Üshapa duëñuman Jesús tinkutsikunqan
10
Mastami Jesús nirqan: “Rasunpaypami nï: Üsha corralman punkunpa mana yaykuq kaqqa suwami kaykan. 2 Punkunpa yaykuq kaqmi itsanqa üshapa duëñun. 3 Paytami üsha täpaq runa punkuta kichapan. Üshapa duëñunqa üshankunata jutinpa jutinpa qayarmi corralpita jipin. 4 Üshakuna yarqurnami duëñunpa vozninta reqir qepanta aywayan. 5 Jäpa runapa vozninta wiyarmi itsanqa qepanta aywayantsu, tsaypa trokinqa qeshpirmi aywakuyan”.6 Tsaynö tinkutsiypa Jesús yachatsiptinmi imata ninqantapis runakuna tantiyayarqantsu. 7 Tsaymi Jesús nirqan: “Rasunpaypami nï: Noqami üsha corralpa punkun kaykä. 8 Manarä shamuptï puntata shamuqkunaqa llapanpis suwamia kayarqan. Tsaymi paykunata üshakuna cäsuyarqantsu. 9 Noqami itsanqa corral punku kaykä. Punkupa yaykuq kaqmi salvakunqa. Paykunaqa yaykur y yarqurmi alli qewata tariyanqa. 10 Suwanqa shamun suwakunanpä, wanutsinanpä y ushakätsinanpämi. Noqami itsanqa shamushqä runakuna alli kawayänanpä.
11 “Noqami alli mitsikuq runa kaykä. Alli mitsikuqqa üshankuna raykuq wanuytapis tarinmanmi. 12 Pägullapä mitsikuq kaqmi itsanqa löbu shamuykaqta rikaskir üshakunata jaqiskir aywakun. Tsaynö aywakun duëñun mana karmi. Tsaymi löbu yaykur tsariptin wakin üshakuna qeshpir maytsaypapis aywakuyan. 13 Pägullapä mitsikuq runaqa üshakunata mana kuyaparmi qeshpir aywakun.
14-15 “Noqami itsanqa alli mitsikuq runa kaykä.† Taytäta reqinqänö y pay reqimanqannömi† noqapis üshäkunata reqï y üshäkunapis reqiyäman. Tsaymi üshäkuna raykuq wanushäpis. 16 Manami kayllachötsu üshäkuna kayan, sinöqa juklächöpis kanmi. Paykunapis voznïta reqirmi cäsukayämanqa. Tsaymi paykunatapis qorikamushä juk corralllachöna kayänanpä. Tsaynöpami jukllayllana mitsiqnin kanqa.†
17 “Üshäkuna raykuq wanunäpä kaptï y kawarimunäpä kaptïmi Taytä kuyaman. 18 Noqaqa munayyuqmi kaykä wanunäpä y kawarimunäpäpis. Tsaymi kikï mana munaptïqa pipis wanutsimanqatsu. Wanunäpä y kawarimunäpämi Taytä nimashqa”.
19 Jesús tsaynö parlaptinmi Israel runakuna yapay kikinkunapura ajanätsinakuyarqan.† 20 Tsaymi wakin niyarqan: “Paycho supay kaptinmi löcuyashqa kaykan. ¿Imapätä wiyashunpis?”
21 Wakinnami niyarqan: “Supay löcuyätsiptinqa manami tsaynö parlanmantsu. Tsaynöpis qapra runata manami alliyätsinmantsu karqan”.
Jesúsman mana criyiyanqan
22 Tamya killachömi Jerusaléncho templupa fiestan karqan. 23 Tsaymi templuman yaykur Salomón ninqan alarcho Jesús puriykaptin 24 Israel runakuna juntapaykur tapuyarqan: “¿Imayyaqtä shuyäyäshayki rasun kaqta willayämänaykipä? Tayta Dios kachamunqan Cristo karqa juklla willayämay”.
25 Tsaynö niyaptinmi Jesús nirqan: “Qamkunata willashqänami. Willaptïpis y Taytäpa jutincho milagrukunata ruraykaptïpis manami criyiyämankitsu. 26 Tsaynö criyiyämankitsu üshäkuna mana karmi.
27 “Üshäkunami itsanqa voznïta reqir qatiräyäman. Noqapis paykunata reqïmi. 28 Mana ushakaq kawaytami paykunata qarashä. Imaypis manami ushakäyanqatsu.b Paykunataqa makïpita manami pipis qechumanqatsu. 29 Taytämi paykunata makïman churamushqa. Llapanpä munayyuq kaptinmi ni pipis Taytäpa makinpita qechunqatsu. 30 Taytäwan noqaqa jukllayllami kayä”.
31 Tsaynö niptinmi tsay autoridäkuna Jesústa yapay saqmayta munayarqan. 32 Jesúsnami nirqan: “Qamkuna rikayashqaykimi atska milagrukunata Taytäpa munayninwan ruranqäta. ¿Mayqan milagruta ruranqäpitatä saqmayta munayämanki?”
33 Tsaymi niyarqan: “Manami allita ruranqaykipitatsu saqmayta munayä, sinöqa Diospa contran parlanqaykipitami.† Qamqa runalla kaykarmi Dios tukuykanki”.
34 Jesúsnami nirqan: “Leynikichömi nin: ‘Noqami nirqä: “Qamkunaqa dioskunamic kayanki” ’.† 35 Tayta Diospa palabran ninqankunaqa rasun kaqllami. Unay runakunata tantiyatsir Tayta Dios tsaynö nikaptinqa 36 ¿imanirtä ‘Diospa Tsurinmi kaykä’ niptï llutanta ninqäta yarpäyanki? Kikin Tayta Diosmi kay patsaman kachamashqa.
37 “Ruranqäkuna Taytä munanqannö mana kaptinqa ama criyiyämaytsu. 38 Pay munanqannö kaptinqa criyiyämay. Ninqäkunata wiyayanqallaykiwan mana criyirpis milagru ruranqäkunata rikaykarqa criyiyämay. Tsaynöpami tantiyayanki noqacho Taytä kanqanta y paycho noqa kanqäta”.
39 Tsaynö niptinmi yapay prësu tsariyta munayarqan. Tsaymi qeshpir 40 Jordán mayu tsimpanman kutirqan. Tsaychömi ñöpata Juan bautizarqan.† 41 Jesús tsaycho kanqanta musyarmi atskaq runakuna tsayman aywaykur niyarqan: “Juanqa manami ima milagrutapis rurarqantsu. Jesúspä ninqankunami itsanqa llapanpis rasun kaqlla”.
42 Tsaychömi atskaq runakuna Jesúsman criyiyarqan.