Jesústa prësu tsariyanqan
18
Tayta Diosta Jesús mañakuskirnami discïpulunkunawan Cedrón raqrata tsimpar jatun huertaman yaykuyarqan.†2 Tsayman discïpulunkunawan Jesús imaypis aywashqa kaptinmi Jesústa rantikuq Judas musyarqan tsayman aywayanqanta. 3 Tsaymi Jesústa prësu tsariyänanpä aktsinkunawan y espädankunawan wardiakunata y atska soldädukunata pushakurkur Judas aywarqan. Tsay wardiakunata y soldädukunatami mandaq sacerdötikuna y fariseukuna kachayarqan.
4 Jesúsqa llapan päsananpä kaqkunatami musyarqan. Tsaymi prësu tsariyänanpä aywaqkunawan tinkuskir tapurqan: “¿Pitatä ashiykäyanki?” nir.
5 Tsaymi niyarqan: “Nazaretpita Jesústami ashiykäyä”.
Tsaymi Jesús nirqan: “Noqami Kä”.a
(Jesústa rantikuq Judaspis tsaychömi kaykarqan.)
Niptinmi yapay niyarqan: “Nazaretpita Jesústami”.
8 Tsaymi Jesús nirqan: “Nishqänami: ‘Noqami Kä’. Noqata ashimarqa noqallata prësu tsariyämay. Kay runakunataqa ama tsariyaytsu”.
9 Tsaynö kananpämi ñöpata mañakur Tayta Diosta nirqan: “Makïman churamunqayki kaqkunata manami mayqantapis oqrashqätsu”.†
10 Tsaymi Simón Pedro espädanta jipiskir juk runapa derëcha kaq rinrinta roquriykurqan. Tsay runaqa mas mandaq sacerdötipa wätayninmi karqan. Paypa jutinmi Malco karqan. 11 Pedrutanami Jesús nirqan: “¡Espädaykita kutitsiy! Taytä qomanqan cöpata ¿manaku upüman?”b †
Mas mandaq sacerdötipa wayinman Jesústa apayanqan
12 Tsaypitanami capitanninwan soldädukuna y templu täpaq wardiakunapis Jesústa prësu tsarir watayarqan. 13 Nirkurnami Caifáspa suegrun Anáspa wayinman apayarqan. Tsay watami Caifás mas mandaq sacerdöti karqan. 14 Paymi autoridä mayinkunata nishqa karqan: “Llapantsik wanunantsikpa trokin mas allimi kanman juk runalla wanuptin”.†
Jesústa Pedro ñëganqan
15 Simón Pedrunami juk discïpulu mayinwan Jesúspa qepanta aywarqan. Tsay discïpulun mas mandaq sacerdötiwan reqinakushqa karmi patiuman yaykurqan. 16 Pedrunami punkullacho quëdarqan. Tsaymi ruriman yaykuq discïpuluqa punkucho täpaq warmita rugarqan Pedrutapis yaykatsinanpä.
17 Tsay warminami Pedruta tapurqan: “¿Manaku qampis taqay runapa discïpulun kanki?”
Pedrunami nirqan: “Manami”.
18 Pasaypa alaptinmi wätaykuna y templu täpaq wardiakunapis ninata tsariskatsir mashakuykäyarqan. Paykunawanmi Pedrupis mashakuykarqan.
Mas mandaq sacerdöti Anás Jesústa tapunqan
19 Tsaypitanami mas mandaq sacerdöti Jesústa tapur nirqan: “¿Pitä discïpuluykikuna? ¿Imatatä yachatsinki?”
20 Jesúsnami nirqan: “Noqaqa manami imatapis pakayllapa yachatsishqätsu. Sinagögakunacho y templuchöpis llapan runakunami yachatsinqäta wiyayämashqa. 21 ¿Imanirtä noqata tapumanki? Yachatsinqäta wiyaq runakunata tapuy. Paykunami imata yachatsinqätapis musyayan”.
