Tayta Diosta Jesús mañakunqan
17
Tsaynö niskirnami ciëlupa rikarkur Jesús nirqan: “Papä, hörä chämushqanami.a Tsuriki kaykaptïqa glorificaykallämayb. Tsaynöpami noqapis glorificashaykic. 2 Llapan runakunapä munayyuq kanäpämi churamashqayki. Tsaymi munayyuq kaykä munaynïman churamunqayki runakunata mana ushakaq kawayta qaranäpä. 3 Mana ushakaq kawaycho kawaqkunaqa qamtami reqiyäshunki. Tsaynöllami noqatapis reqiyäman. Tsaynöpami tantiyayan japallayki Dios kanqaykita y noqata kachamanqaykita.4 “Runakuna alabayäshunaykipämi llapan nimanqaykikunata kay patsacho cumplishqä. 5 Taytallä, kay patsa manarä kaptin ñöpaykicho munayyuq kanqänö kananpis munayyuq kanäpä pushakallämay.
6 “Imanö kanqaykitapis discïpulükunatami musyatsishqä. Qampa kaptinmi paykunata akraskir makïman churamushqayki. Tsaymi willakuynikita willakuptï cäsukuyashqa. 7 Kananqa llapan yachatsinqäkuna y ruranqäkuna qam munanqaykinölla kanqantami musyayan. 8 Llapan nimanqaykitami paykunata yachatsishqä. Tsaymi yachatsinqäkunata criyir qampita kay patsaman shamunqäta tantiyayan.
9 “Manami llapan runakunapätsu mañakamü, sinöqa discïpulükunallapämi. Qampa kayaptinmi paykunata makïman churamushqayki. 10 Llapanpis noqaman yärakamuqkunaqa qampami kaykäyan y qamman yärakuqkunapis noqapami kaykäyan. Discïpulükuna yärakayämanqanpitami runakuna tantiyakuykäyan noqata kachamanqaykita. 11 Kay patsapita qam kaqman kutimuptïpis paykunaqa kay patsachörämi kayanqa. Santu Tayta Dios, noqantsik jukllaylla kanqantsiknö paykunapis jukllayllanö kayänanpä rikaykullay.
12 “Makïman churamunqayki runakunatami [kay patsacho] alli rikashqä. Tsaynö rikaptïmi mayqanpis oqrakashqatsu. Jukmi itsanqa Satanás munanqanta rurar oqrakashqa. Tsaynö päsashqa Tayta Diospa palabran cumplinanpämi.†
13 “Kananqa qam kaqmannami kutikamushä. Kay patsachömi discïpulükunata yachatsishqä noqa kushishqa kanqänö paykunapis kushishqa kawayänanpä. 14 Willakuynikita willakuptïmi criyikuyashqa. Munanqaykita ruranqänö paykunapis rurayaptinmi mana cäsukushuqnikikuna chikiyan. 15 Chikiyaptinpis manami kay patsapita juklla pushakunaykipätsu mañakü, tsaypa trokinqa Satanáspita tsapaykunaykipämi. 16 Qampa munaynikicho kanqänömi paykunapis munaynikichöna kaykäyan.
17 “Willakuynikiqa rasun kaqmi. Willakuyniki ninqannö kawayänanpä yanapaykullay. 18 Kay patsaman kachamanqaykinöllami paykunatapis munanqaykita rurayänanpä kachaykä. 19 Nimanqaykinöllami llapantapis cumpliykä. Tsaynöpami noqata rikamar paykunapis ninqaykikunata cumpliyanqa.
20 “Manami discïpulükunallapätsu mañakamü, tsaypa trokinqa willakuyanqanta criyir noqaman yärakamuqkunapäwanmi mañakamü. 21 Noqantsik jukllaylla kanqantsiknö kikinkunapurapis y noqantsikwanpis jukllayllanö kawayänanpä yanapaykullay. Tsaynö kawayanqanta rikarmi wakin runakunapis tantiyakuyanqa kachamanqayki Cristo kanqäta.
22 “Willakuynikita tantiyatsimanqaykinöllami tantiyatsishqä. Tsaymi noqantsik jukllaylla kanqantsiknö paykunapis jukllayllanö kayanqa. 23 Jukllayllanömi paykunawan kaykä y qampis noqawan jukllayllami kaykanki. Tsaynöpami paykunapis juk shonqulla kuyanakur kawayaptin kachamanqayki Cristo kanqäta runakuna tantiyayanqa. Tsaynöllami tantiyayanqa noqata kuyamanqaykinö paykunatapis kuyanqaykita.
24 “Taytallä, makïman churamunqayki runakuna noqawan kayänantami munä. Ñöpächo karmi rikayämanqa munayyuq kanäpä churamanqaykita. Kay patsata manarä kamarmi kuyamarniki munayyuq kanäpä churamarqayki.
25 “Taytallä, mana cäsukushuqnikikuna manami reqiyäshunkitsu. Noqami itsanqa qamta reqï. Tsaynöpis makïman churamunqayki runakuna musyayanmi kay patsaman kachamanqaykita. 26 Qampa willakuynikitami yachatsishqä. Tsaynöllami imaypis yachatsishä noqawan jukllayllanö kawayänanpä y noqata kuyamanqaykinö kuyanakuyänanpä”.