Puriy mana puëdiq runata Betesda estanquicho Jesús alliyätsinqan
5
Tsaypitanami Israel runakunapa juk fiestan Jerusaléncho kaptin Jesúspis tsayman aywarqan. 2 Jerusalén yaykunachömi Üsha Punku niyanqan punkucho jatunkaray estanqui kaykan. Hebreo idiömacho tsay estanquipa jutinmi Betesdaa kaykan. Ñöpankunapami pitsqa alarkuna kaykan. 3 Tsay alarkunachömi atskaq qeshyaqkuna, qaprakuna, weqrukuna y puriyta mana puëdiqkunapis ujuräyarqan. [Paykunami yaku kuyuqta shuyaräyarqan. 4 Tsaychömi ciëlupita ángel unayta urämur yakuta kuyutsiq. Yakuta kuyutsiptinmi mayqan qeshyaqpis puntata yakuman yaykuq kaq alliyashqana yarqamuq.]5 Tsaychömi juk runa kimsa chunka puwaq (38) watana qeshyar ujuraykarqan. 6 Tsay runa unaypitana qeshyanqanta musyarmi Jesús nirqan: “¿Alliyayta munankiku?”
7 Niptinnami nirqan: “Awmi taytay, alliyaytami munä. Pïnïpis manami kantsu yakuta ángel kuyutsiptin estanquiman yaykatsimänanpä. Yaykunäpä kaykaptïpis jukmi llalliman”.
8 Jesúsnami nirqan: “¡Shäriy! Kirmaykita apakurkur aywakuy”.
9 Tsaymi jinan höra kutikaskir kirmanta apakurkur kushishqa aywakurqan. Tsay junaqqa jamay junaqmi karqan. 10 Tsay alliyashqa runata rikarmi Israel autoridäkuna niyarqan: “Jamay junaq kaykaptin ¿imanirtä kirmayki aparishqa puriykanki?”†
11 Tsay runanami nirqan: “Alliyätsimaqnï runami nimashqa kirmäta apakurkur aywakunäpä”.
12 Tsaymi tapuyarqan: “¿Pitä tsaynö nishushqayki?”
13 Tapuyaptinpis estanqui kaqpita Jesús aywakushqana kaptinmi rikatsinanpä tarirqannatsu.
14 Tsaypitanami templupa patiuncho tsay alliyätsinqan runawan Jesús tinkuskir nirqan: “Alliyashqana kaykarqa jutsata ama ruraynatsu. Yapay jutsata ruraptikiqa masmi imapis päsashunki”.
15 Tsaypitanami tsay runaqa Israel autoridäkunaman aywaykur Jesús alliyätsinqanta willarqan.
Diospa Tsurin kanqanta Jesús ninqan
16 Jamay junaqcho alliyätsinqanpitami Israel autoridäkuna Jesúspa contran shärir [wanutsiyänanpä] ashiyarqan. 17 Paykunawan tinkuskirnami Jesús nirqan: “Jamay junaq kaptinpis Taytäqa arunmi. Tsaynöllami noqapis arü”.
18 Tsaynö niptinmi Israel autoridäkuna Jesústa wanutsiyta munayarqan. Manami jamay junaqcho runata alliyätsinqallanpitatsu wanutsiyta munayarqan, sinöqa “Diosmi Taytä” niptin Dios tukuykanqanta yarparmi.†
19 Jesúsnami nirqan: “Rasunpaypami nï: Tayta Diospa Tsurin karmi Taytä llapan ruranqanta noqapis rurä. Manami kikïpa munaynilläpitatsu imatapis rurä, sinöqa Taytä ruranqanta rikanqallätami rurä. 20 Taytä kuyamarmi llapan ruranqankunatapis rikatsiman. Mas wakinkunata ruranäpämi tantiyatsimanqa. Tsayta rikarmi masrä espantakuyanki. 21 Tsaynö espantakuyanki wanushqakunata Taytä kawayta qaranqannö noqapis munanqä kaqkunata kawayta qaraptïmi.
22 “Tsaynöpis manami Taytätsu pitapis juzganqa, tsaypa trokinqa noqatami Tsurin kaptï pïmaytapis juzganäpä churamashqa. 23 Tsaynö churamashqa kikinta adorayanqannölla noqatapis llapan runakuna adorayämänanpämi. Tsaymi noqata mana adoramarqa Taytätapis adorayantsu.