22 Tsaynö niptinmi juk wardia Jesústa laqyaskir nirqan: “¿Tsaynöku mas mandaq sacerdötita ninki?”
23 Jesúsnami nirqan: “Mana allita parlashqa kaptïqa mä nimay. Imatapis llutanta mana parlaykaptïqa ¿imanirtä laqyamanki?”
24 Tsaypitanami watashqallata mas mandaq sacerdöti Caifás kaqman Anás apatsirqan.c
Jesústa Pedro yapay ñëganqan
25 Simón Pedro mashakuykaptinmi yapay tapuyarqan: “Qampis ¿manaku taqay runapa discïpulun kaykanki?”
Tsaymi Pedro nirqan: “Manami”.
26 Tsaypita rätullatanami mas mandaq sacerdötipa wätayninpis nirqan: “Qamtaqa paywan kaykaqtami huertacho rikashqä”.
(Tsaynö niq runapa castanpa rinrintami Pedro roqushqa karqan.)
27 Pedrunami yapay ñëgarqan. Tsay hörami gällu cantaskirqan.
Pilatuman Jesústa prësu apayanqan
28 Patsa waraykaptinnami Caifáspa wayinpita Roma gobernadorpa despächunmanna Jesústa apayarqan. Israel autoridäkunaqa manami tsay despächuman yaykuyta munayarqantsu. Paykuna yarpäyarqan tsayman yaykurqa impüru kar Pascua mikuykunata mana mikuyänanpä kanqantami. 29 Tsaymi despächunpita yarquskir Pilato tapurqan: “¿Ima jutsanpitatä kay runata apayämushqayki?”
30 Tsaynö tapuptinmi niyarqan: “Jutsayuq kaptinmi apayämushqä. Jutsaynaq kaptinqa manami apayämümantsu karqan”.
31 Pilatunami nirqan: “Leynikikuna ninqannö juzgayänaykipä apakuyay”.
Tsaynö niptinmi Israel runakunapa autoridäninkuna niyarqan: “Noqakuna pitapis wanutsiyänäpä manami munayyuqtsu kayä”.
32 Tsaynö nirmi cruzcho wanunanpä Jesús ninqanta cumpliyarqan.†
33 Despächunman Pilato kutiykurmi Jesústa qayaykur tapurqan: “¿Rasunpaypaku Israel runakunapa mandaqnin rey kaykanki?”
34 Tsaymi Jesús nirqan: “¿Kikikipa yarpayllaykipitaku o runakuna niyäshuptikiku tsaynö tapuykämanki?”
35 Pilatunami nirqan: “Noqa manami Israel runatsu kä tsaykunata musyanäpä. Marka mayikikuna y mandaq sacerdötikunami prësu apayämushushqayki. ¿Imatatä rurashqayki prësu apayämushunaykipä?”
36 Jesúsnami nirqan: “Noqa manami kay patsacho mandaqtsu kaykä. Kay patsacho mandaq kaptïqa prësu mana tsariyämänanpä qatirämaqnïkunami pelyayanman karqan”.
37 Pilatunami tapurqan: “Tsaynö nirqa ¿rasunpaypaku rey kaykanki?”
Jesúsnami nirqan: “Rasun kaqtami nishqayki. Rasun kaqta willakunäpämi kay patsacho yurishqä y tsaypämi kay patsaman shamushqä. Pipis rasun kaqta musyayta munarqa willakunqäkunatami criyin”.
38 Tsaynö niptinmi Pilato nirqan: “¡Tsay rasun kaqpä parlanqaykiqa imarä kakunpis!”
Jesústa crucificayänanpä Pilato mandanqan
Jesústa tapuskirmi despächunpita Pilato yapay yarquskir Israel runakunata nirqan: “Noqa manami kay runapa ima jutsantapis tarïtsu. 39 Qamkuna musyayankimi Pascua fiestacho cada wata juk prësuta kachanqäta. ¿Munayankiku Israel runakunapa mandaqnin reyta kachänäta?”
40 Tsaynö niptinmi llapan niyarqan: “¡Jesústaqa ama kachaytsu! ¡Barrabásta kachariy!”
Barrabásqa Romacho mas mandaq reypa contranmi karqan.