Wawqinkunapis Jesúsman mana criyiyanqan
7
Tsaypitanami Galileacho kaykaq markakunapa Jesús purirqan. Israel autoridäkuna wanutsiyta munayaptinmi Judea provinciaman aywayta munarqantsu.2 Israel runakunapa Ramäda fiestanpä† wallkallana pishiykaptinmi 3 wawqinkuna Jesústa niyarqan: “Milagru ruranqaykita discïpuluykikuna rikayänanpä Judeaman ayway. 4 Reqishqa kayta munarqa manami kayllachötsu milagruta rurankiman, sinöqa llapan runakuna rikayänanpä ruray”.
5 Jesúspa wawqinkuna payman mana criyirmi tsaynö niyarqan.
6 Tsaymi wawqinkunata Jesús nirqan: “Noqa aywanäpä manami hörä chämunrätsu. Qamkunami itsanqa imay hörapis aywayankiman. 7 Qamkunataqa runakuna manami chikiyäshunkitsu. Noqatami itsanqa jutsayuq kayanqanta niptï chikiyäman. 8 Tsay fiestamanqa qamkunalla aywayay. Noqa aywanäpä manami hörä chämunrätsu”.
9 Tsaynö nirmi Galileacho Jesús quëdakurqan.
Ramäda fiestaman Jesús aywanqan
10 Ramäda fiestaman wawqinkuna aywaskiyaptinnami Jesúspis pakayllapa aywarqan. 11 Fiestacho Jesústa ashirpis mana tarirmi Israel autoridäkuna niyarqan: “¿Maychörä tsay runa kaykan?”
12 Jerusaléncho qorikaq wakin runakunami niyarqan: “Jesúsqa alli runami”.
Wakinnami niyarqan: “Llutantami yachatsikun”.
13 Israel autoridäkunata mantsarmi kikinkunapura tsaynö parlayarqan.
14 Pullan fiestacho kaykäyaptinnami templupa patiunman yaykur Jesús yachatsir qallaykurqan. 15 Yachatsinqanta musyaskirmi Israel runakuna almirakur niyarqan: “Ley yachatsikuqkunawanpis mana puriykarqa ¿imanöpatä kay runa tsayläya yachaykun?”
16 Tsaynö niyaptinmi Jesús nirqan: “Yachatsinqäqa manami yarpaylläpitatsu, sinöqa kachamaqnï Tayta Diospitami. 17 Pipis Tayta Dios munanqanta rurayta munarqa yachatsinqäkuna Diospita kanqanta o yarpaylläpita kanqanta tantiyakunqami.
18 “Kikinpa yarpayllanpita yachatsiqkunaqa alabashqa kayta munallarmi yachatsiyan. Noqami itsanqa kachamaqnï Tayta Dios alabashqa kananpä rasun kaqllata yachatsï. 19 Qamkunaqa Moisés qellqanqan leykunata chaskirpis manami mayqaykipis cumpliyankitsu. ¿Imanirtä wanutsimayta munaykäyanki?”
20 Runakunanami niyarqan: “¿Pitä wanutsiyta munaykäshunki? ¡Qamtaqa supaymi löcuyaykätsishunki!”
21 Jesúsnami nirqan: “Jamay junaqcho milagruta ruranqäpitami† qamkunaqa ajanashqa kaykäyanki. 22 Tantiyakuyay. Ollqu wamrata señalanantsikpämi Moisés yachatsirqan.† (Moisés yachatsiptinpis tsay costumbri Abrahampita patsami karqan.)† Moisés qellqanqankunata cumplir ¿manaku jamay junaq kaptinpis ollqu wamrata señalayanki? 23 Ollqu wamraykikunata jamay junaq kaykaptinpis señalaykarqa ¿imanirtä ajanashqa kaykäyanki qeshyaykaq runata jamay junaqcho alliyätsinqäpita?† 24 Shumaq mana tantiyarqa ama llutanta parlayaytsu. Shumaq tantiyaykurrä parlayay”.
Maypita kanqantapis Jesús willakunqan
25 Tsaymi Jerusaléncho taq wakin runakuna niyarqan: “¿Manaku kay runataqa wanutsiyänanpä ashiykäyan? 26 Llapanpa ñöpancho yachatsiptinpis ¿imanirtä ni pipis imatapis nintsu? ¿Tayta Dios kachamunqan Cristo kanqantatsurä mandaqkunapis yarpaykäyan? 27 Tsaynö kaptinpis noqantsikqa may markapita kanqantapis musyantsikmi. Tayta Dios kachamunqan Cristo shamuptinqa maypita kanqantapis manami pipis musyanqatsu”.
