarpis willakuyninta manami musyayankitsu. Salvakuq runa Israelpita kaptinmi noqakunaqa willakuyninta musyayä.

23 “Tiempu chämushqanami Tayta Diosta rasunpaypa adoraqkuna Espíritu Santu munanqannö llapan shonqunkunawan adorayänanpä. Tsaynö adoranantsiktami Tayta Dios munan. 24 Tayta Diosqa Espïritumi. Tsaymi payta adoraqkuna Espíritu Santu yanapaptin llapan shonqunkunawan adorayänan”.

25 Tsay warminami nirqan: “Taytay, Cristo shamunanpä kanqanta musyämi. Pay shamurnami tsaykunata tantiyatsimäshun”.

26 Jesúsnami nirqan: “Tsay shamunanpä kaqqa noqami kaykä”.

27 Discïpulunkuna kutiykur warmiwan parlaykaqta tariskirmi pasaypa espantakuyarqan. Tsaynö kaptinpis manami mayqanpis tapuyarqantsu imata parlayanqanta o imata tapunqantapis.

28 Warminami uyllunta jaqiskir markaman aywar runakunata willarqan: 29 “Juk runami pözu kaqcho kaykan. Paymi nimashqa imanö kanqätapis. Aku rikaq aywashun. ¿Manatsurä Tayta Dios kachamunqan Cristo?”

30 Tsaynö niptinnami Jesús kaykanqan kaqman runakuna aywayarqan. 31 Manarä chäyaptinmi discïpulunkuna Jesústa niyarqan: “Rabí, imallatapis mikuskishunrä”.

32 Jesúsnami nirqan: “Noqapa mikuynïqa mana reqiyanqayki mikuymi”.

33 Tsaymi discïpulunkuna kikinkunapura ninakuyarqan: “¿Pirä mikuynin apamushqa?”

34 Tsaynö yarpäyanqanta tantiyarmi Jesús nirqan: “Noqapa mikuynïqa kachamaqnï nimanqanta cumplinqäyaq ruranqämi. 35 Musyayankimi runakuna niyanqanta: ‘Murunqantsikpita chusku killatarämi cosechantsik’. Tsaynö niyaptinpis noqami nï: Rikayay. Chakrakunacho mikuykuna poqushqanami. Qorinantsikpänami kaykan.^a 36 Tsay cosëchacho aruq runakunami mana ushakaq kawayta tariyänanpä aruyanqa. Tsaynö aruyanqanpitami Tayta Dios päganqa. Tsaymi murukuqpis y cosëcha qoriqpis kushikuyanqa.^b

37 “ ‘Juk murunqantaqa juknami cosechan’ niyanqanqa rasunpaypami kaykan. 38 Tsaynöllami qamkunatapis kachashqä juk murunqanta cosechayänaykipä. Tsaymi wakinkuna ñakar muruyanqanta qamkunana qoriyämunki”.

39 “Imanö kanqätapis Jesúsmi nimashqa” nir tsay warmi willakuptinmi atska Samaria runakuna Jesúsman criyiyarqan. 40 Tsaymi Jesús kaqman chaykur paykunawan quëdananpä rugayarqan. Tsaynö rugayaptinmi paykunawan ishkay junaq quëdarqan. 41 Tsaycho willapaptinmi mas atskaq runakuna Jesúsman criyiyarqan. 42 Tsay warmitami niyarqan: “Manami qam niyämanqallaykipitatsu criyiyä, tsaypa trokinqa kikïkuna wiyarmi llapan runakunata salvananpä Cristo rasunpaypa kanqanta musyayä”.

43 Ishkay junaq qoyaskirnami Galileaman Jesús kutirqan. 44 Jesús ninqannöllami Tayta Diospa profëtanta markanchöqa manami chaskiyantsu.^† 45 Tsaynö kaptinpis marka mayinkuna Pascua fiestapä Jerusalénman aywar milagrukunata ruranqanta rikashqa karmi^† payta chaskiyarqan.

46 Galileacho kaykarnami Caná markaman Jesús yapay kutirqan. Tsaychömi yakuta vïnuman ñöpata tikratsirqan.^† Capernaúm markachönami reyta yanapaq juk autoridäpa tsurin qeshyaykarqan. 47 Judeapita Galileaman Jesús chanqanta musyaskirmi tsay autoridä rugakuq aywarqan. Chaykurmi wayinman aywaykur antsa qeshyaykaq tsurinta alliyätsinanpä rugakurqan. 48 Jesúsnami nirqan: “Milagru ruranqäta mana rikarqa qamkuna manami criyiyankitsu”.

49 Tsay autoridänami nirqan: “Taytay, tsurï manarä wanunqanyaq juklla aywaykulläshun”.

50 Tsaynö niptinmi Jesús nirqan: “Wayikipa kutikuy. Tsuriki alliyashqanami”.

Jesús ninqanta criyirmi kutikurqan. 51 Capernaúmman chaykaptinnami wätayninkuna taripaykur niyarqan: “¡Taytay, tsuriki alliyashqanami!”

52 Tsaynö niyaptinmi wätayninkunata tapurqan imay höra alliyanqantapis. Tsaymi niyarqan: “Qäyan tardi pullan junaq tikraymi achachaynin illakaskirqan”.

53 Tsaynö willayaptinmi tsay runa tantiyarqan Jesús tsay höra “tsuriki alliyashqanami” ninqanta. Tsaymi wayincho kaqkunawan Jesúsman yärakuyarqan.

54 Judeapita Galileaman kutir tsay wamrata alliyätsinqanwanqa ishkay kutinami Galileacho milagruta Jesús rurarqan.