Pitsqa waranqa runakuna mikuyanqan
6
Tsaypitanami Galilea qochapa wak tsimpanman Jesús tsimparqan. Tsay qochatami Tiberias niyan. 2 Qeshyaykaqkunata alliyätsinqanta rikarmi atskaq runakuna Jesúspa qepanta aywayarqan. 3 Qocha tsimpanchönami jirkanninman aywaykur discïpulunkunawan jamaskiyarqan. 4 Tsay junaqkuna Israel runakunapa Pascua fiestankuna chaykämurqannami. 5 Paykuna kayanqanman atskaq runakuna chäyanqanta rikarmi Felipita Jesús nirqan: “Kaytsika runakunapä ¿maypitatä mikuyta rantimushun?”6 Tsaynö nirqan “Felipe mä ima nimänäshi” nirmi. Jesúsqa musyarqannami imata rurananpä kanqantapis. 7 Felipinami nirqan: “Ishkay pachak (200) junaq arur gänanqantsikwan rantimushqapis manami ichik ichiklla mikurkuyänanpäpis aypanqatsu”.
8 Tsaynö niptinmi Jesúspa discïpulun Andrés nirqan (Andrésqa Simón Pedrupa wawqinmi karqan): 9 “Kaycho juk wamrapami pitsqa cebäda tantan y ishkay pescädun kaykäpun. Tsayllaqa manami llapan runakunapä aypanqatsu”.
10 Niptinmi discïpulunkunata Jesús nirqan: “Llapan runakunata jamatsiyay”. Tsaymi tsampakunaman runakuna jamakuyarqan. Pitsqa waranqanömi (5,000) runakuna kayarqan. 11 Tsay pitsqa tantata Jesús aptarkurnami Tayta Diosta mañakur agradëcikurqan. Nirkurnami jamaraykaq runakunata [discïpulunkuna] aypuyarqan. Tsaynöllami pescädutapis aypuyarqan. Aypuyaptinmi llapanpis pacha junta mikuyarqan.
12 Runakuna mikuskiyaptinnami discïpulunkunata nirqan: “Katuyanqankunata llapanta qoriyämuy. Ama imatapis ujütsishuntsu”.
13 Tsaynö niptinmi pitsqa cebäda tantallapita sobraq kaqta chunka ishkay canasta juntata qoriyarqan. 14 Tsay milagru ruranqanta rikaykurmi runakuna niyarqan: “¡Kay runaqa Tayta Dios kachamunanpä kaq profëtami kaykan!”†
15 Tsaynö nirmi mandaqnin rey kananpä imaykanöpapis churayta munayarqan. Tsayta tantiyaskirmi jirkapa Jesús japallan aywakurqan.
Yaku jananpa Jesús purinqan
16 Patsa tsakaykaptinnami Jesúspa discïpulunkuna qocha kuchunman kutiyarqan. 17 Patsa tsakanqanyaqpis Jesús mana kutimuptinmi büquiman yarkurkur Capernaúm markaman aywayarqan. 18 Aywaykäyaptinmi pasaypa wayraptin yaku pulchaqyar qallaykurqan. 19 Tsaypita juk lëwatanö aywaykarnami Jesústa rikaskiyarqan yaku jananpa paykuna kaqman aywaykaqta. Tsayta rikaykurmi pasaypa mantsakäyarqan. 20 Tsaymi Jesús nirqan: “¡Noqami kaykä! ¡Ama mantsayämaytsu!”
21 Tsaymi Jesús witsänanpä büquita ichitsiyarqan. Tsaypitaqa rasllanami qocha kuchunman chäyarqan.
Imayyaqpis kawatsikuq tanta kanqanta Jesús ninqan
22 Warayninnami quëdaq runakuna tantiyayarqan tsaycho kaykaq jukllaylla büquiwan discïpulunkuna aywakuyanqanta. Tsaynöllami paykunawan Jesús mana aywanqanta tantiyayarqan. 23 Tsaynö kaykäyaptinmi Tiberias markapita büquikuna chäyarqan Señor Jesús tantata qaranqan cercanman. 24 Jesústapis ni discïpulunkunatapis mana tarirmi tsay büquikunawan Jesústa ashirnin Capernaúm markaman aywayarqan.
