3 Tsaynö kaykäyaptinmi Judas Iscariotipa shonqunman Satanás yaykurqan. Judasqa Jesúspa chunka ishkay discïpulunkunapita jukmi karqan. 4 Paymi mandaq sacerdötikunaman y templu täpaq wardiakunapa capitanninkunaman aywaykur nirqan Jesústa imanö entregananpäpis. 5 Tsaynö niptinmi sacerdötikuna kushikur pägayänanpä awniyarqan. 6 Judasnami shuyararqan runakuna mana kayanqan höra Jesústa entregananpä.

7 Levadüraynaq Tanta Mikuna fiesta qallaykunan junaqmi Pascuacho mikuyänanpä carnishta pishtayaq. 8 Tsaymi Pedruta y Juanta kachar Jesús nirqan: “Pascua mikuyta mikunantsikpä kamariq aywayay”.

9 Tsaynö niptinmi paykuna tapur niyarqan: “Taytay, ¿maychötä kamariyämushä?”

10 Jesúsnami nirqan: “Jerusalénman charmi juk runa uylluwan yakuta apaykaqta tariyanki. Tsay runapa qepallanta aywayanki may wayimanpis chanqanyaq. 11 Tsaycho wayiyuqta niyanki: ‘¿Mayqan cuartuchötäshi discïpulunkunawan Pascua mikuyta Jesús mikunqa?’ 12 Wayiyuqnami altuscho jatun cuartu kamarishqa kaykaqta rikatsiyäshunki. Tsaycho mikunantsikpä kamariyanki”.

13 Tsaymi paykuna aywar Jesús ninqannölla tariyarqan. Tsaychömi Pascua mikuyta kamariyarqan.

14 Mikuyänanpä höra chämuptinnami apostolninkunawan mësaman Jesús jamakurqan. 15 Tsaychömi Jesús nirqan: “Pasaypami munashqä manarä wanunqäyaq kay Pascua mikuyta qamkunawan mikuyta. 16 Noqami nï: Mananami Pascua mikuyta mikushänatsu Tayta Diospa mandakuynincho yapay mikunqäyaq”.

17 Tsaypitanami vïnuyuq cöpata aptarkur Tayta Diosman agradëcikuskir apostolninkunata nirqan: “Kaypita llapayki upuyay. 18 Noqami nï: Kananpitaqa vïnuta manami yapay upushänatsu Tayta Diospa mandakuynin chämunqanyaq”.

19 Tsaynöllami tantata aptarkur Tayta Diosta agradëcikurqan. Tantata pakiskirnami apostolninkunata makyar nirqan: “Kayqa cuerpümi. Kay tantata mikur qamkuna raykuq wanunqäta yarpäyanki”.

20 Tsaynöllami mikuyta ushaskir vïnuyuq cöpata aptarkur nirqan: “Kay vïnuqa yawarnïmi kaykan. Qamkuna raykuq wanur yawarnïta jichaptïmi Tayta Dios mushuq pactuta ruranqa.^† 21 Chikimaqnïkunaman entregamänanpä kaq runapis noqantsikwan juntumi kay mësacho kaykan. 22 Rasunpaypami Runapa Tsurinqa Tayta Dios munanqannölla ñakar wanunqa. Payta entregaq runami itsanqa pasaypa kuyapaypä kanqa”.

23 Apostolninkunanami kikinkunapura tapunakuyarqan: “¿Mayqantsikrä tsayta rurananpä kaq kaykantsik?”

24 Tsaypitanami apostolkuna mas mandaq kayta munar kikinkunapura rimanakuyarqan. 25 Tsaymi Jesús nirqan: “Nacionkunapa mandaqnin reykunaqa runakunata munayanqantami ruratsiyan. Tsaynö mandaqkunata alli runa kanqantami niyan. 26 Qamkunaqa ama tsaynö kayaytsu. Tsaypa trokinqa mayor karpis wamranö llampu shonqu kayay. Mandaq karpis wätaynölla kayay. 27 Shumaq tantiyakuyay. ¿Mësacho taqku o mikuynin sirviqku mas mandaq? ¿Manaku mësacho taq mas mandaq? Tsaynö kaptinpis noqaqa wätaynöllami qamkunacho kaykä.

