Discïpulunkunapa chakinta Jesús mayllanqan
13
Pascua fiesta manarä qallaptinmi Jesús musyarqanna kay patsapita Taytan kaqman aywakunanpä kanqanta. Tsaynö kaykarpis payman criyiqkunataqa imaypis kuyanqannöllami kuyarqan.2 Discïpulunkunawan Jesús manarä merendayaptinmi Simónpa tsurin Judas Iscariotita diablu yarpayta qoshqana karqan Jesústa rantikunanpä. 3 Jesús musyarqanmi llapantapis munayninman Taytan churanqanta. Tsaynöpis musyarqanmi pay kaqpita shamunqanta y pay kaqman kutinanpä kanqanta. 4 Mikuykäyanqanpita sharkurnami janan latsapanta jipiskir toällata tseqllanman watakurqan. 5 Nirkurmi lavatoriuman yakuta wiñaskir discïpulunkunapa chakinta mayllarqan. Mayllaskirnami tseqllanpita toällata jipiskir tsakitsiparqan.
6 Simón Pedrupa chakinta mayllananpäna kaykaptinmi Pedro nirqan: “Taytay, ¿imanöpatä chakïta qam mayllapämankiman?”
7 Jesúsnami nirqan: “Imanir mayllanqäta kanan mana tantiyarpis tsaypitarämi tantiyanki”.
8 Pedrunami nirqan: “Taytay, chakïta manami imaypis mayllapämankimantsu”.
Jesúsnami nirqan: “Chakikita mana mayllaptïqa manami discïpulütsu kanki”.
9 Tsaymi Simón Pedro nirqan: “Taytay, tsaynö kaptinqa chakillätaqa ama mayllapämaytsu, sinöqa makïtapis umätapis mayllapaykallämay”.
10 Jesúsnami nirqan: “Pipis bäñakushqana karqa chakillantanami mayllakun. Qamkunaqa jutsaykikunapita limpiunami kaykäyanki. Tsaynö karpis manami llapaykitsu limpiu kaykäyanki”.
11 Tsaynö nirqan juk discïpulun payta rantikunanpä kanqanta musyarmi.
12 Discïpulunkunapa chakinta mayllaskirnami llushtikunqan latsapanta jatikurkur mësaman yapay jamakurqan. Nirkurnami nirqan: “¿Tantiyayankiku imanir chakikikunata mayllanqäta? 13 Yachatsikuq kanqäta y Señorniki kanqäta niyämarnin rasun kaqtami nikäyämanki. 14 Noqa yachatsikuqniki y Señorniki kaykar chakikikunata mayllapaykaptïqa qamkunapis chakikikunata jukniki juknikipis mayllapänakuyanki. 15 Tsaynö rurashqä noqata rikamar qamkunapis rurayänaykipämi.a † 16 Rasunpaypami nï: Wätayqa manami patronninpita mas munayyuqtsu.† Tsaynöllami willakuq aywaqpis mandaqninpita mas munayyuqtsu.b 17 Kay ninqäta tantiyar cumplirqa kushishqami kawayanki.
18 “Manami llapaykipätsu tsaynö nï. Noqa musyämi mayqan discïpulükunata akranqätapis. Tayta Diospa palabranmi kaynö nikan: ‘Noqawan mikuykarpis conträmi shärishqa’.† Tsay qellqaraykaq cumplinqami. 19 Manarä cumpliptinmi qamkunata willaykä tsaynö kananpä kanqanta. Ninqänölla cumpliptinmi noqa kanqäta musyayankic.
20 “Rasunpaypami nï: Kachanqäkunata chaskiqkunaqa noqatami chaskiyäman. Noqata chaskimaqkunaqa kachamaqnïtapis chaskiyanmi”.†
Judas rantikunanpä kanqanta willanqan
21 Tsaynö nirmi Jesús pasaypa llakikur nirqan: “Rasunpaypami nï: Qamkunapita juknikimi prësu tsariyämänanpä entregamanqa”.
22 Mayqanpä ninqantapis mana musyarmi discïpulunkuna jukninpis jukninpis rikapänakuyarqan. 23 Tsay hörami Jesúspa kuyay discïpulun ñöpancho kaykarqan. 24 Paytami Simón Pedro sëñasllapa nirqan mayqanpä parlanqantapis Jesústa tapunanpä. 25 Tsaymi kuyanqan discïpulun Jesúspa pëchunman kitikaykur tapurqan: “Taytay, ¿mayqäkunapätä nikanki?”
26 Jesúsnami nirqan: “Tantata tullpurkur makyanqä kaqmi kanqa”.
Tsaynö nirmi tantata tullpurkur Simónpa tsurin Judas Iscariotita makyarqan. 27 Tsay tantata chaskiskiptinmi Judasman Satanás yaykurqan. Tsaymi Jesús nirqan: “Ruranaykipä kaqta juklla ruray”.
28 Imanir tsaynö ninqanta manami mayqan discïpulunkunapis tantiyarqantsu. 29 Qellay tsararaq kaptinmi wakin yarpäyarqan Pascua fiestapä rantipakuq Jesús kachaykanqanta. Wakinnami yarpäyarqan muchuqkunata yanapananpä kachanqanta. 30 Tantata mikuskirnami Judasqa juklla aywakurqan. Tsay höra patsa tsakashqanami karqan.
Mushuq mandamientuta Jesús yachatsinqan
31 Judas yarquskiptinnami Jesús nirqan: “Höra chämushqanami Runapa Tsurin glorificashqa kananpäd. 32 Tayta Diosta Runapa Tsurin glorificaptine Runapa Tsurintapis Tayta Dios glorificanqa. Manaräpis unaytami tsaynö glorificanqa.
33 “Kuyay wamräkuna, qamkunapita aywakunäpänami kaykä. Israel autoridäkunata ninqänöllami qamkunatapis nï: Ashimarpis noqa aywanqä kaqman manami aywayta kamäpakuyankitsu.†
34 “Qamkunata kuyanqänö jukniki juknikipis kuyanakuyanki. Kay ninqäkunaqa mushuq mandamientumi kaykan.† 35 Tsaynö kuyanakuyaptikimi pïmaypis musyayanqa discïpulükuna kayanqaykita”.
Pedro ñëgananpä kanqanta Jesús ninqan
36 Simón Pedrunami tapurqan: “Taytay, ¿maypatä aywanki?”
Jesúsnami nirqan: “Noqa aywanqä kaqman manami aywayankirätsu. Nirkurrämi aywayanki”.
37 Pedrunami nirqan: “Taytay, ¿imanirtä qamwan kanan aywämantsu? Qam raykuqmi wanushäpis”.
38 Tsaymi Jesús nirqan: “¿Rasunpaypaku noqa raykuq wanunaykipä listu kaykanki? Rasunpaypami nï: Gällu manarä cantaptinmi kimsa kuti ñëgamanki”.