3 Tsaymi Jesústa Pilato tapur nirqan: “¿Rasunpaypaku Israel runakunapa mandaqnin rey kanki?”

Jesúsnami nirqan: “Rasun kaqtami nishqayki”.

4 Tsaynami mandaq sacerdötikunata y tsaycho qorikashqa kaykaq runakunata Pilato nirqan: “Kay runapa ima jutsantapis manami tarïtsu”.

5 Tsaynö niptinmi masrä niyarqan: “¡Kay runaqa autoridäkunapa contran shäriyänanpämi runakunata yachaykätsin! Galileapita qallaykurmi kay Judeachöna yachaykätsin”.

6 Tsayta wiyaykurnami Pilato tapurqan: “¿Kay runaqa Galileapitaku?”

7 “Awmi” niyaptinmi Galileacho mandaq Herodes juzgananpä Jesústa apatsirqan. Tsay junaqkunami Herodespis Jerusaléncho kaykarqan.

8 Jesúspä parlayanqanta wiyashqa karmi y milagru ruranqanta rikayta munarmi Herodesqa unaypitana reqiyta munarqan. Tsaymi Jesústa chätsiyaptin pasaypa kushikurqan. 9 Herodes kutin kutin tapuptinpis Jesúsqa manami imatapis parlakurqantsu. 10 Tsaychömi mandaq sacerdötikuna y ley yachatsikuqkuna Jesúspa contran imaykata niyarqan. 11 Tsaynami reypa cäpanta aqshurkatsir soldädunkunawan Herodes asiparnin Jesústa manakaqman churayarqan. Nirkurnami Pilatuman kutitsirqan. 12 Tsay junaqmi Herodeswan Pilato chikinakuyanqanpita yapay amistayarqan.

13 Tsaypitanami mandaq sacerdötikunata, autoridäkunata y llapan runakunata qayaskatsir 14 Pilato nirqan: “Kay runatami apayämushqayki: ‘Autoridäkunapa contran shäriyänanpämi runakunata yachatsin’ nir. Tsaynö niyaptikipis ñöpaykikunacho tapur manami ima jutsantapis acusayanqaykinöqa tarishqätsu. 15 Herodespis ima jutsantapis mana tarirmi kayman kutitsimushqa. Kay runa wanutsishqa kananpä manami ni ima mana allitapis rurashqatsu. 16 Tsaymi asutaykatsillar kachaykushä”.

17 [Cada watami Pascuacho Pilatuqa juk prësuta kachaq.]^† 18 Jesústa kachayta munaptinmi llapan runakuna juk shimilla qayaykachar niyarqan: “¡Tsay runaqa wanutsun! ¡Barrabásta kachariy!”

19 Barrabásqa carcelchömi wichqaraykarqan gobiernupa contran Jerusaléncho shärinqanpita y runata wanutsinqanpita.

20 Tsaymi runakunata Pilato yapay nirqan Jesústa kachaykunanpä. 21 Niptinpis paykunaqa masrämi qayaykachar niyarqan: “¡Crucificay! ¡Crucificay!”

22 Pilatunami yapay nirqan: “¿Ima mana allitatä rurashqa? Wanunanpäqa manami ima jutsantapis tarïtsu. Tsaymi asutaykatsillar kachaykushä”.

23 Tsaynö niptinpis crucificayänanta munarmi masrä qayaykachäyarqan. [Mandaq sacerdötikuna y] runakuna tsaynö qayaykachäyaptinmi Pilato awnirqan. 24 Tsaymi runakuna mañakuyanqannö Jesústa wanutsiyänanpä kachapaykurqan. 25 Gobiernupa contran shärishqa kaykaptinpis y runata wanutsishqa kaykaptinpis runakuna munayanqannöllami Barrabásta kacharqan. Jesústanami wanutsiyänanpä entregarqan.

26 Jesústa crucificayänanpä apaykäyaptinmi Simón jutiyuq runa chakrapita kutiykämurqan. Payqa Cirene nacionpitami karqan. Paytami niyarqan Jesús apaykanqan cruzta umrurkur Jesúspa qepanpa apananpä.

