Espíritu Santu shamunqan
2
Pentecostés fiesta junaqmi Jesucristuman yärakuqkuna juk wayicho qorikashqa kaykäyarqan. 2 Tsaycho kaykäyaptinmi illaqpita shukukuy wayranörä pasaypa qayaranqan ciëlupita wiyakämurqan. 3 Tsaynöllami qallu tsikan nina niraqkuna juknin jukninman charqan. 4 Llapanmi Espíritu Santupa munayninwan imaypis mana parlayanqan idiömakunata parlar qallaykuyarqan.5 Tsay witsanmi Dios munanqannö kawaq Israel runakuna maytsay nacionpitapis Jerusaléncho kaykäyarqan. 6 Shukukuy wayranö qayaranqanta wiyarmi ima päsanqantapis rikaq aywayarqan. Jukninpis jukninpis markancho parlayanqan idiömakunata parlayanqanta wiyarmi mantsakashqa rikakuyarqan. 7 Tsaymi niyarqan: “Kay llapan parlaykaqkunaqa ¿manaku Galilea runakuna kaykäyan? 8 Idiömantsikta parlayänanpä ¿imanöpatä yachakuyashqa? 9 Kaychöqa maytsaypitami kaykantsik: Partiapita, Mediapita, Elampita, Mesopotamiapita, Judeapita, Capadociapita, Pontupita, Asiapita, 10 Frigiapita, Panfiliapita, Egiptupita, Libiacho kaq Cirenipa ñöpankunapita y Romapitapis. 11 Wakintsikqa yurinqantsikpitami Israel runakuna kaykantsik. Y wakintsiknami Israel runana kanantsikpä Tayta Diosman criyikurqantsik. Cretapitapis, Arabiapitapis kaychömi kaykantsik. Maytsaypita karpis kikintsikpa idiömantsikchömi wiyaykantsik Tayta Dios kushikuypä ruranqankunata”.
12 Tsaymi espantakur kikinpura parlayarqan: “¿Imatä päsaykan?” nir.
13 Wakinnami asipar niyarqan: “Kaykunaqa machashqami kaykäyan”.
Pedro willakunqan
14 Tsaynö parlayaptinmi apóstol mayinkunawan ichirkur Pedro nirqan: “Jerusaléncho y maytsaychöpis taq Israel runakuna, shumaq wiyayämay. 15 Manami yarpäyanqaykinötsu machashqa kaykäyä. Tuta las nuëvillaräqa manami pipis machantsu. 16 Kanan rikayanqayki päsananpämi profëta Joel willakur nirqan:
17 “ ‘Tayta Diosmi nin:
Ushanan tiempuchömi Espïritüta llapan runakunaman kachamushä.
Tsaymi ollqu tsurikikuna y warmi tsurikikunapis willakuynïta willakuyanqa.
Chölukunapis revelaciontami rikayanqa.
Awkinkunatapis suëñuyninkunachömi musyatsishä.
18 Tsay junaqkunami ollqu y warmi sirvimaqnïkunamanpis Espïritüta kachamuptï willakuynïta willakuyanqa.
19 Imaypis mana rikayanqaykikunatami ciëlucho y kay patsachöpis rikakätsimushä.
Yawartapis, ninatapis y qoshnitapis rikayankimi.
20 Rupaypis tsakanqami.
Killapis yawarmanmi tikranqa.
Tsaykuna kanqa juzganä junaq manarä chämuptinmi.
Tsay junaqqa mantsariypämi kanqa.
21 Tsaynö kaptinpis noqata mañakamaq kaqtaqa pïmaytapis salvashämi’.†
22 “Israel runakuna, shumaq wiyayämay. Musyayanqaykinöpis Nazaretpita Jesústami Tayta Dios yanaparqan mana rikanqantsik milagrukunata noqantsik kaqcho rurananpä. 23 Tsaynö kaykaptinpis qamkunami Jesústa prësu tsariskir Diosta mana cäsukuq runakunaman crucificaypa wanutsiyänanpä entregayashqayki.† Tsaynö kananpä kanqantaqa unaypita patsami Tayta Dios nirqan.† 24 Wanutsiyaptinpis pamparanqallancho ushakänanta mana munarmi Tayta Dios kawaritsimushqa.†
25 “Davidpis Jesucristupämi nirqan:
“ ‘Tayta Diostami imay hörapis yarparaykä.