25 Capernaúmcho tariskirmi tapuyarqan: “Rabí, ¿imaytä kayman shamushqayki?”
26 Jesúsnami nirqan: “Rasunpaypami nï: Manami qamkunaqa milagrukunata rikartsu ashiykäyämanki, sinöqa pacha junta mikuyanqaykillapitami. 27 Pachallaykipä aruyänaykipa trokinqa imayyaqpis kawatsikuq mikuyta tariyänaykipä aruyay. Tsay mikuytaqa Runapa Tsurinmi qarayäshunki. Tsaypämi Tayta Dios kachamushqa”.
28 Tsaynami tapuyarqan: “Tayta Diospa aruynincho aruyänäpä ¿imatatä rurayäman?”
29 Jesúsnami nirqan: “Tayta Diospa aruyninqa kachamunqanman yärakuyanqaykimi”.
30 Tsaynö niptinmi niyarqan: “Tayta Dios kachamushunqaykita criyiyänäpä mä juk milagruta ruramuy. 31 Unay castantsikkunaqa tsunyaq jirkacho manátami mikuyarqan. Tayta Diospa palabranchöpis kaynömi qellqaraykan: ‘Ciëlupita tantatami mikuyänanpä kamariparqan’ ”.†
32 Jesúsnami nirqan: “Rasunpaypami nï: Manami Moiséstsu ciëlupita tantata qararqan, sinöqa Taytämi. Paymi ciëlupita rasunpaypa kawatsikuq tantata qarayäshunki. 33 Tsay tantaqa ciëlupita shamuq runami. Payqa pïmaytapis mana ushakaq kawaytami qaranqa”.
34 Runakunanami niyarqan: “Taytay, tsay tantata imaypis kamaripaykayällämay”.
35 Jesúsnami nirqan: “Noqami kawatsikuq tanta kaykä. Noqata chaskikamaq kaqqa imaypis manami mallaqanqatsu ni yakunanqatsu. 36 Ninqänöllami rikaykämarpis criyiyämankitsu.
37 “Taytä qomanqan runakunaqa llapanmi chaskiyäman. Noqata chaskikamaq kaqkunataqa manami pitapis qarqushätsu. 38 Manami kikï munanqäta ruranäpätsu ciëlupita shamushqä, sinöqa kachamaqnï munanqanta ruranäpämi. 39 Kachamaqnï [Taytä] manami munantsu qomanqan runakunata ni jukllayllatapis oqranäta, sinöqa llapantapis juiciu finalcho kawatsimunätami munan. 40 Payqa munan llapanpis Tsurinman criyiqkuna mana ushakaq kawayta tariyänantami. Paykunataqa juiciu finalchömi kawatsimushä”.
41 “Noqaqa ciëlupita shamuq tantami kaykä” niptinmi tsaycho kaykaq Israel runakuna Jesústa manakaqman churar 42 niyarqan: “Kay runaqa ¿manaku Josépa tsurin Jesús? Musyantsikmi maman taytan pï kanqantapis. ¿Imanirtä payqa ‘ciëlupitami shamushqä’ nikämantsik?”
43 Jesúsnami nirqan: “Manakaqman ama churayämaytsu. 44 Kachamaqnï Taytä mana tantiyatsiptinqa manami pipis chaskikamanmantsu. Chaskikamaqkunataqa juiciu finalchömi kawatsimushä. 45 Profëtakuna qellqayanqanchöpis kaynömi nin: ‘Llapan runakunatami kikï yachatsishä’.† Tsaynöllami Tayta Dios tantiyatsinqanta chaskikuq kaqkunaqa llapanpis chaskikayäman. 46 Tayta Diosta manami pipis rikashqatsu. Diospita shamuq runallami paytaqa rikashqa. 47 Rasunpaypami nï: Noqaman criyikamuqkunaqa mana ushakaq kawaytami tariyanqa.
48 “Noqami kawatsikuq tanta kaykä. 49 Unay castaykikuna tsunyaq jirkacho manáta mikurpis wanuyarqanmi. 50 Ciëlupita shamuq tantata mikuqkunami itsanqa wanuyanqatsu. 51 Noqami ciëlupita shamuq kawaykaq tanta kaykä. Pipis kay tantata mikurqa mana ushakaq kawaytami tarinqa. Kay tantaqa kikïpa cuerpümi. Runakuna mana ushakaq kawayta tariyänanpämi cuerpüta sacrificiutanö Tayta Diosman entregashä”.