28 “Imayka ñakaycho kaptïpis noqawanmi qamkuna imaypis kayashqayki. 29 Tsaymi mandaq kanäpä Taytä churamanqannö qamkunatapis mandaq kayänaykipä churayäshayki. 30 Qamkunami mandakuynïcho noqawan mikuyanki y upuyanki. Tsaynöpis trönumanmi jamayanki chunka ishkay trïbu Israel runakunata mandayänaykipä”.

31 Tsaypitanami Pedruta Jesús nirqan: “Simón, Simón, Satanásmi Tayta Diosta mañakushqa trïguta shuyshuqnö qamkunapa yärakuynikikunata ushakätsinanpä. 32 Tsaymi Tayta Diosta mañakushqä yärakuyniki mana ushakänanpä. Yapay yärakamurmi discïpulu mayikikunata shakyätsinki shumaq yärakayämunanpä”.

33 Pedrunami nirqan: “Taytay, carcelman apayäshuptikipis manami jaqishaykitsu. Wanutsiyäshuptikipis qamwanmi wanushä”.

34 Tsaymi Jesús nirqan: “Pedro, noqami nï: Kanan paqas gällu manarä cantaptinmi kimsa kuti ñëgamanki”.

35 Tsaypitanami apostolninkunata Jesús nirqan: “Qellayniynaqta, alforjaynaqta y llanqiynaqta willakuyänaykipä kachaptï ¿imallapis pishïyäshurqaykiku?”

Paykunanami niyarqan: “Manami imapis pishïyämarqantsu”.

36 Tsaynö niyaptinmi Jesús nirqan: “Kananpitaqa qellaytapis alforjatapis apayanki. Espädaykikuna mana kaptinqa punchuykikunata rantikuskir rantiyanki. 37 Noqami nï: Tayta Diospa palabranchömi noqapä nin: ‘Jutsayuq runanöllami wanurqan’.^† Tsay ninqannöllami noqata päsamanqa”.

38 Apostolninkunanami niyarqan: “Taytay, kaycho ishkay espädäkuna kaykan”.

Niyaptinmi Jesús nirqan: “¡Tsayta churayay!”

39 Tsaypita yarquskirnami imaypis aywanqannö Olivos jirkanman Jesús aywarqan. Discïpulunkunanami qepanta aywayarqan. 40 Tsayman chaykurnami nirqan: “Tayta Diosta mañakuyay Satanás mana tentayäshunaykipä”.

41 Tsaynö niskirnami washaläninkunaman witiykur qonqurikuykur Tayta Diosta mañakur 42 nirqan: “Papä, cöpacho wiñaraykaq castïguykita ama upuykatsillämaytsu.^† Itsanqa noqa munanqänöqa ama katsuntsu, tsaypa trokinqa qam munanqaykinö kaykullätsun”.

43 [Tsaynö llakikur rugakuykaptinmi ciëlupita juk ángel yuripaskir shakyätsirqan. 44 Pasaypa llakikurmi Tayta Diosman mas jinchi mañakurqan jumpinpis yawarnörä patsaman jutunqanyaq.]

45 Tsaynö mañakunqanpita discïpulunkuna kaqman kutirmi llakikuypita punukashqa kaykäyaqta tarirqan. 46 Tsaymi Jesús nirqan: “¡Imanirtä punuykäyanki! Sharkur Tayta Diosta mañakuyay Satanás mana tentayäshunaykipä”.

47 Jesús tsaynö parlaykaptinmi apostolnin Judas Iscariote charqan atska runakuna pushashqa. Jesúsman witiykurmi qaqllancho mutsaykurqan. 48 Jesúsnami nirqan: “Judas, ¿mutsaykurku Runapa Tsurinta entreganki?”

