Jesús kawarimunqan
24
Semäna qallaykunan tutami Jesús pamparanqan kaqman tsaka tsakallana warmikuna aywayarqan kamariyanqan mushkuq jachakunata apakurkur. [Paykunawanmi wakin warmikunapis aywayarqan.] 2 Chaykurmi sepultüra tsaparaq rumita wititsishqa kaykaqta tariyarqan. 3 Sepultüraman yaykurnin Señor Jesúspa ayanta manami tariyarqantsu.4 Mantsakashqa kaykäyaptinmi ishkay runakuna chipipiykaq latsapashqa ñöpankunacho yuriskiyarqan. 5 Tsay runakunata rikaykurmi mantsakarnin urkunpis patsaman töpanqanyaq qonqurikuykuyarqan. Tsay runakunami niyarqan: “¿Imanirtä wanushqakuna pamparäyanqancho kawaykaq runata ashiykäyanki? 6 Manami kaychönatsu. ¡Kawarimushqanami! Yarpäyay Galileacho kaykar niyäshunqaykita: 7 ‘Runapa Tsurinqa jutsasapakunapa makinman entregashqami kanqa. Crucificar wanutsiyanqanpitami kimsa junaqta kawarimunqa’ ”.†
8 Tsaynö niyaptinmi tsay warmikuna Jesús ninqanta yarpaskiyarqan.
Ángeles en la Tumba
9 Tsaypita kutiskirnami chunka juk apostolkunata y tsaycho runakunatapis rikayanqanta y wiyayanqanta willayarqan. 10 Tsay warmikunami kayarqan María Magdalena, Juana, Santiagupa maman María y mas warmikunapis. 11 Warmikuna tsaynö willayaptinpis manakaqkunata parlaykäyanqanta yarparmi criyiyarqantsu. 12 Wakin mana criyiyaptinpis Pedrumi itsanqa Jesús pamparanqanman cörrilla aywarqan. Sepultüraman qawaykur säbanasllatana rikaykurmi espantashqa kutikurqan.
La Tumba Está Vacía
Emaúsman aywaqkunata Jesús yuripanqan
13 Tsay junaqmi Jesúspa ishkay qatiraqninkuna Emaús markaman aywaykäyarqan. Emaúsqa Jerusalénpita ishkay höra aywaynöllami karqan. 14 Paykunaqa Jerusaléncho llapan päsanqankunata parlarmi aywaykäyarqan. 15 Tsaynö parlar aywaykäyaptinmi Jesús yuripaskir paykunawan aywarqan. 16 Rikaykarpis Tayta Dios mana munaptinmi Jesús kanqanta tantiyayarqantsu.
17 Tsaymi Jesús tapur nirqan: “¿Imata parlartä aywaykäyanki?”
Tsaynö niptinmi llakinashqa ichiskiyarqan.
18 Cleofas jutiyuq runanami nirqan: “Pascuaman shamuq runakunaqa llapanmi musyayan Jerusaléncho kay junaqkuna ima päsanqantapis. ¿Qamqa manaku musyanki?”
19 Niptinmi Jesús tapur nirqan: “¿Imatä kashqa?”
Paykunanami niyarqan: “Nazaretpita Jesúsmi Tayta Diospa profëtan karqan. Paymi Diospa munayninwan imayka milagrukunata rurar llapan runakunata Diospa willakuyninta willarqan. 20 Paytami mandaq sacerdötikunawan autoridänintsikkuna Pilatuman entregayashqa crucificaypa wanutsinanpä. 21 Noqakunaqa yarpäyarqä chikimaqnintsikpita salvamänantsikpä kanqantami. Kimsa junaqnami payta wanutsiyanqan. 22 Manami tsaypis tsayllatsu. Yanapayämaq warmikunami mana criyiypäta willayämashqa. Tsaka tsakallana Jesústa pampayanqanman aywarshi 23 ayanta tariyashqanatsu. Tsaychöshi angelkuna yuripaykur ‘Jesúsqa kawarimushqanami’ niyashqa. Tsaykunatami kutiykamur willayämashqa. 24 Tsaymi wakin kaq discïpulu mayïkunapis pamparanqan kaqman aywar warmikuna willakuyanqannölla Jesúspa ayanta tariyashqatsu”.
25 Tsaymi Jesús nirqan: “¡Qamkunaqa imaläya chukru shonqutä kayanki! Profëtakuna willakuyanqanta ¿manaku criyiyanki? 26 ¿Manaku yarpäyanki Cristo wanurkurrä llapanpä munayyuq kananpä kanqanta?”
