Qapra runata Jesús alliyätsinqan
9
Jerusaléncho Jesús puriykarmi rikarqan yuriyninpita qapra runata. 2 Tsaymi discïpulunkuna tapuyarqan: “Rabí, ¿imanirtä kay runa qapra yurishqa? ¿Kikinpa jutsanpitaku o mamanpa y papäninpa jutsanpitaku?”3 Jesúsnami nirqan: “Manami kikinpa ni mamanpa ni taytanpa jutsanpitatsu kay runa qapra yurishqa, sinöqa Tayta Dios alliyätsinqanta runakuna musyayänanpämi. 4 Junaq kanqanyaq kachamaqnï munanqanta rurashuna. Paqaspaqa manami pipis aruyta kamäpakunnatsu.b 5 Kay patsacho kanqäyaqqa aktsimi kaykä”.c †
6 Tsaynö nirmi toqayninwan mituta ruraskir tsay qapra runapa ñawinta Jesús llushirqan. 7 Nirkurnami nirqan: “Siloé estanquiman aywar mayllakamuy”.
(Siloéqa kachamushqa ninanmi.)
Jesús ninqannö mayllakuskirmi alliyashqana kutirqan. 8 Tsaymi vecïnunkuna y payta reqiqkuna niyarqan: “¿Manaku kay runaqa limushna mañakuq qapra runa?”
9 Wakinmi niyarqan: “Paymi”.
Wakinnami niyarqan: “Manami paytsu. Itsanqa pay niraqmi”.
Tsaynö niyaptinmi kikin nirqan: “Noqami tsay runa kaykä”.
10 Tsaymi tapuyarqan: “¿Imanöpatä ñawiki alliyashqa?”
11 Paynami nirqan: “Jesús jutiyuq runami mituta ruraskir ñawïta llushipämashqa. Nirkurmi mayllakunäpä Siloé estanquiman kachamashqa. Nimanqannö mayllakuskirmi kananqa rikäna”.
12 Tsaymi tapuyarqan: “¿Maychötä tsay alliyätsishuqniki runa kaykan?”
Paynami nirqan: “Manami musyätsu”.
Alliyashqa runata fariseukuna tapuyanqan
13 Tsaypitanami qapra kanqanpita alliyashqa runata fariseukunaman pushayarqan. 14 Mituta ruraskir Jesús alliyätsinqan junaqqa jamay junaqmi karqan. 15 Tsaymi imanöpa alliyanqantapis fariseukuna tapuyarqan. Tapuyaptinmi nirqan: “Juk runami ñawïta mituwan llushipämashqa. Mayllakuskirmi kananqa rikäna”.
16 Tsaymi wakin fariseukuna niyarqan: “Tsay runaqa manami Tayta Dios kachamunqan runatsu. Tayta Dios kachamunqan karqa jamay junaqta respitanmanmi”.
Wakin fariseukunanami niyarqan: “Yarpäyanqaykinö jutsayuq karqa ¿imanöpatä alliyätsinman?”
Tsaynö nirmi kikinkunapura ajätsinakuyarqan.
17 Tsaymi alliyashqa runata yapay tapur niyarqan: “Tsay alliyätsishuqniki runa ¿pï kanqantatä yarpanki?”
Paynami nirqan: “Payqa profëtami”.
18 Tsaynö niptinmi Israel runakunapa autoridäninkuna tsay runa qapra kanqanta criyiyarqantsu. Tsaymi mamantawan taytanta qayaskatsir 19 tapuyarqan: “¿Kay runa wamraykikunaku? ¿Rasunpaypaku qapra yurirqan? ¿Imanöpatä alliyashqa?”
20 Taytanwan mamannami niyarqan: “Awmi, wamräkunami. Rasunpaypami yurinqanpita patsa qapra kashqa. 21 Itsanqa manami musyayätsu imanöpa alliyanqanta ni pï alliyätsinqantapis. Payqa yashqanami. Kikinta tapuyay”.
22 Tsaynö niyarqan autoridäkunata mantsarmi. Autoridäkunaqa willanakuyashqanami kayarqan mayqanpis “Jesúsqa Tayta Dios kachamunqan Cristumi” niq kaqtaqa sinagögapita qarquyänanpä.d 23 Tsayta mantsarmi taytanwan maman niyarqan: “Payqa yashqanami. Kikinta tapuyay”.
24 Tsaymi qapra kanqanpita alliyashqa runata autoridäkuna yapay qayaskatsir tapuyarqan: “Tayta Diospa ñöpanchömi niyä. Rasun kaqta willayämay. Musyayämi tsay alliyätsishuqniki runa jutsasapa kanqanta”.
25 Tsay runanami nirqan: “Noqaqa manami musyätsu jutsasapa kanqanta o jutsaynaq kanqantapis. Itsanqa musyä qapra kanqäpita rikanqätami”.
26 Tsaynö niptinmi yapay tapuyarqan: “¿Imatatä rurashqa ñawiki alliyänanpä?”
27 Niyaptinmi nirqan: “Qamkunata willashqänami. Willaptïpis manami criyiyämankitsu. ¿Imanirtä yapay tapuykäyämanki? ¿Qamkunapis paypa discïpulun kaytaku munaykäyanki?”
28 Tsaynö niptinmi ajanar niyarqan: “Qammi paypa discïpulunqa kaykanki. Noqakunaqa Moiséspa discïpulunkunami kayä. 29 Musyayämi Moisésta Tayta Dios parlapanqanta. Tsay alliyätsishuqniki runapäqa ni maypita shamunqantapis manami musyayätsu”.
30 Tsaynö niyaptinmi nirqan: “Tsay runa ñawïta alliyaykätsimaptinqa ¿imanirtä Tayta Diospita shamunqanta tantiyayankitsu? 31 Musyantsikmi jutsasapakunataqa Tayta Dios mana cäsunqanta. Paypita mantsapakur munanqannö kawaqkunatami itsanqa yanapan.† 32 Manami imaypis wiyashqantsiktsu yuriyninpita qaprata pipis alliyätsinqanta. 33 Tsay runa Tayta Diospita mana shamushqa karqa manami ima milagrutapis ruranmantsu”.
34 Autoridäkunanami niyarqan: “¡Qamqa pasaypa jutsayuqmi yurishqayki! ¿Tsaynö kaykarku noqakunata yachatsiyämayta munaykanki?”
Tsaynö nirmi sinagögapita tsay runata qarquyarqan.
Jesúsman mana yärakur qapranö kayanqan
35 Tsay alliyätsinqan runata sinagögapita qarquyanqantami Jesús musyarqan. Tsay runawan tinkuskirnami nirqan: “¿Runapa Tsurinmane criyinkiku?”
36 Niptinmi nirqan: “Taytay, ¿pitä tsay runa? Payman criyinäpä willaykallämay”.
37 Jesúsnami nirqan: “Rikashqaykinami. Tsay runaqa noqami kaykä”.
38 Tsaynö niptinmi Jesústa adorar nirqan: “Taytay, qammanmi yärakullä”.
39 Jesúsnami nirqan: “Noqami runakunata juzganäpä kay patsaman shamushqä. Juzgaptïmi qaprakuna rikayanqa y rikaqkuna qaprayäyanqaf”.†
40 Tsaynö ninqanta wiyaykurmi tsaycho kaykaq wakin fariseukuna niyarqan: “Tsaynö kaptinqa ¿noqakunachi qapra kayä?”
41 Jesúsnami nirqan: “Qapra karqa manami jutsayuqtsu kayankiman. ‘Rikämi’ nirmi jutsayuq kaykäyanki”.g