Adulteriu jutsacho kaykaq warmita Jesús perdonanqan
8
Jesúsnami Olivos jirkanman aywakurqan. 2 Tsaypita waraynin tuta templupa patiunman kutiptinmi llapan runakuna pay kaqman qorikäyarqan. Tsaycho Jesús jamaykur yachaykätsiptinmi 3 ley yachatsikuqkunawan fariseukuna juk warmita apayarqan. Tsay warmitami tariyarqan runanta qanratar juk runawan kakuykaqta. Runakunapa ñöpanman chaykatsirmi 4 Jesústa tapur niyarqan: “Rabí, kay warmitami tariyashqä runanta qanratar juk runawan kakuykaqta. 5 Moisés qellqanqanchömi nimantsik tsaynö warmikunataqa saqmaypa wanutsinantsikpä.† Qamqa ¿ima ninkitä?”6 Jesústa tsaynö tapuyarqan llutanta parlatsir acusayänanpämi.a Tsayta musyarmi Jesús unchukuykur dëdunwan patsacho qellqarqan. 7 Kutin kutin tapuyaptinnami ichirkur Jesús nirqan: “Mayqaykipis jutsaynaq karqa kay warmita saqmar qallaykuyay”.
8 Tsaynö nirkurmi yapay unchuykur patsacho qellqarqan.
9 Tsaynö ninqanta wiyaykurmib awkinkunapita qallaykur llapanpis juk juklla yarqur aywakuyarqan. Tsaymi tsay warmillana Jesúspa ñöpancho quëdaskirqan. 10 Jesúsnami ichirkur tsay warmita nirqan: “¿Maytä apayämushuqnikikuna? ¿Manaku ni jukllayllapis saqmayäshushqayki?”
11 Warminami nirqan: “Taytay, manami mayqanpis saqmayämashqatsu”.
Jesúsnami nirqan: “Noqapis manami saqmashqa kanaykita munätsu. Kananqa wayikipana aywakuy. Itsanqa amana jutsata rurankinatsu”.]
Pïmaypäpis Jesús aktsi kanqan
12 Tsaypitanami runakunata Jesús nirqan: “Noqami kay patsacho aktsi kaykä.c † Tsaymi ninqäta wiyakuqkuna tsakaycho kawayänanpa trokinqa kawatsikuq aktsichöna kawayanqa”.
13 Fariseukunanami niyarqan: “Tsaynö nirqa kikikipa yarpayllaykitami nikanki. Tsaymi ninqaykita criyiyätsu”.†
14 Jesúsnami nirqan: “Kikïpa yarpaylläpita niptïpis ninqäkunaqa rasun kaqmi kaykan. Noqa musyämi maypita shamunqäta y maypa aywanäpä kanqanta. Qamkunaqa tsayta manami musyayankitsu. 15 Qamkunaqa yarpayllaykikunapitami juzgayämanki. Noqaqa manami qamkunanötsu pitapis juzgä. 16 Kachamaqnï Taytä noqawan imaypis kaptinmi pitapis juzgarqa rasun kaqcho juzgä. 17 Leynikikunachömi nin: ‘Ishkay testïgukuna tsayllata niyaptinqa rasun kaqtami musyantsik’.† 18 Tsay ninqannöllami kachamaqnï Taytä juk testïgu y jukaq testïgunami noqa kaykä”.
19 Tsaynö niptinmi tapuyarqan: “¿Maychötä taytayki kaykan?”
Tsaymi Jesús nirqan: “Qamkuna manami Taytä pï kanqanta ni noqa pï kanqäta musyayankitsu. Pï kanqäta musyarqa Taytä pï kanqantapis musyayankimanmi”.
20 Jesús tsaynö nirqan templupa patiuncho ofrenda qorikuyänan kaqcho yachatsirmi. Tsaycho yachatsiptinpis höran manarä chämuptinmi mayqanpis prësu tsariyarqantsu.
Ciëlupita kanqanta Jesús ninqan
21 Tsaypitanami Jesús nirqan: “Noqaqa aywakushänami. Aywakuptï ashiyämarpis manami tariyämankitsu. Noqa aywanqä kaqmanqa manami aywayta kamäpakuyankitsu. Tsaypa trokinqa jutsallaykikunachömi wanuyanki”.
22 Israel runakunanami niyarqan: “¿Imanirtä pay kanqan kaqman mana chänantsikpä kanqanta nikämantsik? ¿Kikintsurä wanutsikuyta yarpan?”
23 Jesúsnami nirqan: “Qamkunaqa kay patsacho yuriqllami kayanki. Noqami itsanqa ciëlupita shamushqä. 24 ‘Noqami Kä’d nikaptïpis mana criyimarqa jutsaykikunachömi wanuyanki. Tsaymi nishqä jutsaykikunallacho wanuyänaykipä kanqanta”.
25 Tsaynö niptinmi tapuyarqan: “Qamqa ¿pitä kanki?”
Jesúsnami nirqan: “Unaypita patsanami pï kanqätapis willashqä. 26 Jutsaykikunata shimpinäpä atskarämi kaykan. Noqaqa kachamaqnï nimanqallantami qamkunata willaykä. Pay nimanqankunaqa llapanpis rasun kaqllami”.
27 Jesús tsaynö niptinpis Tayta Diospä parlaykanqanta manami tantiyayarqantsu. 28 Jesúsnami nirqan: “Runapa Tsurinta shäritsirrämie pï kanqätapis tantiyayanki. Tsayrämi munanqalläta imatapis mana ruranqäta tantiyayanki. Willakurpis Taytä nimanqannöllami willakü. 29 Kachamaqnïqa noqawanmi imaypis kaykan. Pay munanqanta imaypis ruraptïmi kikillätaqa jaqimantsu”.
