Lázaro wanunqan
11
Betania markachömi Lázaro jutiyuq runa pasaypa antsa kaykarqan. Tsaychömi panin María y Martapis täyarqan.† 2 (Maríami Jesúspa chakinman perfümita wiñarkur aqtsanwan tsakitsishqa karqan.)† 3 Lázaro antsa qeshyaptinmi paninkuna juk runata Jesúsman kachayarqan: “Taytay, kuyanqayki Lázarumi antsa qeshyaykan” ninanpä.4 Tsaynö willayaptinmi Jesús nirqan: “Lázaro manami wanunqancho ushakänanpätsu qeshyaykan, sinöqa Tayta Dios y Tsurin munayyuq kayanqanta runakuna musyayänanpämi”.
5 Jesúsqa pasaypami kuyarqan Martata, Maríata y Lázaruta. 6 Lázaro qeshyaykanqanta willaptinpis manami jukllatsu aywarqan, sinöqa kaykanqan kaqllachömi ishkay junaq qoyarqan. 7 Tsaypitanami discïpulunkunata nirqan: “Judea provinciapa yapay aywashun”.
8 Discïpulunkunanami niyarqan: “Rabí, qäyankunarämi tsaycho runakuna saqmaypa wanutsiyta munayäshushqayki.† ¿Tsaynö kaykaptinku kutiyta munaykanki?”
9 Tsaymi Jesús nirqan: “¿Manaku juk junaqcho chunka ishkay höra kaykan? Junaqpa purirqa aktsita rikarmi runakuna ishkiyantsu.† 10 Paqaspa purirmi itsanqa imachöpis takakur ishkiyan. Tsaynö ishkiyan paycho aktsi mana kaptinmi”.a
11 Nirkurnami nirqan: “Amïguntsik Lázaruqa punukashqallami kaykan. Rikchatsinantsikpä aku aywashun”.
12 Discïpulunkunanami niyarqan: “Taytay, punukashqa karqa alliyanqami”.
13 “Lázaro punukashqallami” nirqa wanushqa kanqantami Jesús nirqan. Tsaynö niptin discïpulunkuna mana tantiyarmi punukashqa kanqanta yarpäyarqan. 14 Tsaymi Jesús nirqan: “Lázaruqa rasunpaypami wanushqa. 15 Tsaynö kaptinpis tsaycho mana kanqätami kushikü. Kananmi itsanqa noqaman rasunpaypa criyiyanki. Pay kaqman aywashun”.
16 Tsaymi Millish niyanqan Tomás discïpulu mayinkunata nirqan: “Noqantsikpis Jesúswan juntu wanunantsikpä aywashun”.
Wanushqakunata kawaritsinanpä Jesús munayyuq kanqan
17 Betaniaman Jesús chaykuptinnami chusku junaqna Lázaro pamparanqanta willayarqan. 18 Jerusalénpita Betaniaman media lëwanölla kaptinmi 19 atskaq runakuna Martata y Maríata shoqayänanpä aywayarqan. 20 “Jesúsmi shamuykan” niqta wiyarmi Marta taripaq aywarqan. Maríami itsanqa wayicho quëdakurqan. 21 Jesúswan tinkuskirmi Marta nirqan: “Taytay, kaycho kaptikiqa turï manami wanunmantsu karqan. 22 Imanö kaptinpis musyämi llapan mañakunqaykita Tayta Dios rurananpä kanqanta”.
23 Tsaynö niptinmi Jesús nirqan: “Turikiqa kawarimunqami”.
24 Martanami nirqan: “Taytay, musyämi juiciu finalcho wanushqakuna kawariyämuptin turïpis kawarimunanpä kanqanta”.†
25 Jesúsnami nirqan: “Noqami wanushqakunata kawaritsimuq kaykä.† Noqaman criyiq kaqtaqa wanuptinpis kawatsimushämi. 26 Kawaqkunapis noqaman criyimurmi mana ushakaq kawayta tariyanqa. ¿Tsayta criyinkiku?”
27 Martanami nirqan: “Awmi, noqa criyïmi Tayta Diospa Tsurin kanqaykita. Qamqa kay patsaman shamunanpä kaq Cristumi kaykanki”.
Lázarupä Jesús waqanqan
28 Tsaynö niskirmi ñañan María kaqman Marta kutirqan. Chaykurmi qayaskir rinrillancho nirqan: “Jesúsmi chämushqa. Paymi qayaykäshunki”.
29 Tsaymi María juklla aywarqan. 30 Jesúsqa manarämi markaman charqanrätsu, sinöqa Martawan tinkunqallanchörämi kaykarqan. 31 Wayipita María juklla yarquqta rikarmi tsaycho kaykaqkuna qepanta aywar niyarqan: “Turin pamparanqanmanchi waqaq aywaykan”.