24 “Rasunpaypami nï: Willakunqäta wiyar kachamaqnï Taytäman yärakuqkunaqa mana ushakaq kawaytami tariyashqa. Paykunaqa manami infiernuman qaykushqatsu kayanqa, sinöqa wanushqanö kayanqanpitami mushuq kawaytana tariyashqa.
25 “Rasunpaypami nï: Tiempu chämushqanami wanushqanö kaqkuna Diospa Tsurin willakunqanta wiyayänanpä. Willakunqanta chaskikuqkunaqa mana ushakaq kawaytami tariyanqa. 26 Tsaynö kananpämi Tayta Dios munayninta Tsurinta entregashqa. Tsaymi runakunata kawayta qarananpä Tayta Dios munayyuq kanqannö Tsurinpis munayyuq kaykan. 27 Tsaynöllami Runapa Tsurin kaptin runakunata juzgananpäpis Tayta Dios munayninta entregashqa.
28 “ ‘¿Imanörä tsay kanqa?’ nir ama yarpachakuyaytsu. Tiempu chämunqami llapan wanushqakuna Diospa Tsurinpa vozninta wiyayänanpä. 29 Alli ruraqkuna kawaskamurmi imayyaqpis kawayanqa. Mana alli ruraqkunami itsanqa kawarimurpis infiernuman qaykushqa kayanqa.† 30 Manami kikïpa munaylläpitatsu juzgashä, tsaypa trokinqa kachamaqnï [Taytä] munanqannöllami juzgashä.
Tayta Dios kachamunqanta Jesús tantiyatsinqan
31 “Tayta Dios kachamanqanta kikïpa yarpaylläpita niptïqa manami criyiyämankimantsu. 32 Manami noqallatsu musyaykätsï, sinöqa kikin Tayta Diosmi noqapita musyaykätsiyäshunki. Pay musyatsiyäshunqaykiqa llapanpis rasun kaqllami.
33 “Bautizaq Juanman tapukuq kachayaptiki paypis rasun kaqtami noqapä willayäshurqayki.† 34 Manami runa willamaptinrätsu Tayta Dios kachamanqanta musyä, sinöqa Taytä musyatsimaptinmi. Tayta Dios kachamanqanta criyir salvakuyänaykipämi noqapita Juan willakunqanta yarpaykätsï. 35 Juanqa imayka tsariykaq aktsinömi karqan. Willakunqanta wiyarmi juk rätulla kushikuyarqayki.
36 “Tayta Dios kachamanqantaqa manami Juan willakunqanta wiyallartsu runakuna tantiyayan, sinöqa milagru ruranqäkunata rikar y yachatsinqäkunata wiyarmi tantiyayan. Taytä nimanqallantami llapantapis rurä. 37 Tsaynöpami kikin Tayta Dios mana parlapäyäshurnikipis y mana yuripäyäshurnikipis noqata kachamanqanta musyaykätsiyäshunki. 38 Tsaynö musyatsiyäshuptikipis noqaman mana yärakamurqa Tayta Diospa palabrantapis manami criyiyankitsu.
Runakuna mana chaskikuyanqanpita Jesús parlanqan
39 “Qamkunaqa mana ushakaq kawayta tariyänaykipä kanqanta yarparmi Tayta Diospa palabranta liyir yachakuyanki. Tsaynö yachakurpis manami tantiyayankitsu tsay qellqaranqankuna noqapä parlanqanta.b 40 Tsaynö parlaptinpis manami chaskikayämankitsu. Chaskikamarmi itsanqa mana ushakaq kawayta tariyankiman.
41 “Noqaqa manami qamkuna alabayämänaykita munätsu. 42 Musyämi Tayta Diosta rasunpaypa mana kuyayanqaykita. 43 Taytäpa jutincho shamushqa kaptïpis chaskikamayta manami munayankitsu. Kikinpa munayllanpita shamuq runakunatami itsanqa juklla chaskiyanki. 44 Qamkunaqa runa mayikikunawan alli kawayänallaykipämi yarpachakuyanki. Manami Tayta Dioswan alli kawayänaykipäqa yarpachakuyankitsu. Tsaynö kaykarqa ¿imanöpatä criyiyämankiman?
45 “Ama yarpäyaytsu Tayta Diospa ñöpancho shimpinäpä kanqanta. Moisésman yärakuyaptiki paymi shimpiyäshunki. 46 Moisés qellqanqankunaqa noqapämi parlaykan. Tsaymi pay qellqanqankunata criyirqa noqa ninqäkunatapis criyiyankiman. 47 Pay qellqanqankunata mana criyirmi noqa ninqäkunatapis criyiyankitsu”.