27 Tsaynö nirmi Moisés qellqanqanpita qallaykur profëtakuna qellqayanqanyaq Cristupä imata ninqantapis paykunata tantiyatsirqan.
28 Emaús markaman chaykäyaptinnami paykunapita Jesús päsaq tukurqan. 29 Tsaymi rugar paykuna niyarqan: “Tsakaykannami. Kayllachöna quëdakushun”.
Tsaynö niyaptinmi paykunawan quëdananpä markaman yaykurqan. 30 Tsaypita mësaman jamaykurnami tantata aptarkur Tayta Diosta agradëcikurqan. Nirkurnami tantata pakiskir paykunata makyarqan. 31 Tsay hörami Jesús kanqanta tantiyaskiyarqan. Jesúsnami illakaskirqan.
32 Tsaymi kikinpura parlar niyarqan: “¡Jesús kaptinchi Tayta Diospa palabranta tantiyatsimashqa nänicho shonquntsikpis atsikyarqan!”
33 Tsaymi jinan höra Jerusalénman kutiyarqan. Chaykurnami tariyarqan chunka juk apostolkunawan wakin runakunapis qorikashqa kaykäyaqta. 34 Tsaycho qorikashqa kaykaqkunami niyarqan: “¡Rasunpaypami Señor Jesús kawarimushqa! ¡Simóntapis yuripashqami!”
35 Niyaptinmi Emaúspita kutiqkunapis willayarqan nänicho ima päsanqanta y tantata pakinqan höra Jesústa reqiyanqanta.
Apostolninkunata Jesús yuripanqan
36 Tsaynö parlaykäyaptinmi paykunapa chawpincho Jesús yuriskir nirqan: “Alli kaway qamkunacho kaykullätsun”.
37 Tsaynö yuripaskiptinmi alma kanqanta yarparnin pasaypa mantsakäyarqan.
38 Tsaymi Jesús nirqan: “¿Imanirtä mantsakashqa kaykäyanki? ¿Imanirtä noqa kanqäta criyiyankitsu? 39 Makïta chakïta rikayay. ¡Noqami kaykä! ¡Yatayämay! Rikayämanqaykinöpis manami almatsu kä. Almaqa aytsaynaq y tulluynaqmi”.
40 Tsaynö nirmi makinta y chakinta rikatsirqan. 41 Rikar kushikuykarpis pay kanqanta manarämi criyiyarqanrätsu. Tsaymi Jesús tapurqan: “Mikunäpä ¿imallapis kanku?” nir.
42 Tsaynö niptinmi kankashqa pescäduta [y abëjapa mishkinta] qarayarqan. 43 Chaskiskirmi ñöpankunacho mikurqan.
44 Tsaypitanami nirqan: “Moisés qellqanqan leykunacho, profëtakuna qellqayanqancho y salmukunachömi ima päsamänanpä kaqkuna qellqaraykan. Qamkunawan kaykarmi willarqä llapan qellqaraykaqkuna cumplinanpä kanqanta. Willanqänöllami päsamashqa”.
45 Nirkurnami Tayta Diospa palabranta tantiyatsir 46 nirqan: “Diospa palabranmi nin Cristo ñakar wanunanpä kanqanta y kimsa junaqta kawarimunanpä kanqanta. 47 Tsaynöllami nin Jerusalénpita qallaykur llapan markakunacho willakuyänanpä kanqanta y paypa jutincho willakuyaptin runakuna jutsankunata kacharir perdonashqana kayänanpä kanqanta. 48 Llapan ima päsamanqantapis rikashqa karmi willakuyänaykipä testïgu kayanki. 49 Taytä awnikunqan Espíritu Santutami qamkunaman kachamushä. Tsaynö kaptinpis Espíritu Santupita munayta chaskiyanqaykiyaq Jerusalénllachörä shuyaraykäyay”.
Aparece Jesús Resucitado
Gloriaman Jesús aywakunqan
50 Tsaypitanami discïpulunkunata Betaniaman Jesús pusharqan. Tsaychönami makinta joqarkur paykunapä Tayta Diosta mañakurqan. 51 Tsaynö mañakuykaptinmi gloriaman Tayta Dios apakurqan. 52 Tsaycho discïpulunkuna Jesústa adoraskirmi Jerusalénman kushishqa kutikuyarqan. 53 Tsaypitanami Tayta Diosta alabayänanpä qoyay qoyay templuman qorikäyaq. [Amén.]
La Gran Comisión y Ascensión
Invitación para Conocer Personalmente a Jesús