32 Jesús kaqman chaykurmi ñöpanman qonqurikuykur María nirqan: “Taytay, qam kaycho kaptikiqa manami turï wanunmantsu karqan”.
33 Maríata y wallkiqninkunatapis waqaqta rikarmi Jesúspis pasaypa llakikurqan. 34 Tsaymi tapurqan: “¿Maymantä pampayashqayki?” nir.
Paykunanami niyarqan: “Taytay, rikatsiyänäpä aywashun”.
35 Tsaymi Jesúspis waqarqan. 36 Waqaptinmi wakin runakuna niyarqan: “Rikay, Lázaruta pasaypachi kuyarqan”.
37 Wakinnami niyarqan: “Qapra runatapis alliyaykätsirqa ¿manatsurä Lázarutapis alliyätsinman karqan?”
Lázaruta Jesús kawaritsimunqan
38 Pasaypa llakishqami Jesús charqan Lázaro pamparanqan machayman. Tsay machaypa punkunmi jatun rumiwan tsapararqan. 39 Tsaymi Jesús nirqan: “Tsaparaykaq rumita wititsiyay”.
Tsaynö niptinmi Lázarupa panin Marta nirqan: “Taytay, chusku junaqnami pamparaykan. Pasaypanachi asyaykan”.
40 Jesúsnami nirqan: “¿Manaku nishqä noqaman criyir Tayta Dios munayyuq kanqanta rikanaykipä?”
41 Tsaynö niptinmi tsaparaykaq rumita wititsiyarqan. Jesúsnami ciëlupa rikaskir nirqan: “Taytallä, mañakunqäta wiyamanqaykipitami qamta agradëcikü. 42 Musyämi imaypis wiyamanqaykita. Tsaynö kaptinpis kaycho kaykaq runakuna kachamanqaykita criyiyänanpämi mañakamü”.
43 Tsaynö niskirmi Jesús jinchi nirqan: “¡Lázaro, yarqamuy!”
44 Tsaynö niptinmi uman, makin y chakin wankushqa kawaykar yarqamurqan. Tsaymi Jesús nirqan: “Purinanpä paskayay”.
Jesústa wanutsiyänanpä mandaq sacerdötikuna willanakuyanqan
45 Lázaruta kawaritsimunqanta rikaykurmi Maríata wallkiq runakuna Jesúsman atskaq criyiyarqan. 46 Wakin kaqnami fariseukunaman aywaykur Lázaruta Jesús kawaritsimunqanta willayarqan. 47 Tsaymi mandaq sacerdötikunawan fariseukuna llapan Sanedrín juezkunata qayaskatsir niyarqan: “Tsay runaqa atskatanami milagrukunata ruran. Kananqa ¿imatatä rurashun? 48 Imatapis mana rurashqaqa llapan runakunami payman criyiyanqa. Tsayta musyaskirmi Roma soldädukuna shamur templuntsikta juchutsir noqantsiktapis chipyaq ushakätsimäshun”.
49 Tsaynami mas mandaq sacerdöti Caifás nirqan: “¡Qamkuna manami imatapis musyayankitsu! 50 Llapantsik wanunantsikpa trokin mas allimi kanman juk runalla wanuptin. ¿Imanirtä tsayta tantiyayankitsu?”
51 Caifásqa manami kikinpa yarpayllanpitatsu tsaynö nirqan, sinöqa tsay wata mas mandaq sacerdöti kaptinmi Tayta Dios tantiyatsirqan llapan runakunapa trokin Jesús wanunanpä kanqanta. 52 Manami Israel runakunallapätsu wanunan karqan, sinöqa Diospa wamrankuna maytsaycho mashtakashqa kaykaqta qorimunanpämi. 53 Tsay junaqpitami autoridäkuna willanakuyarqan Jesústa wanutsiyänanpä.
54 Tsaymi Israel autoridäkunapa rikananchöqa Jesús purirqannatsu. Jerusalénpita discïpulunkunawan Efraín markaman aywarmi tsaycho quëdayarqan. Tsay markaqa tsunyaq jirka ñöpanchömi kaykan.
55 Israel runakunapa Pascua fiestan qallaykunanpäna kaykaptinmi markankunapita atskaq runakuna purificakuyänanpä Jerusalénman aywayarqan. 56 Jesústa ashirmi templupa patiuncho juknin juknin ninakuyarqan: “Qamkuna ¿imatatä yarpäyanki? ¿Fiestaman Jesús shamunqatsurä?”
57 Mandaq sacerdötikuna y fariseukunami runakunata kaynö nir yachatsiyashqana kayarqan: “Jesústa maychöpis rikarqa prësu tsaritsiyänäpä juklla willayämanki”.