Üvapa yuranman Jesús tinkutsinqan
15
Tsaypitanami Jesús nirqan: “Noqami rasunpaypa kaq üvapa yuran kaykä.† Taytänami üva uryaq kaykan. 2 Mayqan yurapis mana wayuptinqa Taytämi muturinqa. Wayuq kaqtami itsanqa mas wayunanpä shumaq llawmapanqa. 3 Üvata llawmaptin limpiu kanqannömi qamkunapis ninqäkunata cäsukur jutsaykikunapita limpiuna kaykäyanki.4 “Noqawan jukllayllanö kawayay. Tsaynö kawayaptikiqa noqapis qamkunawan jukllayllanömi kashä. Üvapa llimllan pakikar mana wayunqannömi qamkunapis noqawan jukllayllanö mana karqa Tayta Dios munanqannö kawayta kamäpakuyankitsu.
5 “Noqaqa üvapa yuranmi kaykä. Qamkunami llimlläkuna kaykäyanki. Tsaymi noqawan jukllayllanö kawarqa alli wayuq llimllanö kayanki. Noqawan jukllayllanö mana kawarmi itsanqa ima ruraytapis kamäpakuyankitsu. 6 Pipis noqawan jukllayllanö mana kawarqa yuranpita mutushqa llimllanömi tsakinqa. Tsakiskiptinnami qoriskir ninaman qaykuyanqa.
7 “Noqawan jukllayllanö kar y yachatsinqänö kawarqa llapan mañakayämanqaykitami chaskiyanki. 8 Tsaynöpami alli wayuq üvanö kar rasunpaypa discïpulükuna kayanki. Tsaynö kawayaptikimi Taytäta alabayanqa.
9 “Taytä kuyamanqannömi noqapis qamkunata kuyä. Tsaynö kuyaykaptïqa qamkunapis kuyayämay. 10 Mandamientükunata cumplirqa rasunpaypami kuyayämanki. Tsaynöllami noqapis Taytäta kuyar mandamientunkunata cumplï. 11 Tsaykunatami nï noqa kushishqa kawanqänö qamkunapis kushishqa kawayänaykipä.
12 “Mandamientümi kaykan qamkunata kuyanqänö jukniki juknikipis kuyanakuyänaykipä.† 13 Rasunpaypa kuyarqa amïgun raykuqmi wanurpis wanunman. 14 Llapan ninqäkunata cäsukurqa qamkunapis amïgümi kayanki. 15 Wätay kayanqaykita mananami niyäshaykinatsu. Wätaytaqa manami patronnin imata yarpanqantapis willantsu. Amïguntami itsanqa llapan yarpanqanta willan. Tsaynöllami qamkunatapis amïgü kayaptiki Taytä nimanqankunata llapanta willashqä.
16 “Manami qamkunatsu akrayämashqayki, tsaypa trokinqa noqami qamkunata akrashqä. Tsaynö akrashqä maypa aywarpis alli wayuq llimllanö kar allikunata rurayänaykipä y tsay rurayanqaykikuna imaypis kaykänanpämi. Tsaynö kawayaptikimi noqapa jutïcho imatapis mañakuyanqaykita Taytä qoyäshunki. 17 Mandamientü imata ninqantapis yapaymi nï: Jukniki juknikipis kuyanakur kawayay.
Jesúsman yärakuqkunata chikiyänanpä ninqan
18 “Runakuna chikiyäshuptiki ama llakikuyaytsu. Tsaypa trokinqa tantiyakuyay noqatapis ñöpata chikiyämanqanta. 19 Jutsata rurar kawayaptikiqa Diosta mana cäsukuqkunami kuyayäshunkiman. Tayta Dios munanqannö kawayaptikimi chikiyäshunki.† Pay munanqannö kawayänaykipämi qamkunata akrashqä.
20 “Yarpäyay qamkunata ninqäta: ‘Wätayqa manami patronninpita mas munayyuqtsu’.† Tsay ninqänöllami noqata chikimarqa qamkunatapis chikiyäshunki. Noqa ninqäkunata chaskimarqa qamkuna niyanqaykitapis chaskiyäshunkimi. 21 Noqa raykuq runakuna chikiyäshunki kachamaqnï Taytäta mana reqirmi.
22 “Kay patsaman shamur mana willaptïqa manami jutsayuqtsu kayanman.a Diospa willakuyninta willakuptï mana cäsukurmi itsanqa jutsayuq kayan. 23 Noqata chikimarqa Taytätapis chikinmi.
24 “Pipis mana ruranqan milagrukunata paykunapa ñöpancho ruraykaptïpis chikimarmi jutsayuq kaykäyan. Noqata chikimarqa Taytätapis chikiyanmi. Tsay milagrukunata mana ruraptïqa manami jutsayuqtsu kayanman karqan. 25 Leyninkunachömi nin: ‘Jutsaynaq kaykaptïmi runakuna chikiyämashqa’.† Tsay ninqannöllami llapanpis cumpliykan.