49 Jesústa prësu tsariyänanpä kanqanta tantiyaskirmi discïpulunkuna niyarqan: “Taytay, ¿espädäkunawanku roqukachaskayämushä?”

50 Tsaynö nirmi juk discïpulun mas mandaq sacerdötipa wätayninpa derëcha kaq rinrinta jipikaqpä roquskirqan. 51 Tsaymi Jesús nirqan: “¡Ama tsayta rurayaytsu!” Tsaymi tsay wätaypa rinrinta yataykullar alliyaskatsirqan.

52 Jesústa prësu apayänanpä shamuqkunami kayarqan mandaq sacerdötikuna, templu täpaq wardiakunapa capitanninkuna y Israel mayor runakuna. Paykunatami Jesús nirqan: “¿Imanirtä suwamannö espädaykikunawan y qeruykikunawan shayämushqayki? 53 Qoyay qoyay templupa patiuncho qamkunawan kaykaptï ¿imanirtä tsaycho prësu tsariyämarqaykitsu? Kananmi itsanqa höra chämushqa Satanáspa munayninta rurayänaykipä”.

54 Tsaypitanami Jesústa prësu tsariskir mas mandaq sacerdötipa wayinman apayarqan. Pedrunami karu qepallanta aywarqan. 55 Sawan rurinchömi ninata tsarirkatsir runakuna mashakuykäyarqan. Tsayman yaykuskirmi Pedrupis paykunawan mashakuykarqan. 56 Pedro mashakuykaqta rikaykurmi juk wätay warmi nirqan: “Kay runapis paywanmi purishqa”.

57 Pedrunami ñëgar nirqan: “¡Warmi, paytaqa manami reqïtsu!”

58 Tsaypita rätuntanami juk runapis payta rikaykur nirqan: “Qampis paywan puriqmi kaykanki”.

Pedrunami nirqan: “¡Runa, paywan manami imaypis purishqätsu!”

59 Tsaypita juk höratanönami yapay juk runa nirqan: “Kay runaqa rasunpaypami paywan purishqa. Paypis Galilea runami”.

60 Pedrunami nirqan: “¡Runa, manami musyätsu imata parlapaykämanqaykitapis!”

Parlayta Pedro manarä ushaptinmi gällu cantaskirqan. 61 Tsay hörami Pedruman Jesús tikraykur rikaskirqan. Pedrunami yarpaskirqan Jesús kaynö ninqanta: “Manarä gällu cantaptinmi kimsa kuti ñëgamanki”.

62 Tsaymi waqtaman yarquskir pasaypa pësakurnin waqarqan.

63 Tsaypitanami Jesústa tsararaykaq runakuna burlakurnin maqayarqan. 64 Ñawinta tsaparkurmi [laqyar] niyarqan: “Pï maqashunqaykitapis mä niyämay”.

65 Tsaynö nirmi imaykata ashlliyarqan.

66 Patsa waraskiptinnami Israel mayor runakuna, mandaq sacerdötikuna y ley yachatsikuqkuna qorikäyarqan. Paykunapa despächunman chätsiyaptinmi Jesústa tapuyarqan: 67 “Mä niyämay. ¿Rasunpaypaku Tayta Dios kachamunqan Cristo kanki?”

Jesúsnami nirqan: “Awmi niptïpis manami criyiyämankitsu. 68 Tapuptïpis manami imatapis niyämankitsu [ni kachäyämankitsu]. 69 Kananpitaqa Runapa Tsurin munayyuq Tayta Diospa derëchanchömi jamaranqa”.^†

70 Autoridäkunanami niyarqan: “Tsaynö kaptinqa ¿Diospa Tsurinku kanki?”

Jesúsnami nirqan: “Qamkuna niyanqaykinöllami kaykä”.

71 Paykunanami niyarqan: “Diospa Tsurin kanqanta kikin nikämashqaqa ¿imapänatä testïgutapis ashishun?”