30 Jesús tsaynö niptinmi payman atskaq criyiyarqan.
Libri kanantsikpä Jesús ninqan
31 Tsaypitanami payman criyiq Israel runakunata Jesús nirqan: “Yachatsinqänölla kawarqa rasunpaypami discïpulükuna kayanki. 32 Tsaymi rasunpaypa kaqta tantiyar librina kayanki”.
33 Tsaynö niptinmi niyarqan: “¿Imanirtä librina kayänäpä kanqanta niyämanki? Noqakunaqa Abrahampita aywaraqkunami kayä. Manami imaypis jukpa wätaynintsu kayashqä”.†
34 Jesúsnami nirqan: “Rasunpaypami nï: Pipis jutsallacho kawarqa jutsa ruraypa wätayninmi kaykan. 35 Wätayqa manami patronpa tsurintsu, sinöqa wätayllami. Patronpa tsurinmi itsanqa taytanpa kaqta imatapis rurananpä munayyuq kaykan. 36 Tsaymi wätay kayanqaykipita Tayta Diospa Tsurin jipiyäshuptiki rasunpaypa librina kayanki.†
37 “Musyämi Abrahampita aywaraq kayanqaykita. Abrahampita aywaraq kaykarpis ninqäkunata mana criyirmi wanutsimayta munaykäyanki. 38 Noqaqa Taytäpa ñöpancho rikanqäkunatami willaykä. Qamkunapis taytayki yachatsiyäshunqaykitami ruraykäyanki”.
Diablupa wamran kayanqan
39 Tsaymi niyarqan: “Noqakunapa taytäkunaqa Abrahammi”.
Jesúsnami nirqan: “Taytaykikuna rasunpaypa Abraham kaptinqa pay kawanqannömi kawayankiman. 40 Qamkunaqa Tayta Dios nimanqankunata willaptïmi wanutsimayta munaykäyanki. Abrahamqa manami imaypis Tayta Diospa willakuqninta wanutsiyta yarparqantsu. 41 Qamkunaqa taytaykikuna ruranqannömi ruraykäyanki”.
Paykunanami niyarqan: “Noqakunaqa manami wachapakuytsu kayä. Tayta Diosmi noqakunapa Taytäqa”.
42 Jesúsnami nirqan: “Tayta Dios rasunpaypa Taytayki kaptinqa kuyayämankimanmi. Noqaqa Tayta Diospitami kay patsaman shamushqä. Manami kikïpa munaylläpitatsu shamushqä, sinöqa Taytämi kachamashqa. 43 ¿Imanirtä ninqäkunata tantiyayämankitsu? Ninqäkunaman criyiyta mana munarmi tsaynö kaykäyanki.
44 “Qamkunapa taytaykiqa diablumi. Tsaymi pay munanqanta imatapis rurayanki. Payqa unaypita patsami wanutsikuq kaykan. Llulla karmi imaypis rasun kaqta parlantsu. Tsaymi pipis llullakurqa paynö llullakuq kaykan. 45 Rasun kaqta parlaptïpis noqataqa manami criyiyämankitsu.
46 “Jutsayuq kaptïqa mayqaykipis mä shimpiyämay. Rasun kaqta willaykaptïqa ¿imanirtä criyiyämankitsu? 47 Tayta Diospa wamran karqa pay ninqantami cäsukuyankiman. Diospa wamran mana karmi cäsukuyankitsu”.
Abraham manarä yuriptinpis Jesús kanqan
48 Tsaynö niptinmi Israel runakuna niyarqan: “¡Qamqa Samaria runakunanömi llutanta parlanki! ¡Qamchöqa supaymi kaykan!”
49 Jesúsnami nirqan: “Noqachöqa manami ima supaypis kantsu. Noqaqa Taytätami respitä. Qamkunaqa manami respitayämankitsu. 50 Noqaqa manami runakuna alabayämänantatsu munä, tsaypa trokinqa llapan runakunata juzgaq Tayta Dios alabamänantami. 51 Rasunpaypami nï: Ninqäkunaman criyiqkunaqa manami imaypis wanuyanqatsu”.
52 Israel runakunanami niyarqan: “Kananmi itsanqa qamcho supay kanqanta rasunpaypa musyayä. Abraham y profëtakunapis llapanmi wanuyarqan. Tsaynö kaptinpis qamqa nikanki: ‘Ninqäkunaman criyiqkunaqa manami imaypis wanuyanqatsu’. 53 Qamqa ¿Abrahampita mastsurä kaykanki? Abraham y profëtakunapis wanushqa kaykaptinqa ¿pï kanqaykitatä yarpanki?”
54 Tsaymi Jesús nirqan: “Niyanqaykinö alabakuptïqa parlanqäkunapis manami imapä välinmantsu. Taytämi noqata alliman churamanqa. Paytami qamkunapis ‘Diosnïmi’ niyanki. 55 Qamkunaqa manami payta reqiyankitsu. Noqami itsanqa reqï. ‘Manami reqïtsu’ nirqa qamkunanömi llullaküman. Pay ninqankunataqa llapantami cäsukü. 56 Unay castaykikuna Abrahammi shamunäpä kanqanta musyar kushikurqan. Shamuqta rikamarmi pasaypa kushikurqan”.
57 Israel runakunanami niyarqan: “Manarä pitsqa chunka (50) watayuq kaykarqa ¿imanöpatä Abrahamta reqinkiman karqan?”
58 Jesúsnami nirqan: “Rasunpaypami nï: Abraham manarä yuriptin Noqami Kä”.f
59 Tsaynö niptinmi rumita aptarkur saqmayta munayaptin Jesús pakakurqan. Tsaypitanami [runakunapa chawpinpa päsar] templupita yarquskir aywakurqan.