52 Israel runakunanami kikinkunapura niyarqan: “¿Imanöpatä kay runa aytsanta mikutsimäshun?”
53 Jesúsnami nirqan: “Rasunpaypami nï: Runapa Tsurinpa aytsanta mana mikurqa y yawarninta mana upurqa manami mana ushakaq kawayta tariyankitsu. 54 Aytsäta mikur y yawarnïta upurmi itsanqa mana ushakaq kawayta tariyanki. Noqami juiciu finalchöpis kawaritsiyämushayki. 55 Noqapa aytsäqa rasunpaypa kaq mikuymi y yawarnïpis rasunpaypa kaq yakumi. 56 Aytsäta mikuq kaqqa y yawarnïta upuq kaqqa noqawan jukllayllanömi kanqa y noqapis paywan jukllayllanömi kashä.
57 “Noqa kawä kachamaqnï y imayyaqpis kawaq Taytä kawayta qaramaptinmi. Taytäpita kawayta chaskinqänöllami aytsäta mikuq kaqkunapis noqapitarä kawayta chaskiyanqa. 58 Ciëlupita shamuq tantami noqaqa kaykä. Tsay tantaqa manami unay castaykikuna manáta mikuyanqannötsu. Manáta mikurpis paykunaqa wanuyarqanmi. Kay tantata mikuq kaqmi itsanqa imayyaqpis kawanqa”.
59 Jesús tsaynö yachatsirqan Capernaúmcho kaykaq sinagögachömi.
Jesús yachatsinqankuna mana ushakaq kawayta qaramänantsikpä kanqan
60 Tsaynö yachatsinqanta wiyarmi Jesúspa atskaq discïpulunkuna niyarqan: “Pay yachatsinqankunaqa aja tantiyaymi. Tsaynö parlaptinqa ¿pirä payta criyinqa?”
61 Tsaynö niyanqanta tantiyaskirmi Jesús nirqan: “¿Yachatsinqäpitaku ajanäyanki? 62 Tsaynö ajanarqa ¿ima niyankimanrä Runapa Tsurin ciëluman kutiykaqta rikar? 63 Manami pipis kikillanpitatsu mana ushakaq kawayta tarin, tsaypa trokinqa Espïritupitarämi. Noqa yachatsinqäqa Espíritu Santupita karmi mana ushakaq kawayta qarayäshunaykipä kaykan. 64 Tsaynö kaptinpis wakikikunaqa ninqäkunata manami criyiyankitsu”.
Jesús tsaynö nirqan mayqan runakuna payta mana chaskiyanqanta musyarmi. Tsaytaqa qallaykunanpitami musyarqan. Tsaynöllami mayqan discïpulun rantikunanpä kanqantapis musyarqan.
65 Jesúsnami nirqan: “Wakikikuna mana criyiyanqaykita musyarmi nishqä: ‘Taytä mana tantiyatsiptinqa manami pipis chaskikamanmantsu’ ”.
66 Jesús ninqanta wiyaykurmi atskaq discïpulunkuna payta jaqiskir aywakuyarqan. 67 Tsaymi chunka ishkay akranqan discïpulunkunata Jesús tapurqan: “¿Qamkunapis aywakuytaku munaykäyanki?”
68 Tsaynö niptinmi Simón Pedro nirqan: “Taytay, qampita mas jukqa manami pipis qatiräyänäpä kantsu. Ninqaykikunaqa mana ushakaq kawayta tariyänäpämi kaykan. 69 Noqakunaqa qammanmi criyiyä. Qamqa Tayta Dios kachamunqan santu runami kankia”.†
70 Jesúsnami nirqan: “¿Manaku chunka ishkay discïpulükuna kayänaykipä akrashqä? Tsaynö kaptinpis jukqa diablupa munayninchömi kaykan”.
71 Jesús tsaynö nirqan Simónpa tsurin Judas Iscariotipämi. Payqa apostolnin karpis Jesústa wanutsiyänanpämi rantikurqan.