27 Atskaq runakunami Jesúspa qepanta aywayarqan. Paykunawanmi atskaq warmikunapis llakikurnin waqar aywayarqan. 28 Jesúsnami warmikunaman tikraykur nirqan: “Jerusalén warmikuna, noqapä ama waqayaytsu. Tsaypa trokinqa kikikikunapä y wawaykikunapä waqayay. 29 Pasaypa ñakay junaqkunami chämunqa. Tsay witsanmi runakuna niyanqa: ‘¡Ima kushishqarä kaykäyan qolluq warmikuna y llulluta mana chuchuq warmikuna!’ 30 Tsay witsanmi runakuna pasaypa ñakar jirkakunata niyanqa: ‘¡Juklla ushakäyänäpä janäkunaman juchumuy!’ Tsaynöllami qaqakunatapis niyanqa: ‘¡Juklla ñitiskayämay!’^† 31 Kawaykaq jachata kaynö ruraykarqa tsakishqatanäqa ¡imatanarä rurayanqapis!”^a

32 Jesústawan crucificayänanpämi ishkaq jutsasapakunatapis apayarqan. 33 Calavëra niyanqan sitiuman chaykatsirmi Jesústa crucificayarqan. Apayanqan jutsasapa runakunatami juknin kaqta derëchanman y jukaqtana itsuqninman crucificayarqan.

34 [Jesúsnami nirqan: “Taytay, kay runakunata perdonaykuy. Manami musyayantsu imata rurayanqantapis”.]

Soldädukunanami Jesúspa latsapanta apakuyänanpä suertita jitayarqan.^†

35 Tsaycho runakuna rikaraykäyaptinmi autoridäkuna Jesústa burlakurnin niyarqan: “Tayta Dios akranqan Cristo kaykarqa jukta salvanqannölla mä kanan kikinpis salvakutsun”.

36 Tsaynöllami soldädukunapis burlakurnin pochquq vïnuta uputsiyta munar 37 niyarqan: “Israel runakunapa mandaqnin rey kaykarqa mä kikiki salvakuy”.

38 Cruzpa puntanchömi juk letrëru nirqan: “Kay runami Israel runakunapa mandaqnin rey”. [Tsayqa qellqaraykarqan griëgucho, latíncho y hebreo idiömakunachömi.^†]

39 Tsaynöllami crucificaraykaq jukaq runapis Jesústa burlakur nirqan: “Tayta Dios kachamunqan Cristo karqa mä kikiki salvakuskir noqakunatapis salvayämay”.

40 Tsaynö niptinmi juknin kaq ajäpar nirqan: “Qampis paynö ñakaykarqa ¿manaku Tayta Diospita mantsapakunki? 41 Noqantsikqa jutsantsikpitami ñakaykantsik. Payqa manami ima jutsatapis rurashqatsu”.

42 Nirkurnami Jesústa nirqan: “Mandakuynikicho kaykar noqalläta yarpaykallämanki”.

43 Jesúsnami nirqan: “Rasunpaypami nï: Kananpitaqa noqawanmi paraísucho kanki”.

44 Pullan junaqpita hasta las tresyaqmi patsa tsakaskirqan. 45 Rupaypis manami atsikyarqantsu. Tsay hörami templu rurincho cortïnapis pullanpa rachiskirqan.^b 46 Jesúsnami jinchi nirqan: “¡Papä! ¡Makikimanmi almäta churaykamü!”^† Tsaynö niskirmi wanuskirqan.

47 Tsaykunata rikaykurmi soldädukunapa capitannin Tayta Diosta alabar nirqan: “¡Rasunpaypami kay runaqa jutsaynaq kashqa!”

48 Tsaycho kaykaq llapan runakunapis pasaypa llakikurmi pëchunkunata takarrä kutikuyarqan.^c 49 Jesúswan reqinakuqkunami karullapita pasaypa llakishqa rikaraykäyarqan. Paykunawanmi Galileapita shamuq warmikunapis kaykäyarqan.

50 Juk runami José jutiyuq karqan. Payqa Israel runakunapa autoridäninmi y Tayta Dios munanqannö kawaq runami karqan. 51 Judeacho Arimatea markapitami karqan. Paypis Tayta Diospa mandakuynintami shuyaraykarqan. Autoridä mayinkuna Jesústa wanutsiyänanpä willanakuyaptinpis payqa manami munarqantsu. 52 Paymi Pilatuman aywarnin rugakur nirqan: “Jesúspa ayanta pampanäpä kachapaykallämay”.

53 Awniptinmi Jesúspa ayanta cruzpita jipiskir lïnu säbanaswan piturqan. Nirkurmi manarä pitapis pampayanqan qaqacho uchkushqa sepultüraman pamparqan. 54 Tsaynö pamparqan jamay junaqpä kamarikuyänan junaq ushaykaptinnami. Jamay junaq qallaykunanpänami kaykarqan.^d

55 Galileapita Jesúswan shamuq warmikunanami Josépa qepanta aywar rikayarqan sepultüra maycho kanqanta y Jesúspa ayanta imanö churayanqanta. 56 Tsaypita wayiman kutiykurnami mushkuq jachakunata y perfümikunata kamariyarqan Jesúspa ayanman wiñapäyänanpä. Jamay junaq kaptinmi mandamientu ninqannö jamayarqan.