Derëchächo karmi imaypis yanapaykäman.
26 Tsaymi shonqüpis pasaypa kushikun.
Shimïpis paytami alaban.
Payman yärakurmi imaypis añawlla kawä.
27 Wanushqakuna pamparäyanqanchöqa manami kacharimankitsu.
Santu sirviqniki kaptïmi sepultüracho cuerpü ismunantapis munankitsu.
28 Munanqaykinö kawanäpämi alli nänipa pushamanki.
Ñöpaykichöqa imaypis kushishqallami kawä’.†
29 “Wawqikuna, musyantsikmi David wanunqanta. Maycho pamparanqantapis musyantsikmi. 30 Profëta karmi David musyarqan castanpita [Cristo] yurinanpä kanqanta. Tsaynöpis musyarqan paynö rey kananpä Tayta Dios jurar awninqantami.† 31 Tsaymi kikinpä qellqananpa trokin tsay yuriq runapä David qellqarqan. Payqa salvamaqnintsik Cristumi. Cristo kawarimunqanta rikaqnömi David qellqarqan pamparanqancho Tayta Dios mana jaqinanpä kanqanta y cuerpun mana ismunanpä kanqanta.
32 “Kananqa David qellqanqannöllami Jesústa Tayta Dios kawaritsimushqa. Kawarimunqanta llapäkunami rikayashqä. 33 Paytami Tayta Dios derëchanman jamaykatsir promitinqan Espíritu Santuta entregashqa. Jesucristunami Espíritu Santuta noqakunaman kachamushqa. Tsaytami kanan wiyaykäyanki y rikaykäyanki.
34 “Davidqa manami kawarimushqatsu ni ciëluman aywashqatsu. Tsaymi kikinpä qellqananpa trokin jukpä qellqar nirqan: ‘Mandamaqnïtami Tayta Dios nirqan: “Derëchäman jamakamuy 35 llapan chikishuqnikikunata munaynikiman churamunqäyaq” ’.†
36 “Israel runakuna, ninqäta shumaq tantiyakuyay. Qamkuna Jesústa cruzcho wanutsishqa kayaptikipis Tayta Diosmi payta churashqa Señornintsik y salvamaqnintsik Cristo kananpä”.
37 Tsayta wiyaykurmi runakuna pasaypa llakikur Pedruta y wakin apostolkunatapis tapur niyarqan: “Wawqikuna, ¿imatatä rurayäman?”
38 Pedrunami nirqan: “Tayta Dios perdonayäshunaykipä jutsaykikunata kacharir Jesucristupa jutincho bautizakuyay. Tsaynöpami Tayta Dios qarayäshunqayki Espíritu Santuta chaskiyanki. 39 Tayta Diosnintsik awninqan Espíritu Santuqa qamkunapä, tsurikikunapä y maytsaycho täyaptinpis llapan qayanqan runakunapämi”.
40 Tsaynö nirmi Pedro mastapis tantiyatsir nirqan: “¡Jutsasapa runakunanö castigashqa kayänaykipä kanqanpita salvakuyay!”
41 Pedro ninqanta criyikuqkunami kimsa waranqanö (3,000) kayarqan. Bautizakurmi yärakuqkunaman yapakäyarqan. 42 Paykunami imaypis qorikäyaq apostolkuna yachatsiyanqankunata yachakuyänanpä, shakyätsinakuyänanpä, Santa Cënata mikuyänanpä y Tayta Diosta mañakuyänanpä.
Criyikuqkuna yanapanakur kawayanqan
43 Apostolkuna milagrukunata rurayanqanta rikarmi llapan criyikuqkuna espantakuyarqan. 44 Imaypis qorikarmi imaykankunatapis rakipänakur yanapanakuyaq.† 45 Tsaynöllami chakrankunata y imaykankunatapis rantikur ministiyanqanman tupu tsay qellayta aypunakuyaq. 46 Qoyay qoyaymi templupa patiunman qorikäyaq. Tsaynöllami wayinkunacho qorikaykur tantata pakipanakur kushishqa mikuyaq. Mayqanpis manami qallayätsinakuyaqtsu. 47 Paykunaqa imaypis Tayta Diostami alabayaq. Llapan runakunami paykunata respitayaq. Wakintapis Señornintsik salvaptinmi qoyay qoyay atskayäyaq.