Hechos
Apostolkuna rurayanqan
Espíritu Santuta chaskiyänanpä willanqan
1
Tayta Teófilo,† punta kaq libruchömi Jesús llapan ruranqankunata y yachatsinqankunata qellqamurqä. Tsaykunatami rurarqan y yachatsirqan willakur qallaykunqanpita 2 hasta ciëluman aywakunqan junaqyaq. Ciëluman manarä aywakurmi akranqan apostolninkunata Espíritu Santupa munayninwan imata rurayänanpä kaqtapis tantiyatsirqan. 3 Wanunqanpita kawarirkamurmi chusku chunka (40) junaqyaq paykunata yuriparqan. Rasunpaypa kawarimunqanta criyiyänanpämi imaykanöpa tantiyatsirqan. Tsaynöllami Tayta Diospa mandakuyninpäpis shumaq tantiyatsirqan.4 Apostolninkunawan kaykarmi Jesús nirqan: “Qamkunata willanqänömi awniyäshunqaykita† Taytä kachamunqa. Tsayta manarä chaskirqa Jerusalénpita amarä aywakuyankirätsu. 5 Juanqa yakullawanmi bautizarqan. Qamkunami itsanqa Espíritu Santuwan bautizashqa kayanki. Bautizashqa kayänaykipä juk ishkay junaqllanami pishiykan”.†
Ciëluman Jesús kutinqan
6 Jesúswan qorikashqa kaykaqkunami tapuyarqan: “Taytay, ¿kananpitaqa Israel nacionnintsikpa mandaqninnatsurä kanki?”
7 Jesúsnami nirqan: “Manami tsaykunata musyayänaykitsu. Imay junaq imay höra tsaykuna kananpä kanqantaqa Tayta Diosllami musyan. Payllami munayyuq kaykan munanqan höra tsaykunata rurananpä. 8 Tsaynö kaptinpis Espíritu Santu qamkunaman shamuptinmi munayninta chaskiyanki. Chaskiskirnami willakuynïta willakuyanki Jerusaléncho, entëru Judeacho, Samariacho y maytsay markakunachöpis”.†
9 Tsaynö parlayta ushaskirmi joqarikayta qallaykurqan. Rikaraykäyaptinmi pukutay tsapaskiptin illakaskirqan.† 10 Tsaynö kaykäyaptinmi yuraq latsapashqa ishkay runakuna illaqpita yuriskir 11 niyarqan: “Galilea runakuna, ¿imanirtä ciëlupa rikaraykäyanki? Ñöpaykikunapita ciëluman aywakunqannöllami Jesús yapay kutimunqa”.
Judaspa trokin apóstol kananpä Matíasta akrayanqan
12 Tsaynö niyaptinmi Olivos jirkancho kaykäyanqanpita apostolkuna Jerusalénman kutikuyarqan. Tsay jirkanpita Jerusalénmanqa manami alläpa karutsu karqan, sinöqa jamay junaqcho puriyanqannöllami.a 13 Chaykurnami patsaräyanqan altusman yarkuyarqan. Paykunami kayarqan Pedro, Juan, Santiago, Andrés, Felipe, Tomás, Bartolomé, Mateo, Alfeupa tsurin Santiago, Zelote niyanqan Simón y Santiagupa tsurin Judas.b 14 Paykunami Jesúspa maman Maríawan, Jesúspa wawqinkunawan y wakin warmikunawanpis Tayta Diosta mañakuyänanpä imaypis qorikäyaq.
15 Tsay junaqkunami Jesúsman yärakuqkuna juk pachak ishkay chunkanö (120) qorikäyaptin Pedro ichirkur nirqan: 16 “Wawqikuna panikuna, musyanqantsiknöpis Judasmi runakunata pusharqan Jesústa prësu tsariyänanpä. Tsaynö kananpä kanqanta qellqananpämi rey Davidta Espíritu Santu tantiyatsirqan. Tsaymi Judasta päsananpä kanqanta Tayta Diospa palabran ninqannölla kanan cumplishqa. 17 Judasqa noqakunawanmi purirqan. Paytapis apóstol kananpämi Jesús akrarqan”.
18 (Jesústa rantikunqan qellayta Judas kutitsinqanwanmi chakrata rantiyarqan. Judasqa pachanpis pashtaqpä uray senqaypa jeqaptinmi aqishninpis liwakarqan. 19 Tsayta musyaykurmi Jerusaléncho taq runakuna tsay chakrapa jutinta churayarqan Acéldama jutin kananpä. Paykunapa idiömancho Acéldama ninanqa Yawar Pampa ninanmi.)†
20 “Judasta päsananpä kaqtaqa Salmo libruchömi nin:
“ ‘Wayinpis tsunyaq rikakutsun.
Tsaycho pipis ama tätsunnatsu’.†
Tsaynöllami mastapis nin:
‘Pay rurananpä kaqta jukna ruratsun’.†
21 “Tsaymi juktana churashun Judaspa trokin apóstol kananpä. Tsay runa katsun Jesús willakur qallaykunqanpita noqakunawan puriq. 22 Tsaynölla Jesústa Juan bautizanqanpita† ciëluman kutikunqanyaq† qatiraq katsun. Tsay runata churashun noqakunanö apóstol kar Jesús kawarimunqanta willakur purinanpä”.
23 Tsaynö niptinmi ishkaq runakunata akrayarqan. Jukmi Matías karqan. Jukaqnami José karqan. Wakin runakunami Joséta Barsabás niyaq y wakinnami Justo niyaq. 24 Nirkurmi Tayta Diosta mañakur niyarqan: “Tayta Dios, musyankimi runakunapa shonqun imata yarpanqantapis. Kanan musyatsiyämay mayqantapis akranqaykita. 25 Akranqayki runami apostolniki kanqa Judas Iscariotipa trokin. Apóstol kayninta mana cumplirmi Judasqa wanuyta tarishqa”.
26 Tsaynö mañakuskir sortiyayaptinmi Matíaspä yarqurqan. Matíaswanmi apostolkuna yapay chunka ishkay kayarqan.