Jesús näni kanqan
14
“Ama llakikuyaytsu. Tayta Diosman y noqamanpis yärakayämuy. 2 Taytäpa wayinchöqa atskami cuartukuna kaykan. Tsaynö mana kaptinqa manami ‘qamkunapä cuartu kamariq aywashä’ nïmantsu karqan. 3 Kamariskamurnami qamkunata pushanäpä kutimushä. Tsaynöpami noqa kanqä kaqcho qamkunapis kayanki. 4 Musyayankimi mayqan nänipa tsayman chäyänaykipä kanqantapis”.5 Tomásnami nirqan: “Taytay, maypa aywanaykipä kanqantapis mana musyaykarqa ¿imanöpatä nänitapis reqiyäshä?”
6 Jesúsnami nirqan: “Noqami näni kaykä, rasun kaqmi kaykä y runakunata kawayta qoqmi kaykä. Noqata mana chaskikamarqa Taytä kaqman manami pipis chanqatsu.† 7 Noqata reqimarqa Taytätapis reqiyankimi. Tsaymi kananpitaqa rikashqana kar reqiyankina”.
8 Felipinami nirqan: “Taytay, Tayta Diosta reqiykatsiyällämay. Reqitsiyämaptikiqa mananami tapuyäshaykinatsu”.
9 Jesúsnami nirqan: “Felipe, unayna qamkunawan kaykaptï ¿manaku reqimanki? Noqata reqimaq kaqqa Taytätapis reqinmi. Reqiykämarqa ¿imanirtä: ‘Taytaykita reqitsimay’ nimanki? 10 ¿Manaku criyinki Taytäwan jukllaylla kanqäta y Taytäpis noqawan jukllaylla kanqanta? Llapan ninqäkunaqa manami kikïpa yarpaylläpitatsu, sinöqa noqacho kaykaq Taytäpitami. Paymi munanqanta noqawan ruran. 11 Taytäwan jukllaylla kanqäta y paypis noqawan jukllaylla kanqanta nikaptïqa criyiyämankiman. Ninqäkunata mana criyirpis milagru ruranqäkunata rikaykarqa criyiyämay.
12 “Rasunpaypami nï: Taytä kaqman aywakuptï noqaman yärakamuqkuna noqa ruranqänömi rurayanqa. Mas mantsakaypä kaqkunatami rurayanqa. 13 Noqapa jutïcho imatapis Taytäta mañakuyaptikiqa rurashämi. Tsurin karmi tsaynö rurashä Taytä alabashqa kananpä. 14 Jutïcho imatapis mañakuyaptiki mañakayämanqaykita rurashämi.†
Espíritu Santuta kachamunanpä Jesús ninqan
15 “Noqata kuyamarqa llapan mandamientükunata cäsukuyay.† 16 Tayta Diosta mañakuptïmi juk Yanapakuqta kachamunqa. Paymi imayyaqpis qamkunawan kanqa. 17 Payqa rasun kaqta tantiyatsikuq Espíritu Santumi. Tayta Diosta mana cäsukuqkunaqa Espíritu Santutapis manami chaskikuyanqatsu. Tsaynö chaskikuyanqatsu payta mana ashir y payta mana reqirmi. Qamkunami itsanqa reqiyanki. Tsaynö reqiyanki qamkunawan kaykaptin y qamkunacho kananpä kaptinmi.
18 “Qamkunataqa manami kikillaykikunataqa jaqiyäshaykitsu, sinöqa kutimushämi. 19 Wallka junaqkunallanami pishiykan runakuna manana rikayämänanpä. Qamkunami itsanqa rikayämanki. Noqa kawanqäpitami qamkunapis kawayanki. 20 Tsay junaqmi tantiyayanki Taytächo noqa kanqäta, noqacho qamkuna kayanqaykita y qamkunacho noqa kanqäta. 21 Mandamientükunata cumpliq kaqqa rasunpaypami kuyaman. Kuyamaq kaqtaqa Taytäpis kuyanmi. Noqapis kuyarmi paywan kaykäshä”.
22 Mana Iscariote kaq Judasnami tapur nirqan: “Taytay, noqakunawan kaykarqa ¿imanirtä wakin runakunawanpis kankitsu?”
23 Jesúsnami nirqan: “Pipis kuyamarqa ninqäkunatami cäsukun. Kuyamaq kaqtaqa Taytäpis kuyanmi. Tsaymi Taytäwan shamur imayyaqpis paywan kaykäshä. 24 Mana kuyamaq kaqqa ninqäkunata manami cäsukuntsu. Noqa ninqäkuna manami kikïpa yarpaynïpitatsu, sinöqa kachamaqnï Taytäpitami.
25 “Qamkunawan kanqäyaqmi llapan kaykunata nï. 26 Aywakuptïnami noqapa trokï Yanapakuq Espíritu Santuta qamkunaman Taytä kachamunqa. Paymi llapanta yachatsiyäshunki y llapan yachatsinqäkunata yarpätsiyäshunki.
27 “Alli kawaytami qamkunata jaqipä. Alli kawaynïtami qamkunata qoykü. Noqa yanapanqänöqa manami pipis yanapashunkitsu. Ama llakikuyaytsu ni mantsariyaytsu. 28 Qamkunata nishqänami aywakurpis kutimunäpä kanqanta. Taytä kaqman aywakuptï ama llakikuyankitsu. Payqa noqapita mas munayyuqmi. Rasunpaypa kuyayämarqa llakikuyänaykipa trokin kushikuyankimanmi. 29 Manarä aywakurmi qamkunata tsaynö willaykä. Aywakuptïnami ninqäkuna rasunpaypa kanqanta musyayanki.