28 Tsaynö parlayanqanta musyarmi templupa patiuncho yachaykätsir jinchi Jesús nirqan: “Pï kanqäta reqiyämaptikipis y maypita shamunqäta musyayaptikipis manami kikïpa munaylläpitatsu shamushqä, sinöqa Tayta Dios kachamaptinmi shamushqä. Paytaqa manami reqiyankitsu. 29 Pay kachamashqa kaptinmi noqaqa reqï”.
30 Tsaynö niptinmi autoridäkuna Jesústa prësu tsariyta munayarqan. Tsaynö kaptinpis höran manarä kaptinmi tsariyarqantsu. 31 Atskaq runakunami payman criyir niyarqan: “Tayta Dios kachamunqan Cristo shamur kay runa milagruta ruranqanpita ¿mastatsurä ruranqa?”
Fariseukuna Jesústa prësu tsariyämunanpä kachayanqan
32 Jesúspä parlaykäyanqanta wiyaskirmi mandaq sacerdötikunawan fariseukuna Jesústa prësu tsariyämunanpä templu täpaq wardiakunata kachayarqan. 33 Manarä chäyaptinmi Jesús nirqan: “Wallkallanami qamkunawan kashä. Kachamaqnï kaqmannami aywakushä. 34 Noqa aywanqä kaqmanqa manami aywayta kamäpakuyankitsu. Ashiyämarpis manami tariyämankitsu”.
35 Jesús tsaynö niptinmi Israel autoridäkuna kikinpura parlar niyarqan: “Mana tarinantsikpäqa ¿mayparä aywanqa? ¿Juklä nacioncho taq marka mayintsikkunamantsurä yachatsiq aywanqa? Tsaychöqa capazchi griego runakunatapis yachatsinqa. 36 ¿Imanirtä ‘ashirpis manami tariyämankitsu’ nimantsik? ¿Imanirtä ‘aywanqäman manami chayta kamäpakuyankitsu’ nimantsik?”
Kawatsikuq yakupä ninqan
37 Ramäda fiesta diya junaqmi† llapan runakuna wiyayänanpä Jesús jinchi nirqan: “Pipis yakunaq kaqqa noqaman shamur uputsun.† 38 Tayta Diospa palabran ninqannömi noqaman yärakamuqkunapa shonqunpita kawatsikuq yaku mayunörä pashtamunqa”.
39 Tsaynö nirmi Jesús tantiyatsirqan payman yärakuqkuna Espíritu Santuta chaskiyänanpä kanqanta. Tsay witsanqa Espíritu Santu manarämi shamurqanrätsu. Gloriaman Jesús kutiskiptinrämi shamurqan.
Runakuna rakikäyanqan
40 Jesús tsaynö ninqanta wiyaskirmi wakin runakuna niyarqan: “Moisés ninqannö shamunanpä kaq profëtami payqa kaykan”.†
41 Wakin runakunami niyarqan: “Payqa Tayta Dios kachamunqan Cristumi”.
Wakin kaqnami niyarqan: “¿Imanöpatä Galileapitaqa Cristo shamunman? 42 Tayta Diospa palabranmi nin rey David castapita Cristo kananpä kanqanta.† Tsaynöllami nin David tanqan Belénchörä yurinanpä kanqanta”.†
43 Tsaynö nirmi Jesús janan rakikäyarqan. 44 Wakinkuna prësu tsariyta munarpis manami mayqanpis tsariyarqantsu.
Israel autoridäkuna mana criyiyanqan
45 Tsaypitanami mandaq sacerdötikunawan fariseukuna kaykäyanqan kaqman templu täpaq wardiakuna kutiyarqan. Chaykuyaptinnami niyarqan: “¿Imanirtä Jesústa prësu apayämushqaykitsu?”
46 Wardiakunanami niyarqan: “¡Pay parlanqannöqa manami pipis parlantsu!”
47 Tsaynö niyaptinmi fariseukuna niyarqan: “¿Qamkunatapis engañaskiyäshushqaykiku? 48 Tsay runataqa manami mayqan autoridäkunapis ni fariseukunapis criyiyantsu. 49 Moisés qellqanqan leykunata mana yachaq runakunallami paytaqa criyiyan. ¡Tsay runakunaqa maldicionashqami kayan!”
50 Tsaynö niyaptinmi Jesúsman aywaq fariseo Nicodemo† nirqan: 51 “Leynintsikkuna ninqannö pitapis juzganantsikpäqa kikin parlanqantarä puntata wiyashun y ruranqankunatarä shumaq musyashun”.
52 Tsaymi fariseukuna niyarqan: “¿Qampis janan shärinaykipä paypa marka mayinku kanki? Tayta Diospa palabranta shumaq liyiy. ¡Manami imaypis nimantsiktsu Galileapita profëta kanqanta!”
53 [Tsaypitanami wayinkunapana llapan kutikuyarqan.