16
“Noqaman imaypis yärakayämunaykipämi llapan kaykunata nikä. 2 Sinagögapitapis qarquyäshunkimi. Tayta Dios munanqanta rurayanqanta yarparmi wanutsiyäshunki. 3 Tsaynö rurayäshunki noqata mana reqimar ni Taytätapis mana reqirmi. 4 Qamkunatami nï ninqänö päsayäshuptiki llapanpis cumplinqanta tantiyakuyänaykipä. Ñöpataqa manami willarqärätsu tsaynö päsayäshunaykipä kanqanta. Aywakunäpäna karnami willaykä.Espíritu Santu shamunanpä Jesús ninqan
5 “Kananqa kachamaqnï kaqman kutikunäpänami kaykä. Tsaynö kaptinpis manami mayqaykipis tapuyämankitsu maypa aywanäpä kanqanta. 6 Tapuyämänaykipa trokinmi tsaykunata ninqäpita llakishqa kaykäyanki. 7 Rasunpaypami nï: Qamkunapäqa mas allimi noqa aywakuptï. Mana aywakuptïqa Yanapakuq Espíritu Santu† manami shamunqatsu. Aywakurmi itsanqa payta kachamushä.
8 “Espíritu Santu shamurnami runakunata tantiyatsinqa jutsayuq kayanqanta, Tayta Dios munanqannö kawayänanpä kanqanta y juzgashqa kayänanpä kanqanta. 9 Noqaman mana criyiyaptinmi tantiyatsinqa jutsayuq kayanqanta. 10 Taytä kaqman kutikuptïmi Tayta Dios munanqannö kawayänanpä kanqanta tantiyatsinqa. Kutikuptï mananami rikayämankinatsu. 11 Kay patsapa mandaqnina vincishqana kaptinmi juzgashqa kayänanpä kanqanta tantiyatsinqa.
12 “Atskarämi qamkunata yachatsinäpä kaykan. Llapanta yachatsiptïqa manami tantiyayämankitsu. 13 Rasun kaqta tantiyatsikuq Espíritu Santu shamurmi itsanqa Diospa willakuyninta llapanta tantiyatsiyäshunki. Payqa manami kikinpa yarpayllanpitatsu tantiyatsiyäshunki, sinöqa ninqäkunallatami. Tsaynöllami ima päsananpä kaqkunatapis tantiyatsiyäshunki. 14 Noqa ninqäkunatami tantiyatsiyäshunki noqata alabayämänaykipä. 15 Taytä ninqankunaqa noqa ninqäkunami kayan. Tsaymi Espíritu Santu ninqäkunata tantiyatsiyäshunaykipä nishqä.
Llakikuyanqanpita kushikuyänanpä Jesús ninqan
16 “Manana rikayämänaykipä wallkallanami pishin. Tsaypita warayninkunaqa yapaymi rikayämanki”.
17 Tsaynö niptinmi discïpulunkuna jukninpis jukninpis niyarqan: “Tsaynö nirnin ¿imatarä nikämantsik? ¿Imanirrä: ‘Manana rikayämänaykipämi wallkallana pishin’ nikämantsik? ¿Imanirrä: ‘Tsaypita warayninkunaqa yapaymi rikayämanki’ nikämantsik? Tsaynöpis ¿imanirrä nikämantsik Taytan kaqman aywakunanpä kanqanta? 18 ‘Wallkallanami pishin’ ninqanqa ¿ima ninantä? Manami imapita parlanqantapis tantiyantsiktsu”.
19 Discïpulunkuna tapuyta munayanqanta musyarmi Jesús nirqan: “¿‘Manana rikayämänaykipä wallkallanami pishin’ y ‘tsaypita warayninkunaqa yapaymi rikayämanki’ ninqäpitaku yarpachakuykäyanki? 20 Rasunpaypami nï: Aywakuptïmi Diosta mana cäsukuq runakuna kushikuyanqa. Qamkunami itsanqa llakikur waqayanki. Tsaynö llakikurpis nirkurqa kushikuyankimi. 21 Warmikuna qeshyakuyänanpä nanaywan waqarpis qeshyakuskirqa kushikurninmi ñakayanqanta qonqaskiyan. 22 Tsaynöllami qamkuna kanan llakikurpis yapay tinkushqa kushikuyanki. Tsay kushikuytaqa manami pipis qechuyäshunkitsu. 23 Yapay tinkushqaqa mananami imatapis tapuyämankinatsu.
“Rasunpaypami nï: Noqapa jutïcho imatapis mañakuyanqaykitami Taytä qoyäshunki. 24 Noqapa jutïcho manami Taytäta imatapis mañakuyankirätsu. Kananpitaqa jutïcho mañakuyay. Mañakurqa chaskiyankimi. Tsaynöpami pasaypa kushikuyanki.†
25 “Kananyaq tumatsiyllapami qamkunata yachatsishqä. Tsaypitami itsanqa mana tumatsiypayllapana Tayta Diospa willakuyninta yachatsiyäshayki. 26 Tsay witsanqa manami noqanatsu qamkunapä Taytäta mañakushä, sinöqa kikikikunami jutïcho mañakuyanki. 27 Tsaynö mañakuyanki Taytä kuyayäshuptikimi. Paymi kuyayäshunki paypita shamunqäta criyir kuyayämaptiki. 28 Taytä kaqpita kay patsaman shamushqa karmi Taytä kaqman kutikushä”.
29 Tsaynö niptinmi discïpulunkuna niyarqan: “¡Kananmi itsanqa niyämanqaykita tantiyayä! ¡Mana tumatsipayllapanami parlapaykäyämanki! 30 Kananqa musyayämi llapanta musyanqaykita. Tsaymi yachaq kanqaykita pipis tapushunkinatsu. Kananmi itsanqa Tayta Dios kaqpita shamunqaykita criyiyä”.
31 Jesúsnami nirqan: “¿Kananqa criyiyankiku? 32 Wallkallatanami japalläta jaqiskamar wakpa kaypa aywakuyanki. Tsaynö aywakuyaptikipis manami japallätsu kashä, sinöqa Taytämi noqawan kaykanqa.
33 “Llapan kaykunatami willashqä noqaman criyir añaw kawayänaykipä. Kay patsacho kawayanqaykiyaqqa ñakayankirämi. Tsaynö kaptinpis kallpata tsariyay. Noqami kay patsacho llapan mana allikunata vincishqä”.†